Parva 3, Adhyāya 128

श्रीकृष्णेन हंसस्य वधं अथ भीतो महारौद्रमस्त्रं दृष्ट्वा नृपोत्तम ।हंसो राजा महाराज निश्चेष्ट इव सम्बभौ॥ 1 ॥

śrīkṛṣṇena haṃsasya vadhaṃ atha bhīto mahāraudramastraṃ dṛṣṭvā nṛpottama | haṃso rājā mahārāja niśceṣṭa iva sambabhau

उत्प्लुत्य स रथात्तस्माद् यमुनामभ्यधावत ।यत्र कृष्णो हृषीकेशः कालियाहिं ममर्द ह॥ 2 ॥

utplutya sa rathāttasmād yamunāmabhyadhāvata | yatra kṛṣṇo hṛṣīkeśaḥ kāliyāhiṃ mamarda ha

महाह्रदं महारौद्रं यावत्पातालसंस्थितम् ।तावद्दीर्घं महानीलं कालाञ्जननिभं हि यत्॥ 3 ॥

mahāhradaṃ mahāraudraṃ yāvatpātālasaṃsthitam | tāvaddīrghaṃ mahānīlaṃ kālāñjananibhaṃ hi yat

तस्मिन् ह्रदे महाघोरे पपाताथ स हंसकः ।हंसे पतति तस्मिंस्तु महान् रावो बभूव ह॥ 4 ॥

tasmin hrade mahāghore papātātha sa haṃsakaḥ | haṃse patati tasmiṃstu mahān rāvo babhūva ha

गिरीणां पात्यमानानां समुद्र इव वज्रिणा ।रथादुत्प्लुत्य कृष्णोऽपि तस्योपरि पपात ह॥ 5 ॥

girīṇāṃ pātyamānānāṃ samudra iva vajriṇā | rathādutplutya kṛṣṇo'pi tasyopari papāta ha

देवदेवो जगन्नाथो जगद् विस्मापयन्निव ।प्राहरन् तं महाबाहुः पादाभ्यामथ केशवः॥ 6 ॥

devadevo jagannātho jagad vismāpayanniva | prāharan taṃ mahābāhuḥ pādābhyāmatha keśavaḥ

पादक्षेपं नृपस्तस्माल्लब्ध्वा हंसो नृपोत्तम ।ममार च नृपश्रेष्ठ केचिदेवं वदन्ति हि॥ 7 ॥

pādakṣepaṃ nṛpastasmāllabdhvā haṃso nṛpottama | mamāra ca nṛpaśreṣṭha kecidevaṃ vadanti hi

अन्ये पातालमायातो भक्षितः पन्नगैरिति ।अद्यापि नैव राजेन्द्र दृष्ट इत्यनुशुश्रुम॥ 8 ॥

anye pātālamāyāto bhakṣitaḥ pannagairiti | adyāpi naiva rājendra dṛṣṭa ityanuśuśruma

यथापूर्वं जगन्नाथो रथं समुपजग्मिवान् ।हते तस्मिन् महाराज धर्मपुत्रो युधिष्ठिरः॥ 9 ॥

yathāpūrvaṃ jagannātho rathaṃ samupajagmivān | hate tasmin mahārāja dharmaputro yudhiṣṭhiraḥ

अकरोत् राजसूयं च तव पूर्वपितामहः ।यदि जीवेदसौ हंसः को नमस्यति तं क्रतुम्॥ 10 ॥

akarot rājasūyaṃ ca tava pūrvapitāmahaḥ | yadi jīvedasau haṃsaḥ ko namasyati taṃ kratum

स च सर्वास्त्रविन्नित्यं रुद्राल्लब्धवरः प्रभो ।क्षणादेव महाराज वार्तेयं गामगाहत॥ 11 ॥

sa ca sarvāstravinnityaṃ rudrāllabdhavaraḥ prabho | kṣaṇādeva mahārāja vārteyaṃ gāmagāhata

हतो हंसो हतो हंसः कृष्णेन रिपुमर्दिना ।जगुर्गन्धर्वपतयो देवलोके दिवानिशम्॥ 12 ॥

hato haṃso hato haṃsaḥ kṛṣṇena ripumardinā | jagurgandharvapatayo devaloke divāniśam

कृष्णेन लोकनाथेन विष्णुना प्रभविष्णुना ।यमुनाया ह्रदे घोरे हंसो निहत इत्यपि॥ 13 ॥

kṛṣṇena lokanāthena viṣṇunā prabhaviṣṇunā | yamunāyā hrade ghore haṃso nihata ityapi