पद १८४

राम-नामके जपे जाइ जियकी जरनि ।कलिकाल अपर उपाय ते अपाय भये, जैसे तम नासिबेको चित्रके तरनि॥ 1 ॥

rāma-nāmake jape jāi jiyakī jarani | kalikāla apara upāya te apāya bhaye, jaise tama nāsibeko citrake tarani

करम-कलाप परिताप पाप-साने सब, ज्यों सुफूल फूले तरु फोकट फरनि ।दंभ, लोभ, लालच, उपासना बिनासि नीके, सुगति साधन भई उदर भरनि॥ 2 ॥

karama-kalāpa paritāpa pāpa-sāne saba, jyoṃ suphūla phūle taru phokaṭa pharani | daṃbha, lobha, lālaca, upāsanā bināsi nīke, sugati sādhana bhaī udara bharani

जोग न समाधि निरुपाधि न बिराग-ग्यान, बचन बिशेष बेष, कहूँ न करनि ।कपट कुपथ कोटि, कहनि-रहनि खोटि, सकल सराहैं निज निज आचरनि॥ 3 ॥

joga na samādhi nirupādhi na birāga-gyāna, bacana biśeṣa beṣa, kahū~ na karani | kapaṭa kupatha koṭi, kahani-rahani khoṭi, sakala sarāhaiṃ nija nija ācarani

मरत महेस उपदेस हैं कहा करत, सुरसरि-तीर कासी धरम-धरनि ।राम-नामको प्रताप हर कहैं, जपैं आप, जुग जुग जानैं जग, बेदहूँ बरनि॥ 4 ॥

marata mahesa upadesa haiṃ kahā karata, surasari-tīra kāsī dharama-dharani | rāma-nāmako pratāpa hara kahaiṃ, japaiṃ āpa, juga juga jānaiṃ jaga, bedahū~ barani

मति राम-नाम ही सों, रति राम-नाम ही सों, गति राम-नाम ही की बिपति-हरनि ।राम-नामसों प्रतीति प्रीति राखे कबहुँक, तुलसी ढरैंगे राम आपनी ढरनि॥ 5 ॥

mati rāma-nāma hī soṃ, rati rāma-nāma hī soṃ, gati rāma-nāma hī kī bipati-harani | rāma-nāmasoṃ pratīti prīti rākhe kabahu~ka, tulasī ḍharaiṃge rāma āpanī ḍharani