पद ९३

कृपा सो धौं कहाँ बिसारी राम ।जेहि करुना सुनि श्रवन दीन-दुख, धावत हौ तजि धाम॥ 1 ॥

kṛpā so dhauṃ kahā~ bisārī rāma | jehi karunā suni śravana dīna-dukha, dhāvata hau taji dhāma

नागराज निज बल बिचारि हिय, हारि चरन चित दीन्हों ।आरत गिरा सुनत खगपति तजि, चलत बिलंब न कीन्हों॥ 2 ॥

nāgarāja nija bala bicāri hiya, hāri carana cita dīnhoṃ | ārata girā sunata khagapati taji, calata bilaṃba na kīnhoṃ

दितिसुत-त्रास-त्रसित निसिदिन प्रहलाद-प्रतिग्या राखी ।अतुलित बल मृगराज-मनुज-तनु दनुज हत्यो श्रुति साखी॥ 3 ॥

ditisuta-trāsa-trasita nisidina prahalāda-pratigyā rākhī | atulita bala mṛgarāja-manuja-tanu danuja hatyo śruti sākhī

भूप-सदसि सब नृप बिलोकि प्रभु, राखु कह्यो नर-नारी ।बसन पूरि, अरि-दरप दूरि करि, भूरि कृपा दनुजारी॥ 4 ॥

bhūpa-sadasi saba nṛpa biloki prabhu, rākhu kahyo nara-nārī | basana pūri, ari-darapa dūri kari, bhūri kṛpā danujārī

एक एक रिपुते त्रासित जन, तुम राखे रघुबीर ।अब मोहिं देत दुसह दुख बहु रिपु कस न हरहु भव-पीर॥ 5 ॥

eka eka ripute trāsita jana, tuma rākhe raghubīra | aba mohiṃ deta dusaha dukha bahu ripu kasa na harahu bhava-pīra

लोभ-ग्राह, दनुजेस-क्रोध, कुरुराज-बंधु खल मार ।तुलसिदास प्रभु यह दारुन दुख भंजहु राम उदार॥ 6 ॥

lobha-grāha, danujesa-krodha, kururāja-baṃdhu khala māra | tulasidāsa prabhu yaha dāruna dukha bhaṃjahu rāma udāra