Skandha 10, Adhyāya 32

रुरुदुः सुस्वरं राजन् कृष्णदर्शनलालसाः॥ 1 ॥

ruruduḥ susvaraṃ rājan kṛṣṇadarśanalālasāḥ

तासामाविरभूच्छौरिः स्मयमानमुखाम्बुजः ।पीताम्बरधरः स्रग्वी साक्षान्मन्मथमन्मथः॥ 2 ॥

tāsāmāvirabhūcchauriḥ smayamānamukhāmbujaḥ | pītāmbaradharaḥ sragvī sākṣānmanmathamanmathaḥ

तं विलोक्यागतं प्रेष्ठं प्रीत्युत्फुल्लदृशोऽबलाः ।उत्तस्थुर्युगपत्सर्वास्तन्वः प्राणमिवागतम्॥ 3 ॥

taṃ vilokyāgataṃ preṣṭhaṃ prītyutphulladṛśo'balāḥ | uttasthuryugapatsarvāstanvaḥ prāṇamivāgatam

काचित्कराम्बुजं शौरेर्जगृहेऽञ्जलिना मुदा ।काचिद्दधार तद्बाहुमंसे चन्दनरूषितम्॥ 4 ॥

kācitkarāmbujaṃ śaurerjagṛhe'ñjalinā mudā | kāciddadhāra tadbāhumaṃse candanarūṣitam

काचिदञ्जलिनागृह्णात्तन्वी ताम्बूलचर्वितम् ।एका तदङ्घ्रिकमलं सन्तप्ता स्तनयोरधात्॥ 5 ॥

kācidañjalināgṛhṇāttanvī tāmbūlacarvitam | ekā tadaṅghrikamalaṃ santaptā stanayoradhāt

एका भ्रुकुटिमाबध्य प्रेमसंरम्भविह्वला ।घ्नन्तीवैक्षत्कटाक्षेपैः सन्दष्टदशनच्छदा॥ 6 ॥

ekā bhrukuṭimābadhya premasaṃrambhavihvalā | ghnantīvaikṣatkaṭākṣepaiḥ sandaṣṭadaśanacchadā

अपरानिमिषद्दृग्भ्यां जुषाणा तन्मुखाम्बुजम् ।आपीतमपि नातृप्यत्सन्तस्तच्चरणं यथा॥ 7 ॥

aparānimiṣaddṛgbhyāṃ juṣāṇā tanmukhāmbujam | āpītamapi nātṛpyatsantastaccaraṇaṃ yathā

तं काचिन्नेत्ररन्ध्रेण हृदिकृत्य निमील्य च ।पुलकाङ्ग्युपगुह्यास्ते योगीवानन्दसम्प्लुता॥ 8 ॥

taṃ kācinnetrarandhreṇa hṛdikṛtya nimīlya ca | pulakāṅgyupaguhyāste yogīvānandasamplutā

सर्वास्ताः केशवालोकपरमोत्सवनिर्वृताः ।जहुर्विरहजं तापं प्राज्ञं प्राप्य यथा जनाः॥ 9 ॥

sarvāstāḥ keśavālokaparamotsavanirvṛtāḥ | jahurvirahajaṃ tāpaṃ prājñaṃ prāpya yathā janāḥ

ताभिर्विधूतशोकाभिर्भगवानच्युतो वृतः ।व्यरोचताधिकं तात पुरुषः शक्तिभिर्यथा॥ 10 ॥

tābhirvidhūtaśokābhirbhagavānacyuto vṛtaḥ | vyarocatādhikaṃ tāta puruṣaḥ śaktibhiryathā

ताः समादाय कालिन्द्या निर्विश्य पुलिनं विभुः ।विकसत्कुन्दमन्दारसुरभ्यनिलषट्पदम्॥ 11 ॥

tāḥ samādāya kālindyā nirviśya pulinaṃ vibhuḥ | vikasatkundamandārasurabhyanilaṣaṭpadam

शरच्चन्द्रांशुसन्दोहध्वस्तदोषातमः शिवम् ।कृष्णाया हस्ततरलाचितकोमलवालुकम्॥ 12 ॥

śaraccandrāṃśusandohadhvastadoṣātamaḥ śivam | kṛṣṇāyā hastataralācitakomalavālukam

तद्दर्शनाह्लादविधूतहृद्रुजो मनोरथान्तं श्रुतयो यथा ययुः ।स्वैरुत्तरीयैः कुचकुङ्कुमाङ्कितै- रचीकॢपन्नासनमात्मबन्धवे॥ 13 ॥

taddarśanāhlādavidhūtahṛdrujo manorathāntaṃ śrutayo yathā yayuḥ | svairuttarīyaiḥ kucakuṅkumāṅkitai- racīkḷpannāsanamātmabandhave

