पद १३९

दीनदयालु, दुरित दारिद दुख दुनी दुसह तिहुँ ताप तई है ।देव दुवार पुकारत आरत, सबकी सब सुख हानि भई है॥ 1 ॥

dīnadayālu, durita dārida dukha dunī dusaha tihu~ tāpa taī hai | deva duvāra pukārata ārata, sabakī saba sukha hāni bhaī hai

प्रभुके बचन, बेद-बुध-सम्मत, 'मम मूरति महिदेवमई है' ।तिनकी मति रिस-राग-मोह-मद, लोभ लालची लीलि लई है॥ 2 ॥

prabhuke bacana, beda-budha-sammata, 'mama mūrati mahidevamaī hai' | tinakī mati risa-rāga-moha-mada, lobha lālacī līli laī hai

राज-समाज कुसाज कोटि कटु कलपित कलुष कुचाल नई है ।नीति, प्रतीति, प्रीति परमित पति हेतुवाद हठि हेरि हई है॥ 3 ॥

rāja-samāja kusāja koṭi kaṭu kalapita kaluṣa kucāla naī hai | nīti, pratīti, prīti paramita pati hetuvāda haṭhi heri haī hai

आश्रम-बरन-धरम-बिरहित जग, लोक-बेद-मरजाद गई है ।प्रजा पतित, पाखंड-पापरत, अपने अपने रंग रई है॥ 4 ॥

āśrama-barana-dharama-birahita jaga, loka-beda-marajāda gaī hai | prajā patita, pākhaṃḍa-pāparata, apane apane raṃga raī hai

सांति, सत्य, सुभ, रीति गई घटि, बढ़ी कुरीति, कपट-कलई है ।सीदत साधु, साधुता सोचति, खल बिलसत, हुलसति खलई है॥ 5 ॥

sāṃti, satya, subha, rīti gaī ghaṭi, baḍha़ī kurīti, kapaṭa-kalaī hai | sīdata sādhu, sādhutā socati, khala bilasata, hulasati khalaī hai

परमारथ स्वारथ, साधन भये अफल, सफल नहिं सिद्धि सई है ।कामधेनु-धरनी कलि-गोमर-बिवस बिकल जामति न बई है॥ 6 ॥

paramāratha svāratha, sādhana bhaye aphala, saphala nahiṃ siddhi saī hai | kāmadhenu-dharanī kali-gomara-bivasa bikala jāmati na baī hai

कलि-करनी बरनिये कहाँ लौं, करत फिरत बिनु टहल टई है ।तापर दाँत पीसि कर मीजत, को जानै चित कहा ठई है॥ 7 ॥

kali-karanī baraniye kahā~ lauṃ, karata phirata binu ṭahala ṭaī hai | tāpara dā~ta pīsi kara mījata, ko jānai cita kahā ṭhaī hai

त्यों त्यों नीच चढ़त सिर ऊपर, ज्यों ज्यों सीलबस ढील दई है ।सरुष बरजि तरजिये तरज्जनी, कुम्हिलैहैं कुम्हड़ेकी जई है॥ 8 ॥

tyoṃ tyoṃ nīca caḍha़ta sira ūpara, jyoṃ jyoṃ sīlabasa ḍhīla daī hai | saruṣa baraji tarajiye tarajjanī, kumhilaihaiṃ kumhaḍa़ekī jaī hai

दीजै दादि देखि ना तौ बलि, मही मोद-मंगल रितई है ।भरे भाग अनुराग लोग कहैं, राम कृपा-चितवनि चितई है॥ 9 ॥

dījai dādi dekhi nā tau bali, mahī moda-maṃgala ritaī hai | bhare bhāga anurāga loga kahaiṃ, rāma kṛpā-citavani citaī hai

बिनती सुनि सानंद हेरि हँसि, करुना-बारि भूमि सिजई है ।राम-राज भयो काज, सगुन सुभ, राजा राम जगत-बिजई है॥ 10 ॥

binatī suni sānaṃda heri ha~si, karunā-bāri bhūmi sijaī hai | rāma-rāja bhayo kāja, saguna subha, rājā rāma jagata-bijaī hai

समरथ बड़ो, सुजान सुसाहब, सुकृत-सैन हारत जितई है ।सुजन सुभाव सराहत सादर, अनायास साँसति बितई है॥ 11 ॥

samaratha baḍa़o, sujāna susāhaba, sukṛta-saina hārata jitaī hai | sujana subhāva sarāhata sādara, anāyāsa sā~sati bitaī hai

उथपे थपन, उजारि बसावन, गई बहोरि बिरद सदई है ।तुलसी प्रभु आरत-आरतिहर, अभयबाँह केहि केहि न दई है॥ 12 ॥

uthape thapana, ujāri basāvana, gaī bahori birada sadaī hai | tulasī prabhu ārata-āratihara, abhayabā~ha kehi kehi na daī hai