Adhyāya 1 · Brāhmaṇa 6

त्रयं वा इदं नाम रूपं कर्म ।तेषां नाम्नां वागित्येतदेषामुक्थमतो हि सर्वाणि नामान्युत्तिष्ठन्ति ।एतदेषाँ सामैतद्धि सर्वैर्नामभिः सममेतदेषां ब्रह्मैतद्धि सर्वाणि नामानि बिभर्ति॥ 1.6.1 ॥

trayaṃ vā idaṃ nāma rūpaṃ karma | teṣāṃ nāmnāṃ vāgityetadeṣāmukthamato hi sarvāṇi nāmānyuttiṣṭhanti | etadeṣām̐ sāmaitaddhi sarvairnāmabhiḥ samametadeṣāṃ brahmaitaddhi sarvāṇi nāmāni bibharti

अथ रूपाणां चक्षुरित्येतदेषामुक्थमतो हि सर्वाणि रूपाण्युत्तिष्ठन्ति ।एतदेषाँ सामैतद्धि सर्वै रूपैः समम् ।एतदेषां ब्रह्मैतद्धि सर्वाणि रूपाणि बिभर्ति॥ 1.6.2 ॥

atha rūpāṇāṃ cakṣurityetadeṣāmukthamato hi sarvāṇi rūpāṇyuttiṣṭhanti | etadeṣām̐ sāmaitaddhi sarvai rūpaiḥ samam | etadeṣāṃ brahmaitaddhi sarvāṇi rūpāṇi bibharti

अथ कर्मणामात्मेत्येतदेषामुक्थमतो हि सर्वाणि कर्माण्युत्तिष्ठन्त्येतदेषाँ सामैतद्धि सर्वैः कर्मभिः समं एतदेषां ब्रह्मैतद्धि सर्वाणि कर्माणि बिभर्ति ।तदेतत्त्रयँ सदेकमयमात्माऽऽत्मो एकः सन्नेतत्त्रयम् ।तदेतदमृतँ सत्येन छन्नम् ।प्राणो वा अमृतं नामरूपे सत्यं ताभ्यामयं प्राणश्छन्नः ॥ ॥ इति बृहदारण्यकोपनिषदि प्रथमोऽध्यायः॥ 1.6.3 ॥

atha karmaṇāmātmetyetadeṣāmukthamato hi sarvāṇi karmāṇyuttiṣṭhantyetadeṣām̐ sāmaitaddhi sarvaiḥ karmabhiḥ samaṃ etadeṣāṃ brahmaitaddhi sarvāṇi karmāṇi bibharti | tadetattrayam̐ sadekamayamātmā''tmo ekaḥ sannetattrayam | tadetadamṛtam̐ satyena channam | prāṇo vā amṛtaṃ nāmarūpe satyaṃ tābhyāmayaṃ prāṇaśchannaḥ || || iti bṛhadāraṇyakopaniṣadi prathamo'dhyāyaḥ