पद २५०

तौ हौं बार बार प्रभुहि पुकारिके खिझावतो न, जो पै मोको होतो कहूँ ठाकुर-ठहरु ।आलसी-अभागे मोसे तैं कृपालु पाले-पोसे, राजा मेरे राजाराम, अवध सहरु॥ 1 ॥

tau hauṃ bāra bāra prabhuhi pukārike khijhāvato na, jo pai moko hoto kahū~ ṭhākura-ṭhaharu | ālasī-abhāge mose taiṃ kṛpālu pāle-pose, rājā mere rājārāma, avadha saharu

सेये न दिगीस, न दिनेस, न गनेस, गौरी, हित कै न माने बिधि हरिउ न हरु ।रामनाम ही सों जोग-छेम, नेम, प्रेम-पन, सुधा सो भरोसो एहु, दूसरो जहरु॥ 2 ॥

seye na digīsa, na dinesa, na ganesa, gaurī, hita kai na māne bidhi hariu na haru | rāmanāma hī soṃ joga-chema, nema, prema-pana, sudhā so bharoso ehu, dūsaro jaharu

समाचार साथके अनाथ-नाथ! कासों कहौं, नाथ ही के हाथ सब चोरऊ पहरु ।निज काज, सुरकाज, आरतके काज, राज! बूझिये बिलंब कहा कहूँ न गहरु॥ 3 ॥

samācāra sāthake anātha-nātha! kāsoṃ kahauṃ, nātha hī ke hātha saba coraū paharu | nija kāja, surakāja, āratake kāja, rāja! būjhiye bilaṃba kahā kahū~ na gaharu

रीति सुनि रावरी प्रतीति-प्रीति रावरे सों, डरत हौं देखि कलिकालको कहरु ।कहेही बनैगी कै कहाये, बलि जाउँ, राम, 'तुलसी! तू मेरो, हारि हिये न हहरु'॥ 4 ॥

rīti suni rāvarī pratīti-prīti rāvare soṃ, ḍarata hauṃ dekhi kalikālako kaharu | kahehī banaigī kai kahāye, bali jāu~, rāma, 'tulasī! tū mero, hāri hiye na haharu'