Parva 3, Adhyāya 87

भगवता श्रीकृष्णेन महादेवस्य स्तुतिः एवं बहुविधैर्भूतैः पिशाचैरुरगैः सह ।आगत्य भगवान् रुद्रः शङ्करो वृषवाहनः॥ 1 ॥

bhagavatā śrīkṛṣṇena mahādevasya stutiḥ evaṃ bahuvidhairbhūtaiḥ piśācairuragaiḥ saha | āgatya bhagavān rudraḥ śaṅkaro vṛṣavāhanaḥ

ददर्श विष्णुं देवेशं तपन्तं तप उत्तमम् ।जुह्वानमग्निं विधिवद् द्रव्यैर्मेध्यैर्जगत्पतिम्॥ 2 ॥

dadarśa viṣṇuṃ deveśaṃ tapantaṃ tapa uttamam | juhvānamagniṃ vidhivad dravyairmedhyairjagatpatim

गरुडाहृतकाष्ठं तु जटिलं चीरवाससम् ।चक्रेणानीतकुसुमं खड्गानीतकुशं तथा॥ 3 ॥

garuḍāhṛtakāṣṭhaṃ tu jaṭilaṃ cīravāsasam | cakreṇānītakusumaṃ khaḍgānītakuśaṃ tathā

गदाकृतसमाचारं देवदेवं जनार्दनम् ।इन्द्राद्यैर्देवसङ्घैश्च वृतं मुनिगणैः सह॥ 4 ॥

gadākṛtasamācāraṃ devadevaṃ janārdanam | indrādyairdevasaṅghaiśca vṛtaṃ munigaṇaiḥ saha

अचिन्त्यं सर्वभूतानां ध्यायन्तं किमपि प्रभुम् ।अवरुह्य वृषाच्छर्वो भगवान् भूतभावनः॥ 5 ॥

acintyaṃ sarvabhūtānāṃ dhyāyantaṃ kimapi prabhum | avaruhya vṛṣāccharvo bhagavān bhūtabhāvanaḥ

ततः प्रीतः प्रसन्नात्मा ललाटाक्ष उमापतिः ।ततो भूतपिशाचाश्च राक्षसा गुह्यकास्तथा॥ 6 ॥

tataḥ prītaḥ prasannātmā lalāṭākṣa umāpatiḥ | tato bhūtapiśācāśca rākṣasā guhyakāstathā

मुनयो विप्रवर्याश्च जयशब्दं प्रचक्रिरे ।जय देव जगन्नाथ जय रुद्र जनार्दन॥ 7 ॥

munayo vipravaryāśca jayaśabdaṃ pracakrire | jaya deva jagannātha jaya rudra janārdana

जय विष्णो हृषीकेश नारायण परायण ।जय रुद्र पुराणात्मञ्जय देव हरेश्वर॥ 8 ॥

jaya viṣṇo hṛṣīkeśa nārāyaṇa parāyaṇa | jaya rudra purāṇātmañjaya deva hareśvara

आदिदेव जगन्नाथ जय शङ्कर भावन ।जय कौस्तुभदीप्ताङ्ग जय भस्मविराजित॥ 9 ॥

ādideva jagannātha jaya śaṅkara bhāvana | jaya kaustubhadīptāṅga jaya bhasmavirājita

जय चक्रगदापाणे जय शूलिंस्त्रिलोचन ।जय मौक्तिकदीप्ताङ्ग जय नागविभूषण॥ 10 ॥

jaya cakragadāpāṇe jaya śūliṃstrilocana | jaya mauktikadīptāṅga jaya nāgavibhūṣaṇa

इति ते मुनयः सर्वे प्रणामं चक्रिरे हरिम् ।तत उत्थाय भगवान् दृष्ट्वा देवमवस्थितम्॥ 11 ॥

iti te munayaḥ sarve praṇāmaṃ cakrire harim | tata utthāya bhagavān dṛṣṭvā devamavasthitam

वृषध्वजं विरूपाक्षं शङ्करं नीललोहितम् ।ततो हृष्टमना विष्णुस्तुष्टाव हरमीश्वरम्॥ 12 ॥

vṛṣadhvajaṃ virūpākṣaṃ śaṅkaraṃ nīlalohitam | tato hṛṣṭamanā viṣṇustuṣṭāva haramīśvaram