तत्रोपविष्टो भगवान् स ईश्वरो योगेश्वरान्तर्हृदि कल्पितासनः ।चकास गोपीपरिषद्गतोऽर्चित- स्त्रैलोक्यलक्ष्म्येकपदं वपुर्दधत्॥ 14 ॥

tatropaviṣṭo bhagavān sa īśvaro yogeśvarāntarhṛdi kalpitāsanaḥ | cakāsa gopīpariṣadgato'rcita- strailokyalakṣmyekapadaṃ vapurdadhat

सभाजयित्वा तमनङ्गदीपनं सहासलीलेक्षणविभ्रमभ्रुवा ।संस्पर्शनेनाङ्ककृताङ्घ्रिहस्तयोः संस्तुत्य ईषत्कुपिता बभाषिरे॥ 15 ॥

sabhājayitvā tamanaṅgadīpanaṃ sahāsalīlekṣaṇavibhramabhruvā | saṃsparśanenāṅkakṛtāṅghrihastayoḥ saṃstutya īṣatkupitā babhāṣire

भजतोऽनुभजन्त्येक एक एतद्विपर्ययम् ।नोभयांश्च भजन्त्येक एतन्नो ब्रूहि साधु भोः॥ 16 ॥

bhajato'nubhajantyeka eka etadviparyayam | nobhayāṃśca bhajantyeka etanno brūhi sādhu bhoḥ

मिथो भजन्ति ये सख्यः स्वार्थैकान्तोद्यमा हि ते ।न तत्र सौहृदं धर्मः स्वार्थार्थं तद्धि नान्यथा॥ 17 ॥

mitho bhajanti ye sakhyaḥ svārthaikāntodyamā hi te | na tatra sauhṛdaṃ dharmaḥ svārthārthaṃ taddhi nānyathā

भजन्त्यभजतो ये वै करुणाः पितरौ यथा ।धर्मो निरपवादोऽत्र सौहृदं च सुमध्यमाः॥ 28 ॥

bhajantyabhajato ye vai karuṇāḥ pitarau yathā | dharmo nirapavādo'tra sauhṛdaṃ ca sumadhyamāḥ

भजतोऽपि न वै केचिद्भजन्त्यभजतः कुतः ।आत्मारामा ह्याप्तकामा अकृतज्ञा गुरुद्रुहः॥ 19 ॥

bhajato'pi na vai kecidbhajantyabhajataḥ kutaḥ | ātmārāmā hyāptakāmā akṛtajñā gurudruhaḥ

नाहं तु सख्यो भजतोऽपि जन्तून् भजाम्यमीषामनुवृत्तिवृत्तये ।यथाधनो लब्धधने विनष्टे तच्चिन्तयान्यन्निभृतो न वेद॥ 20 ॥

nāhaṃ tu sakhyo bhajato'pi jantūn bhajāmyamīṣāmanuvṛttivṛttaye | yathādhano labdhadhane vinaṣṭe taccintayānyannibhṛto na veda

एवं मदर्थोज्झितलोकवेद- स्वानां हि वो मय्यनुवृत्तयेऽबलाः ।मया परोक्षं भजता तिरोहितं मासूयितुं मार्हथ तत्प्रियं प्रियाः॥ 21 ॥

evaṃ madarthojjhitalokaveda- svānāṃ hi vo mayyanuvṛttaye'balāḥ | mayā parokṣaṃ bhajatā tirohitaṃ māsūyituṃ mārhatha tatpriyaṃ priyāḥ

न पारयेऽहं निरवद्यसंयुजां स्वसाधुकृत्यं विबुधायुषापि वः ।या माभजन् दुर्जरगेहशृङ्खलाः संवृश्च्य तद्वः प्रतियातु साधुना॥ 22 ॥

na pāraye'haṃ niravadyasaṃyujāṃ svasādhukṛtyaṃ vibudhāyuṣāpi vaḥ | yā mābhajan durjaragehaśṛṅkhalāḥ saṃvṛścya tadvaḥ pratiyātu sādhunā

दशमस्कन्धे पूर्वर्धे रासक्रीडायां गोपीसान्त्वनं नाम द्वात्रिंशोऽध्यायः॥ 32 ॥

daśamaskandhe pūrvardhe rāsakrīḍāyāṃ gopīsāntvanaṃ nāma dvātriṃśo'dhyāyaḥ