पद २६४

मेरो कह्यो सुनि पुनि भावै तोहि करि सो ।चारिहू बिलोचन बिलोकु तू तिलोक महँ तेरो तिहु काल कहु को है हितू हरि-सो॥ 1 ॥

mero kahyo suni puni bhāvai tohi kari so | cārihū bilocana biloku tū tiloka maha~ tero tihu kāla kahu ko hai hitū hari-so

नये-नये नेह अनुभये देह-गेह बसि, परखे प्रपंची प्रेम, परत उघरि सो ।सुहृद-समाज दगावाजिहीको सौदा-सूत, जब जाको काज तब मिलै पाँय परि सो॥ 2 ॥

naye-naye neha anubhaye deha-geha basi, parakhe prapaṃcī prema, parata ughari so | suhṛda-samāja dagāvājihīko saudā-sūta, jaba jāko kāja taba milai pā~ya pari so

बिबुध सयाने, पहिचाने कैधौं नाहीं नीके, देत एक गुन, लेत कोटि गुन भरि सो ।करम-धरम श्रम-फल रघुबर बिनु, राखको सो होम है, ऊसर कैसो बरिसो॥ 3 ॥

bibudha sayāne, pahicāne kaidhauṃ nāhīṃ nīke, deta eka guna, leta koṭi guna bhari so | karama-dharama śrama-phala raghubara binu, rākhako so homa hai, ūsara kaiso bariso

आदि-अंत-बीच भलो भलो करै सबहीको जाको जस लोक-वेद रह्यो है बगरि-सो ।सीतापति सारिखो न साहिब सील-निधान, कैसे कल परै सठ! बैठो सो बिसरि-सो॥ 4 ॥

ādi-aṃta-bīca bhalo bhalo karai sabahīko jāko jasa loka-veda rahyo hai bagari-so | sītāpati sārikho na sāhiba sīla-nidhāna, kaise kala parai saṭha! baiṭho so bisari-so

जीवको जीवन-प्रान, प्रानको परम हित प्रीतम, पुनीतकृत नीचन निदरि सो ।तुलसी! तोको कृपालु जो कियो कोसलपालु, चित्रकूटको चरित्र चेतु चित करि सो॥ 5 ॥

jīvako jīvana-prāna, prānako parama hita prītama, punītakṛta nīcana nidari so | tulasī! toko kṛpālu jo kiyo kosalapālu, citrakūṭako caritra cetu cita kari so