Skandha 9, Adhyāya 32

श्रीनारायण उवाच ।मायाबीजं महामन्त्रं प्रदत्त्वा विधिपूर्वकम् ।कर्माशुभविपाकं च तामुवाच रवेः सुतः॥ 1 ॥

śrīnārāyaṇa uvāca | māyābījaṃ mahāmantraṃ pradattvā vidhipūrvakam | karmāśubhavipākaṃ ca tāmuvāca raveḥ sutaḥ

धर्मराज उवाच ।शुभकर्मविपाकान्न नरकं याति मानवः ।कर्माशुभविपाकं च कथयामि निशामय॥ 2 ॥

dharmarāja uvāca | śubhakarmavipākānna narakaṃ yāti mānavaḥ | karmāśubhavipākaṃ ca kathayāmi niśāmaya

नानापुराणभेदेन नामभेदेन भामिनि ।नानाप्रकारं स्वर्गं च याति जीवः स्वकर्मभिः॥ 3 ॥

nānāpurāṇabhedena nāmabhedena bhāmini | nānāprakāraṃ svargaṃ ca yāti jīvaḥ svakarmabhiḥ

शुभकर्मविपाकान्न नरकं याति कर्मभिः ।कुकर्मणा च नरकं याति नानाविधं नरः॥ 4 ॥

śubhakarmavipākānna narakaṃ yāti karmabhiḥ | kukarmaṇā ca narakaṃ yāti nānāvidhaṃ naraḥ

नरकाणां च कुण्डानि सन्ति नानाविधानि च ।नानाशास्त्रप्रमाणेन कर्मभेदेन यानि च॥ 5 ॥

narakāṇāṃ ca kuṇḍāni santi nānāvidhāni ca | nānāśāstrapramāṇena karmabhedena yāni ca

विस्तृतानि च गर्तानि क्लेशदानि च दुःखिनाम् ।भयङ्कराणि घोराणि हे वत्से कुत्सितानि च॥ 6 ॥

vistṛtāni ca gartāni kleśadāni ca duḥkhinām | bhayaṅkarāṇi ghorāṇi he vatse kutsitāni ca

षडशीति च कुण्डानि एवमन्यानि सन्ति च ।निबोध तेषां नामानि प्रसिद्धानि श्रुतौ सति॥ 7 ॥

ṣaḍaśīti ca kuṇḍāni evamanyāni santi ca | nibodha teṣāṃ nāmāni prasiddhāni śrutau sati

वह्निकुण्डं तप्तकुण्डं क्षारकुण्डं भयानकम् ।विट्कुण्डं मूत्रकुण्डं च श्लेष्मकुण्डं च दुःसहम्॥ 8 ॥

vahnikuṇḍaṃ taptakuṇḍaṃ kṣārakuṇḍaṃ bhayānakam | viṭkuṇḍaṃ mūtrakuṇḍaṃ ca śleṣmakuṇḍaṃ ca duḥsaham

गरकुण्डं दूषिकुण्डं वसाकुण्डं तथैव च ।शुक्रकुण्डमसुक्कुण्डमश्रुकुण्डं च कुत्सितम्॥ 9 ॥

garakuṇḍaṃ dūṣikuṇḍaṃ vasākuṇḍaṃ tathaiva ca | śukrakuṇḍamasukkuṇḍamaśrukuṇḍaṃ ca kutsitam

कुण्डं गात्रमलानां च कर्णविट्कुण्डमेव च ।मज्जाकुण्डं मांसकुण्डं नक्रकुण्डं च दुस्तरम्॥ 10 ॥

kuṇḍaṃ gātramalānāṃ ca karṇaviṭkuṇḍameva ca | majjākuṇḍaṃ māṃsakuṇḍaṃ nakrakuṇḍaṃ ca dustaram

लोमकुण्डं केशकुण्डमस्थिकुण्डं च दुस्तरम् ।ताम्रकुण्डं लोहकुण्डं प्रतप्तं क्लेशदं महत्॥ 11 ॥

lomakuṇḍaṃ keśakuṇḍamasthikuṇḍaṃ ca dustaram | tāmrakuṇḍaṃ lohakuṇḍaṃ prataptaṃ kleśadaṃ mahat

चर्मकुण्डं तप्तसुराकुण्डं च परिकीर्तितम् ।तीक्ष्णकण्टककुण्डं च विषोदं विषकुण्डकम्॥ 12 ॥

carmakuṇḍaṃ taptasurākuṇḍaṃ ca parikīrtitam | tīkṣṇakaṇṭakakuṇḍaṃ ca viṣodaṃ viṣakuṇḍakam

प्रतप्तकुण्डं तैलस्य कुन्तकुण्डं च दुर्वहम् ।कृमिकुण्डं पूयकुण्डं सर्पकुण्डं दुरन्तकम्॥ 13 ॥

prataptakuṇḍaṃ tailasya kuntakuṇḍaṃ ca durvaham | kṛmikuṇḍaṃ pūyakuṇḍaṃ sarpakuṇḍaṃ durantakam

मशकुण्डं दंशकुण्डं भीमं गरलकुण्डकम् ।कुण्डं च वज्रदंष्ट्राणां वृश्चिकानां च सुव्रते॥ 14 ॥

maśakuṇḍaṃ daṃśakuṇḍaṃ bhīmaṃ garalakuṇḍakam | kuṇḍaṃ ca vajradaṃṣṭrāṇāṃ vṛścikānāṃ ca suvrate

शरकुण्डं शूलकुण्डं खड्गकुण्डं च भीषणम् ।गोलकुण्डं नक्रकुण्डं काककुण्डं शुचास्पदम्॥ 15 ॥

