पद ९२

माधवजू, मोसम मंद न कोऊ ।जद्यपि मीन-पतंग हीनमति, मोहि नहिं पूजैं ओऊ॥ 1 ॥

mādhavajū, mosama maṃda na koū | jadyapi mīna-pataṃga hīnamati, mohi nahiṃ pūjaiṃ oū

रुचिर रूप-आहार-बस्य उन्ह, पावक लोह न जान्यो ।देखत बिपति बिषय न तजत हौं, तातें अधिक अयान्यो॥ 2 ॥

rucira rūpa-āhāra-basya unha, pāvaka loha na jānyo | dekhata bipati biṣaya na tajata hauṃ, tāteṃ adhika ayānyo

महामोह-सरिता अपार महँ, संतत फिरत बह्यो ।श्रीहरि-चरन-कमल-नौका तजि, फिरि फिरि फेन गह्यो॥ 3 ॥

mahāmoha-saritā apāra maha~, saṃtata phirata bahyo | śrīhari-carana-kamala-naukā taji, phiri phiri phena gahyo

अस्थि पुरातन छुधित स्वान अति ज्यौं भरि मुख पकरै ।निज तालूगत रुधिर पान करि, मन संतोष धरै॥ 4 ॥

asthi purātana chudhita svāna ati jyauṃ bhari mukha pakarai | nija tālūgata rudhira pāna kari, mana saṃtoṣa dharai

परम कठिन भव-ब्याल-ग्रसित हौं त्रसित भयो अति भारी ।चाहत अभय भेक सरनागत, खगपति-नाथ बिसारी॥ 5 ॥

parama kaṭhina bhava-byāla-grasita hauṃ trasita bhayo ati bhārī | cāhata abhaya bheka saranāgata, khagapati-nātha bisārī

जलचर-बृंद जाल-अंतरगत होत सिमिटि इक पासा ।एकहि एक खात लालच-बस, नहिं देखत निज नासा॥ 6 ॥

jalacara-bṛṃda jāla-aṃtaragata hota simiṭi ika pāsā | ekahi eka khāta lālaca-basa, nahiṃ dekhata nija nāsā

मेरे अघ सारद अनेक जुग, गनत पार नहिं पावै ।तुलसीदास पतित-पावन प्रभु यह भरोस जिय आवै॥ 7 ॥

mere agha sārada aneka juga, ganata pāra nahiṃ pāvai | tulasīdāsa patita-pāvana prabhu yaha bharosa jiya āvai