नमस्ते शितिकण्ठाय नीलग्रीवाय वेधसे ।नमस्ते शोचिषे अस्तु नमस्ते उपवासिने॥ 13 ॥

namaste śitikaṇṭhāya nīlagrīvāya vedhase | namaste śociṣe astu namaste upavāsine

नमस्ते मीढुषे अस्तु नमस्ते गदिने हर ।नमस्ते विश्वतनवे वृषाय वृषरूपिणे॥ 14 ॥

namaste mīḍhuṣe astu namaste gadine hara | namaste viśvatanave vṛṣāya vṛṣarūpiṇe

अमूर्ताय च देवाय नमन्तेऽस्तु पिनाकिने ।नमः कुब्जाय कूपाय शिवाय शिवरूपिणे॥ 15 ॥

amūrtāya ca devāya namante'stu pinākine | namaḥ kubjāya kūpāya śivāya śivarūpiṇe

नमस्तुष्टाय तुण्डाय नमस्तुटितुटाय च ।नमः शिवाय शान्ताय गिरिशाय च ते नमः॥ 16 ॥

namastuṣṭāya tuṇḍāya namastuṭituṭāya ca | namaḥ śivāya śāntāya giriśāya ca te namaḥ

नमो हराय हिप्राय नमो हरिहराय च ।नमोऽघोराय घोराय घोराघोरप्रियाय च॥ 17 ॥

namo harāya hiprāya namo hariharāya ca | namo'ghorāya ghorāya ghorāghorapriyāya ca

नमोऽघण्टाय घण्टाय नमो घटिघटाय च ।नमः शिवाय शान्ताय गिरिशाय च ते नमः॥ 18 ॥

namo'ghaṇṭāya ghaṇṭāya namo ghaṭighaṭāya ca | namaḥ śivāya śāntāya giriśāya ca te namaḥ

नमो विरूपरूपाय पुराय पुरहारिणे ।नम आद्याय बीजाय शुचयेऽष्टस्वरूपिणे॥ 19 ॥

namo virūparūpāya purāya purahāriṇe | nama ādyāya bījāya śucaye'ṣṭasvarūpiṇe

नमः पिनाकहस्ताय नमः शूलासिधारिणे ।नमः खट्वाङ्गहस्ताय नमस्ते कृत्तिवाससे॥ 20 ॥

namaḥ pinākahastāya namaḥ śūlāsidhāriṇe | namaḥ khaṭvāṅgahastāya namaste kṛttivāsase

नमस्ते देवदेवाय नम आकाशमूर्तये ।हराय हरिरूपाय नमस्ते तिग्मतेजसे॥ 21 ॥

namaste devadevāya nama ākāśamūrtaye | harāya harirūpāya namaste tigmatejase

भक्तप्रियाय भक्ताय भक्तानां वरदायिने ।नमोऽभ्रमूर्तये देव जगन्मूर्तिधराय च॥ 22 ॥

bhaktapriyāya bhaktāya bhaktānāṃ varadāyine | namo'bhramūrtaye deva jaganmūrtidharāya ca

नमश्चन्द्राय देवाय सूर्याय च नमो नमः ॥ नमः प्रधानदेवाय भूतानां पतये नमः॥ 23 ॥

namaścandrāya devāya sūryāya ca namo namaḥ || namaḥ pradhānadevāya bhūtānāṃ pataye namaḥ

करालाय च मुण्डाय विकृताय कपर्दिने ।अजाय च नमस्तुभ्यं भूतभावनभावन॥ 24 ॥

karālāya ca muṇḍāya vikṛtāya kapardine | ajāya ca namastubhyaṃ bhūtabhāvanabhāvana

नमोऽस्तु हरिकेशाय पिङ्गलाय नमो नमः ।नमस्तेऽभीषुहस्ताय भीरुभीरुहराय च॥ 25 ॥

namo'stu harikeśāya piṅgalāya namo namaḥ | namaste'bhīṣuhastāya bhīrubhīruharāya ca

