पद २०३

श्रीहरि-गुरु-पद-कमल भजहु मन तजि अभिमान ।जेहि सेवत पाइय हरि सुख-निधान भगवान॥ 1 ॥

śrīhari-guru-pada-kamala bhajahu mana taji abhimāna | jehi sevata pāiya hari sukha-nidhāna bhagavāna

परिवा प्रथम प्रेम बिनु राम-मिलन अति दूरि ।जद्यपि निकट हृदय निज रहे सकल भरिपूरि॥ 2 ॥

parivā prathama prema binu rāma-milana ati dūri | jadyapi nikaṭa hṛdaya nija rahe sakala bharipūri

दुइज द्वैत-मति छाड़ि चरहि महि-मंडल धीर ।बिगत मोह-माया-मद हृदय बसत रघुबीर॥ 3 ॥

duija dvaita-mati chāḍa़i carahi mahi-maṃḍala dhīra | bigata moha-māyā-mada hṛdaya basata raghubīra

तीज त्रिगुन-पर परम पुरुष श्रीरमन मुकुंद ।गुन सुभाव त्यागे बिनु दुरलभ परमानंद॥ 4 ॥

tīja triguna-para parama puruṣa śrīramana mukuṃda | guna subhāva tyāge binu duralabha paramānaṃda

चौथि चारि परिहरहु बुद्धि-मन-चित-अहँकार ।बिमल बिचार परमपद निज सुख सहज उदार॥ 5 ॥

cauthi cāri pariharahu buddhi-mana-cita-aha~kāra | bimala bicāra paramapada nija sukha sahaja udāra

पाँचइ पाँच परस, रस, सब्द, गंध अरु रूप ।इन्ह कर कहा न कीजिये, बहुरि परब भव-कूप॥ 6 ॥

pā~cai pā~ca parasa, rasa, sabda, gaṃdha aru rūpa | inha kara kahā na kījiye, bahuri paraba bhava-kūpa

छठ षट्‍बरग करिय जय जनकसुता-पति लागि ।रघुपति-कृपा-बारि बिनु नहिं बुताइ लोभागि॥ 7 ॥

chaṭha ṣaṭ‍baraga kariya jaya janakasutā-pati lāgi | raghupati-kṛpā-bāri binu nahiṃ butāi lobhāgi

सातैं सप्तधातु-निरमित तनु करिय बिचार ।तेहि तनु केर एक फल, कीजै पर-उपकार॥ 8 ॥

sātaiṃ saptadhātu-niramita tanu kariya bicāra | tehi tanu kera eka phala, kījai para-upakāra

आठइँ आठ प्रकृति-पर निरबिकार श्रीराम ।केहि प्रकार पाइय हरि, हृदय बसहिं बहु काम॥ 9 ॥

āṭhai~ āṭha prakṛti-para nirabikāra śrīrāma | kehi prakāra pāiya hari, hṛdaya basahiṃ bahu kāma

नवमी नवद्वार-पुर बसि जेहि न आपु भल कीन्ह ।ते नर जोनि अनेक भ्रमत दारुन दुख लीन्ह॥ 10 ॥

navamī navadvāra-pura basi jehi na āpu bhala kīnha | te nara joni aneka bhramata dāruna dukha līnha

दसइँ दसहु कर संजम जो न करिय जिय जानि ।साधन बृथा होइ सब मिलहिं न सारँगपानि॥ 11 ॥

dasai~ dasahu kara saṃjama jo na kariya jiya jāni | sādhana bṛthā hoi saba milahiṃ na sāra~gapāni

एकादसी एक मन बस कै सेवहु जाइ ।सोइ ब्रत कर फल पावै आवागमन नसाइ॥ 12 ॥

ekādasī eka mana basa kai sevahu jāi | soi brata kara phala pāvai āvāgamana nasāi

द्वादसि दान देहु अस, अभय होइ त्रैलोक ।परहित-निरत सो पारन बहुरि न ब्यापत सोक॥ 13 ॥

dvādasi dāna dehu asa, abhaya hoi trailoka | parahita-nirata so pārana bahuri na byāpata soka

तेरसि तीन अवस्था तजहु, भजहु भगवंत ।मन-क्रम-बचन-अगोचर, ब्यापक, ब्याप्य, अनंत॥ 14 ॥

terasi tīna avasthā tajahu, bhajahu bhagavaṃta | mana-krama-bacana-agocara, byāpaka, byāpya, anaṃta

चौदसि चौदह भुवन अचर-चर-रूप गोपाल ।भेद गये बिनु रघुपति अति न हरहिं जग-जाल॥ 15 ॥

caudasi caudaha bhuvana acara-cara-rūpa gopāla | bheda gaye binu raghupati ati na harahiṃ jaga-jāla

पूनौं प्रेम-भगति-रस हरि-रस जानहिं दास ।सम, सीतल, गत-मान, ग्यानरत, बिषय-उदास॥ 16 ॥

pūnauṃ prema-bhagati-rasa hari-rasa jānahiṃ dāsa | sama, sītala, gata-māna, gyānarata, biṣaya-udāsa

त्रिबिध सूल होलिय जरै, खेलिय अब फागु ।जो जिय चहसि परमसुख, तौ यहि मारग लागु॥ 17 ॥

tribidha sūla holiya jarai, kheliya aba phāgu | jo jiya cahasi paramasukha, tau yahi māraga lāgu

श्रुति-पुरान-बुध-संमत चाँचरि चरित मुरारि ।करि बिचार भव तरिय, परिय न कबहुँ जमधारि॥ 18 ॥

śruti-purāna-budha-saṃmata cā~cari carita murāri | kari bicāra bhava tariya, pariya na kabahu~ jamadhāri

संसय-समन, दमन दुख, सुखनिधान हरि एक ।साधु-कृपा बिनु मिलहिं न, करिय उपाय अनेक॥ 19 ॥

saṃsaya-samana, damana dukha, sukhanidhāna hari eka | sādhu-kṛpā binu milahiṃ na, kariya upāya aneka

भवसागर कहँ नाव सुद्ध संतनके चरन ।तुलसिदास प्रयास बिनु मिलहिं राम दुखहरन॥ 20 ॥

bhavasāgara kaha~ nāva suddha saṃtanake carana | tulasidāsa prayāsa binu milahiṃ rāma dukhaharana