पद १३७

जौपै कृपा रघुपति कृपालुकी, बैर औरके कहा सरै ।होइ न बाँको बार भगतको, जो कोउ कोटि उपाय करै॥ 1 ॥

jaupai kṛpā raghupati kṛpālukī, baira aurake kahā sarai | hoi na bā~ko bāra bhagatako, jo kou koṭi upāya karai

तकै नीचु जो मीचु साधुकी, सो पामर तेहि मीचु मरै ।बेद-बिदित प्रहलाद-कथा सुनि, को न भगति-पथ पाउँ धरै॥ 2 ॥

takai nīcu jo mīcu sādhukī, so pāmara tehi mīcu marai | beda-bidita prahalāda-kathā suni, ko na bhagati-patha pāu~ dharai

गज उधारि हरि थप्यो बिभीषन, ध्रुव अबिचल कबहूँ न टरै ।अंबरीष की साप सुरति करि, अजहुँ महामुनि ग्लानि गरै॥ 3 ॥

gaja udhāri hari thapyo bibhīṣana, dhruva abicala kabahū~ na ṭarai | aṃbarīṣa kī sāpa surati kari, ajahu~ mahāmuni glāni garai

सौं धौं कहा जु न कियो सुजोधन, अबुध आपने मान जरै ।प्रभु-प्रसाद सौभाग्य बिजय-जस, पांडवनै बरिआइ बरै॥ 4 ॥

sauṃ dhauṃ kahā ju na kiyo sujodhana, abudha āpane māna jarai | prabhu-prasāda saubhāgya bijaya-jasa, pāṃḍavanai bariāi barai

जोइ जोइ कूप खनैगो परकहँ, सो सठ फिरि तेहि कूप परै ।सपनेहुँ सुख न संतद्रोहीकहँ, सुरतरु सोउ बिष-फरनि फरै॥ 5 ॥

joi joi kūpa khanaigo parakaha~, so saṭha phiri tehi kūpa parai | sapanehu~ sukha na saṃtadrohīkaha~, surataru sou biṣa-pharani pharai

हैं काके द्वै सीस ईसके जो हठि जनकी सीवँ चरै ।तुलसिदास रघुबीर-बाहुबल सदा अभय काहू न डरै॥ 6 ॥

haiṃ kāke dvai sīsa īsake jo haṭhi janakī sīva~ carai | tulasidāsa raghubīra-bāhubala sadā abhaya kāhū na ḍarai