हराय भीतिरूपाय घोराणां भीतिदायिने ॥ नमो दक्षमखघ्नाय भगनेत्रापहारिणे॥ 26 ॥

harāya bhītirūpāya ghorāṇāṃ bhītidāyine || namo dakṣamakhaghnāya bhaganetrāpahāriṇe

उमापते नमस्तुभ्यं कैलासनिलयाय च ।आदिदेवाय देवाय भवाय भवरूपिणे॥ 27 ॥

umāpate namastubhyaṃ kailāsanilayāya ca | ādidevāya devāya bhavāya bhavarūpiṇe

नमः कपालहस्ताय नमोऽजमथनाय च ।त्र्यम्बकाय नमस्तुभ्यं त्र्यक्षाय च शिवाय च॥ 28 ॥

namaḥ kapālahastāya namo'jamathanāya ca | tryambakāya namastubhyaṃ tryakṣāya ca śivāya ca

वरदाय वरेण्याय नमस्ते चन्द्रशेखर ।नम इध्माय हविषे ध्रुवाय च कृशाय च॥ 29 ॥

varadāya vareṇyāya namaste candraśekhara | nama idhmāya haviṣe dhruvāya ca kṛśāya ca

नमस्ते शक्तियुक्ताय नागपाशप्रियाय च ।विरूपाय सुरूपाय भद्रपानप्रियाय च॥ 30 ॥

namaste śaktiyuktāya nāgapāśapriyāya ca | virūpāya surūpāya bhadrapānapriyāya ca

श्मशानरतये नित्यं जयशब्दप्रियाय च ।स्वरप्रियाय खर्वाय खराय खररूपिणे॥ 31 ॥

śmaśānarataye nityaṃ jayaśabdapriyāya ca | svarapriyāya kharvāya kharāya khararūpiṇe

भद्रप्रियाय भद्राय भद्ररूपधराय च ।विरूपाय सुरूपाय महाघोराय ते नमः॥ 32 ॥

bhadrapriyāya bhadrāya bhadrarūpadharāya ca | virūpāya surūpāya mahāghorāya te namaḥ

घण्टाय घण्टभूषाय घण्टभूषणभूषिणे ।तीव्राय तीव्ररूपाय तीव्ररूपप्रियाय च॥ 33 ॥

ghaṇṭāya ghaṇṭabhūṣāya ghaṇṭabhūṣaṇabhūṣiṇe | tīvrāya tīvrarūpāya tīvrarūpapriyāya ca

नग्नाय नग्नरूपाय नग्नरूपप्रियाय च ।भूतावास नमस्तुभ्यं सर्वावास नमो नमः॥ 34 ॥

nagnāya nagnarūpāya nagnarūpapriyāya ca | bhūtāvāsa namastubhyaṃ sarvāvāsa namo namaḥ

नमः सर्वात्मने तुभ्यं नमस्ते भूतिदायक ।नमस्ते वामदेवाय महादेवाय ते नमः॥ 35 ॥

namaḥ sarvātmane tubhyaṃ namaste bhūtidāyaka | namaste vāmadevāya mahādevāya te namaḥ

का नु वाक्स्तुतिरूपा ते को नु स्तोतुं प्रशक्नुयात् ।कस्य वा स्फुरते जिह्वा स्तुतौ स्तुतिमतां वर॥ 36 ॥

kā nu vākstutirūpā te ko nu stotuṃ praśaknuyāt | kasya vā sphurate jihvā stutau stutimatāṃ vara

क्षमस्व भगवन् देव भक्तोऽहं त्राहि मां हर ।सर्वात्मन् सर्वभूतेश त्राहि मां सततं हर॥ 37 ॥

kṣamasva bhagavan deva bhakto'haṃ trāhi māṃ hara | sarvātman sarvabhūteśa trāhi māṃ satataṃ hara

रक्ष देव जगन्नाथ लोकान् सर्वात्मना हर ।त्राहि भक्तान् सदा देव भक्तप्रिय सदा हर॥ 38 ॥

rakṣa deva jagannātha lokān sarvātmanā hara | trāhi bhaktān sadā deva bhaktapriya sadā hara