Parva 3, Adhyāya 12

नारायणस्य नाभिकमलस्य दलेषु समस्तानां लोकानां कल्पनं अथ योगविदां श्रेष्ठं सर्वभूतमनोमयम् ॥ स्रष्टारं सर्वभूतानां ब्रह्माणं सर्वतोमुखम्॥ 1 ॥

nārāyaṇasya nābhikamalasya daleṣu samastānāṃ lokānāṃ kalpanaṃ atha yogavidāṃ śreṣṭhaṃ sarvabhūtamanomayam || sraṣṭāraṃ sarvabhūtānāṃ brahmāṇaṃ sarvatomukham

तस्मिन् हिरण्मये पद्मे बहुयोजनविस्तृते ।सर्वतेजोगुणमये पार्थिवैलक्षणैर्युते॥ 2 ॥

tasmin hiraṇmaye padme bahuyojanavistṛte | sarvatejoguṇamaye pārthivailakṣaṇairyute

तच्च पद्मं पुराणज्ञाः पृथिवीरुहमुत्तमम् ॥ नारायणाङ्गसम्भूतं प्रवदन्ति महर्षयः॥ 3 ॥

tacca padmaṃ purāṇajñāḥ pṛthivīruhamuttamam || nārāyaṇāṅgasambhūtaṃ pravadanti maharṣayaḥ

या तु पद्मासना देवी पृथिवीं ताँ प्रचक्षते ।ये गर्भसाराङ्कुरतस्तान् दिव्यान् पर्वतान् विदुः॥ 4 ॥

yā tu padmāsanā devī pṛthivīṃ tā~ pracakṣate | ye garbhasārāṅkuratastān divyān parvatān viduḥ

हिमवन्तं च मेरुं च नीलं निषधमेव च ।कैलासं मुञ्जवन्तं च तथाद्रिं गन्धमादनम्॥ 5 ॥

himavantaṃ ca meruṃ ca nīlaṃ niṣadhameva ca | kailāsaṃ muñjavantaṃ ca tathādriṃ gandhamādanam

पुण्यं त्रिशिखरं चैव कान्तं मन्दरमेव च ॥ उदयं कन्दरं चैव विन्ध्यमस्तं च पर्वतम्॥ 6 ॥

puṇyaṃ triśikharaṃ caiva kāntaṃ mandarameva ca || udayaṃ kandaraṃ caiva vindhyamastaṃ ca parvatam

एते देवगणानां च सिद्धानां च महात्मनाम् ।आश्रमाः पुण्यशीलानां सर्वकामयुताद्रयः॥ 7 ॥

ete devagaṇānāṃ ca siddhānāṃ ca mahātmanām | āśramāḥ puṇyaśīlānāṃ sarvakāmayutādrayaḥ

एतेषामन्तरो देशो जम्बूद्वीप इति स्मृतः ।जम्बूद्वीपस्य सङ्ख्यानं याज्ञिया यत्र चक्रिरे॥ 8 ॥

eteṣāmantaro deśo jambūdvīpa iti smṛtaḥ | jambūdvīpasya saṅkhyānaṃ yājñiyā yatra cakrire

गर्भाद् यत् स्रवते तोयं देवामृतरसोपमम् ।दिव्यतीर्थशतापाङ्ग्यस्ता दिव्याः सरितः स्मृताः॥ 9 ॥

garbhād yat sravate toyaṃ devāmṛtarasopamam | divyatīrthaśatāpāṅgyastā divyāḥ saritaḥ smṛtāḥ

यान्येतानि तु पद्मस्य केसराणि समन्ततः ।असङ्ख्याताः पृथिव्यां तु विश्वे ते धातुपर्वताः॥ 10 ॥

yānyetāni tu padmasya kesarāṇi samantataḥ | asaṅkhyātāḥ pṛthivyāṃ tu viśve te dhātuparvatāḥ

यानि पद्मस्य पत्राणि भूरीण्यूर्ध्वं नराधिप ।ते दुर्गमाः शैलचिता म्लेच्छदेशा विकल्पिताः॥ 11 ॥

yāni padmasya patrāṇi bhūrīṇyūrdhvaṃ narādhipa | te durgamāḥ śailacitā mlecchadeśā vikalpitāḥ

यान्यधः पद्मपत्राणि वासार्थे तानि भागशः ।दैत्यानामुरगाणां च पातालं तन्महात्मनाम्॥ 12 ॥

yānyadhaḥ padmapatrāṇi vāsārthe tāni bhāgaśaḥ | daityānāmuragāṇāṃ ca pātālaṃ tanmahātmanām

तेषामधोगतं यत्तदुदकेत्यभिसंज्ञितम् ।महापातककर्माणो मज्जन्ते यत्र मानवाः॥ 13 ॥

teṣāmadhogataṃ yattadudaketyabhisaṃjñitam | mahāpātakakarmāṇo majjante yatra mānavāḥ

पद्मस्यान्ते कुशं यत्तदेकार्णवजलं महत् ।प्रोक्तास्ते दिक्षु सङ्घाताश्चत्वारो जलसागराः॥ 14 ॥

padmasyānte kuśaṃ yattadekārṇavajalaṃ mahat | proktāste dikṣu saṅghātāścatvāro jalasāgarāḥ

ऋषेर्नारायणस्यायं महापुष्करसम्भवः ॥ प्रादुर्भावोऽप्ययं तस्मान्नाम्ना पुष्करसम्भवः॥ 15 ॥

ṛṣernārāyaṇasyāyaṃ mahāpuṣkarasambhavaḥ || prādurbhāvo'pyayaṃ tasmānnāmnā puṣkarasambhavaḥ

एतस्मात् कारणात् तज्ज्ञैः पुराणैः परमर्षिभिः ।यज्ञियैर्वेददृष्टार्थैर्यज्ञे पद्मचिती कृतः॥ 16 ॥

etasmāt kāraṇāt tajjñaiḥ purāṇaiḥ paramarṣibhiḥ | yajñiyairvedadṛṣṭārthairyajñe padmacitī kṛtaḥ

एवं भगवता पद्मे विश्वस्य परमो विधिः ।पर्वतानां नदीनां च देशानां च विनिर्मितः॥ 17 ॥

evaṃ bhagavatā padme viśvasya paramo vidhiḥ | parvatānāṃ nadīnāṃ ca deśānāṃ ca vinirmitaḥ

विभुस्तथैवाप्रतिमप्रभावः प्रभाकरो वै भगवान् महात्मा ।स्वयं स्वयम्भूः शयनेऽसृजत् तदा जगन्मयं पद्मनिधिं महार्णवे॥ 18 ॥

vibhustathaivāpratimaprabhāvaḥ prabhākaro vai bhagavān mahātmā | svayaṃ svayambhūḥ śayane'sṛjat tadā jaganmayaṃ padmanidhiṃ mahārṇave