śarakuṇḍaṃ śūlakuṇḍaṃ khaḍgakuṇḍaṃ ca bhīṣaṇam | golakuṇḍaṃ nakrakuṇḍaṃ kākakuṇḍaṃ śucāspadam

मन्थानकुण्डं बीजकुण्डं वज्रकुण्डं च दुःसहम् ।तप्तपाषाणकुण्डं च तीक्ष्णपाषाणकुण्डकम्॥ 16 ॥

manthānakuṇḍaṃ bījakuṇḍaṃ vajrakuṇḍaṃ ca duḥsaham | taptapāṣāṇakuṇḍaṃ ca tīkṣṇapāṣāṇakuṇḍakam

लालाकुण्डं मसीकुण्डं चूर्णकुण्डं तथैव च ।चक्रकुण्डं वक्रकुण्डं कूर्मकुण्डं महोल्बणम्॥ 17 ॥

lālākuṇḍaṃ masīkuṇḍaṃ cūrṇakuṇḍaṃ tathaiva ca | cakrakuṇḍaṃ vakrakuṇḍaṃ kūrmakuṇḍaṃ maholbaṇam

ज्वालाकुण्डं भस्मकुण्डं दग्धकुण्डं शुचिस्मिते ।तप्तसूचीमसिपत्रं क्षुरधारं सूचीमुखम्॥ 18 ॥

jvālākuṇḍaṃ bhasmakuṇḍaṃ dagdhakuṇḍaṃ śucismite | taptasūcīmasipatraṃ kṣuradhāraṃ sūcīmukham

गोकामुख नक्रमुखं गजदंशं च गोमुखम् ।कुम्भीपाकं कालसूत्रं मत्स्योदं कृमितन्तुकम्॥ 19 ॥

gokāmukha nakramukhaṃ gajadaṃśaṃ ca gomukham | kumbhīpākaṃ kālasūtraṃ matsyodaṃ kṛmitantukam

पांसुभोज्यं पाशवेष्टं शूलप्रोतं प्रकम्पनम् ।उल्कामुखमन्धकूपं वेधनं ताडनं तथा॥ 20 ॥

pāṃsubhojyaṃ pāśaveṣṭaṃ śūlaprotaṃ prakampanam | ulkāmukhamandhakūpaṃ vedhanaṃ tāḍanaṃ tathā

जालरन्ध्रं देहचूर्णं दलनं शोषणं कषम् ।शूर्पं ज्वालामुखं चैव धूमान्धं नागवेष्टनम्॥ 21 ॥

jālarandhraṃ dehacūrṇaṃ dalanaṃ śoṣaṇaṃ kaṣam | śūrpaṃ jvālāmukhaṃ caiva dhūmāndhaṃ nāgaveṣṭanam

कुण्डान्येतानि सावित्रि पापिनां क्लेशदानि च ।नियुतैः किङ्करगणै रक्षितानि च सन्ततम्॥ 22 ॥

kuṇḍānyetāni sāvitri pāpināṃ kleśadāni ca | niyutaiḥ kiṅkaragaṇai rakṣitāni ca santatam

दण्डहस्तैः पाशहस्तैर्मदमत्तैर्भयङ्करैः ।शक्तिहस्तैर्गदाहस्तैरसिहस्तैः सुदारुणैः॥ 23 ॥

daṇḍahastaiḥ pāśahastairmadamattairbhayaṅkaraiḥ | śaktihastairgadāhastairasihastaiḥ sudāruṇaiḥ

तमोयुक्तैर्दयाहीनैर्निवार्यैश्च न सर्वतः ।तेजस्विभिश्च निःशङ्कैराताम्रपिङ्गलोचनैः॥ 24 ॥

tamoyuktairdayāhīnairnivāryaiśca na sarvataḥ | tejasvibhiśca niḥśaṅkairātāmrapiṅgalocanaiḥ

योगयुक्तैः सिद्धियुक्तैर्नानारूपधरैर्भटैः ।आसन्नमृत्युभिर्दृष्टैः पापिभिः सर्वजीविभिः॥ 25 ॥

yogayuktaiḥ siddhiyuktairnānārūpadharairbhaṭaiḥ | āsannamṛtyubhirdṛṣṭaiḥ pāpibhiḥ sarvajīvibhiḥ

स्वकर्मनिरतैः सर्वैः शाक्तैः सौरैश्च गाणपैः ।अदृश्यैः पुण्यकृद्भिश्च सिद्धैर्योगिभिरेव च॥ 26 ॥

svakarmanirataiḥ sarvaiḥ śāktaiḥ sauraiśca gāṇapaiḥ | adṛśyaiḥ puṇyakṛdbhiśca siddhairyogibhireva ca

स्वधर्मनिरतैर्वापि विततैर्वा स्वतन्त्रकैः ।बलवद्भिश्च निःशङ्कैः स्वप्नदृष्टैश्च वैष्णवैः॥ 27 ॥

svadharmaniratairvāpi vitatairvā svatantrakaiḥ | balavadbhiśca niḥśaṅkaiḥ svapnadṛṣṭaiśca vaiṣṇavaiḥ

एतत्ते कथितं साध्वि कुण्डसङ्ख्यानिरूपणम् ।येषां निवासो यत्कुण्डे निबोध कथयामि ते॥ 28 ॥

etatte kathitaṃ sādhvi kuṇḍasaṅkhyānirūpaṇam | yeṣāṃ nivāso yatkuṇḍe nibodha kathayāmi te