पद १३५

राम सनेही सों तैं न सनेह कियो ।अगम जो अमरनिहूँ सो तनु तोहिं दियो ॥ दियो सुकुल जनम, सरीर सुंदर, हेतु जो फल चारिको ।जो पाइ पंडित परमपद, पावत पुरारि-मुरारिको ॥ यह भरतखंड, समीप सुरसरि, थल भलो, संगति भली ।तेरी कुमति कायर! कलप-बल्ली चहति है बिष फल फली॥ 1 ॥

rāma sanehī soṃ taiṃ na saneha kiyo | agama jo amaranihū~ so tanu tohiṃ diyo || diyo sukula janama, sarīra suṃdara, hetu jo phala cāriko | jo pāi paṃḍita paramapada, pāvata purāri-murāriko || yaha bharatakhaṃḍa, samīpa surasari, thala bhalo, saṃgati bhalī | terī kumati kāyara! kalapa-ballī cahati hai biṣa phala phalī

अजहूँ समुझि चित दै सुनु परमारथ ।है हितु सो जगहूँ जाहिते स्वारथ ॥ स्वारथहि प्रिय, स्वारथ सो का ते कौन बेद बखानई ।देखु खल, अहि-खेल परिहरि, सो प्रभुहि पहिचानई ॥ पितु-मातु, गुरु, स्वामी, अपनपौ, तिय, तनय, सेवक, सखा ।प्रिय लगत जाके प्रेमसों, बिनु हेतु हित तैं नहिं लखा॥ 2 ॥

ajahū~ samujhi cita dai sunu paramāratha | hai hitu so jagahū~ jāhite svāratha || svārathahi priya, svāratha so kā te kauna beda bakhānaī | dekhu khala, ahi-khela parihari, so prabhuhi pahicānaī || pitu-mātu, guru, svāmī, apanapau, tiya, tanaya, sevaka, sakhā | priya lagata jāke premasoṃ, binu hetu hita taiṃ nahiṃ lakhā

दूरि न सो हितू हेरि हिये ही है ।छलहि छाँड़ि सुमिरे छोहु किये ही है ॥ किये छोहु छाया कमल करकी भगतपर भजतहि भजै ।जगदीस, जीवन जीवको, जो साज सब सबको सजै ॥ हरिहि हरिता, बिधिहि बिधिता, सिवहि सिवता जो दई ।सोइ जानकी-पति मधुर मूरति, मोदमय मंगल मई॥ 3 ॥

dūri na so hitū heri hiye hī hai | chalahi chā~ḍa़i sumire chohu kiye hī hai || kiye chohu chāyā kamala karakī bhagatapara bhajatahi bhajai | jagadīsa, jīvana jīvako, jo sāja saba sabako sajai || harihi haritā, bidhihi bidhitā, sivahi sivatā jo daī | soi jānakī-pati madhura mūrati, modamaya maṃgala maī

ठाकुर अतिहि बड़ो, सील, सरल, सुठि ।ध्यान अगम सिवहूँ, भेंट्यो केवट उठि ॥ भरि अंक भेंट्यो सजल नयन, सनेह सिथिल सरीर सो ।सुर, सिद्ध, मुनि, कबि कहत कोउ न प्रेमप्रिय रघुबीर सो ॥ खग, सबरि, निसिचर, भालु, कपि किये आपु ते बंदित बड़े ।तापर तिन्ह कि सेवा सुमिरि जिय जात जनु सकुचनि गड़े॥ 4 ॥

ṭhākura atihi baḍa़o, sīla, sarala, suṭhi | dhyāna agama sivahū~, bheṃṭyo kevaṭa uṭhi || bhari aṃka bheṃṭyo sajala nayana, saneha sithila sarīra so | sura, siddha, muni, kabi kahata kou na premapriya raghubīra so || khaga, sabari, nisicara, bhālu, kapi kiye āpu te baṃdita baḍa़e | tāpara tinha ki sevā sumiri jiya jāta janu sakucani gaḍa़e

स्वामीको सुभाव कह्यो सो जब उर आनिहै ।सोच सकल मिटिहैं, राम भलो मन मानिहैं ॥ भलो मानिहैं रघुनाथ जोरि जो हाथ माथो नाइहै ।ततकाल तुलसीदास जीवन-जनमको फल पाइहै ॥ जपि नाम करहि प्रनाम, कहि गुन-ग्राम, रामहिं धरि हिये ।बिचरहि अवनि अवनीस-चरनसरोज मन-मधुकर किये॥ 5 ॥

svāmīko subhāva kahyo so jaba ura ānihai | soca sakala miṭihaiṃ, rāma bhalo mana mānihaiṃ || bhalo mānihaiṃ raghunātha jori jo hātha mātho nāihai | tatakāla tulasīdāsa jīvana-janamako phala pāihai || japi nāma karahi pranāma, kahi guna-grāma, rāmahiṃ dhari hiye | bicarahi avani avanīsa-caranasaroja mana-madhukara kiye