पद ५८

देव-- देहि अवलंब कर कमल, कमलारमन, दमन-दुख, शमन-संताप भारी ।अज्ञान-राकेश-ग्रासन बिधुंतुद, गर्व-काम-करिमत्त-हरि, दूषणारी॥ 1 ॥

deva-- dehi avalaṃba kara kamala, kamalāramana, damana-dukha, śamana-saṃtāpa bhārī | ajñāna-rākeśa-grāsana bidhuṃtuda, garva-kāma-karimatta-hari, dūṣaṇārī

बपुष ब्रह्मांड सुप्रवृत्ति लंका-दुर्ग, रचित मनदनुज मय-रूपधारी ।बिबिध कोशौघ, अति रुचिर-मंदिर-निकर, सत्वगुण प्रमुख त्रैकटककारी॥ 2 ॥

bapuṣa brahmāṃḍa supravṛtti laṃkā-durga, racita manadanuja maya-rūpadhārī | bibidha kośaugha, ati rucira-maṃdira-nikara, satvaguṇa pramukha traikaṭakakārī

कुनप-अभिमान सागर भयंकर घोर, बिपुल अवगाह, दुस्तर अपारं ।नक्र-रागादि-संकुल मनोरथ सकल, संग-संकल्प बीची-बिकारं॥ 3 ॥

kunapa-abhimāna sāgara bhayaṃkara ghora, bipula avagāha, dustara apāraṃ | nakra-rāgādi-saṃkula manoratha sakala, saṃga-saṃkalpa bīcī-bikāraṃ

मोह दशमौलि, तद्भ्रात अहँकार, पाकारिजित काम बिश्रामहारी ।लोभ अतिकाय, मत्सर महोदर दुष्ट, क्रोध पापिष्ठ-बिबुधांतकारी॥ 4 ॥

moha daśamauli, tadbhrāta aha~kāra, pākārijita kāma biśrāmahārī | lobha atikāya, matsara mahodara duṣṭa, krodha pāpiṣṭha-bibudhāṃtakārī

द्वेष दुर्मुख, दंभ खर, अकंपन कपट, दर्प मनुजाद मद-शूलपानी ।अमितबल परम दुर्जय निशाचर-निकर सहित षडवर्ग गो-यातुधानी॥ 5 ॥

dveṣa durmukha, daṃbha khara, akaṃpana kapaṭa, darpa manujāda mada-śūlapānī | amitabala parama durjaya niśācara-nikara sahita ṣaḍavarga go-yātudhānī

जीव भवदंघ्रि-सेवक बिभीषण बसत मध्य दुष्टाटवी ग्रसितचिंता ।नियम-यम सकल सुरलोक-लोकेश लंकेश-बश नाथ ! अत्यंत भीता॥ 6 ॥

jīva bhavadaṃghri-sevaka bibhīṣaṇa basata madhya duṣṭāṭavī grasitaciṃtā | niyama-yama sakala suraloka-lokeśa laṃkeśa-baśa nātha ! atyaṃta bhītā

ज्ञान-अवधेश-गृह गेहिनी भक्ति शुभ, तत्र अवतार भूभार-हर्ता ।भक्त-संकष्ट अवलोकि पितु-वाक्य कृत गमन किय गहन बैदेहि-भर्त्ता॥ 7 ॥

jñāna-avadheśa-gṛha gehinī bhakti śubha, tatra avatāra bhūbhāra-hartā | bhakta-saṃkaṣṭa avaloki pitu-vākya kṛta gamana kiya gahana baidehi-bharttā

कैवल्य साधन अखिल भालु मर्कट बिपुल ज्ञान-सुग्रीवकृत जलधिसेतू ।प्रबल बैराग्य दारुण प्रभंजन-तनय, बिषम बन भवनमिव धूमकेतू॥ 8 ॥

kaivalya sādhana akhila bhālu markaṭa bipula jñāna-sugrīvakṛta jaladhisetū | prabala bairāgya dāruṇa prabhaṃjana-tanaya, biṣama bana bhavanamiva dhūmaketū

दुष्ट दनुजेश निर्वंशकृत दासहित, बिश्वदुख-हरण बोधैकरासी ।अनुज निज जानकी सहित हरि सर्बदा दासतुलसी हृदय-कमलबासी॥ 9 ॥

duṣṭa danujeśa nirvaṃśakṛta dāsahita, biśvadukha-haraṇa bodhaikarāsī | anuja nija jānakī sahita hari sarbadā dāsatulasī hṛdaya-kamalabāsī