पद ९८

ऐसी हरि करत दासपर प्रीति ।निज प्रभुता बिसारि जनके बस, होत सदा यह रीति॥ 1 ॥

aisī hari karata dāsapara prīti | nija prabhutā bisāri janake basa, hota sadā yaha rīti

जिन बाँधे सुर-असुर, नाग-नर, प्रबल करमकी डोरी ।सोइ अबिछिन्न ब्रह्म जसुमति हठि बाँध्यो सकत न छोरी॥ 2 ॥

jina bā~dhe sura-asura, nāga-nara, prabala karamakī ḍorī | soi abichinna brahma jasumati haṭhi bā~dhyo sakata na chorī

जाकी मायाबस बिरंचि सिव, नाचत पार न पायो ।करतल ताल बजाय ग्वाल-जुवतिन्ह सोइ नाच नचायो॥ 3 ॥

jākī māyābasa biraṃci siva, nācata pāra na pāyo | karatala tāla bajāya gvāla-juvatinha soi nāca nacāyo

बिस्वंभर, श्रीपति, त्रिभुवनपति, बेद-बिदित यह लीख ।बलिसों कछु न चली प्रभुता बरु ह्वै द्विज माँगी भीख॥ 4 ॥

bisvaṃbhara, śrīpati, tribhuvanapati, beda-bidita yaha līkha | balisoṃ kachu na calī prabhutā baru hvai dvija mā~gī bhīkha

जाको नाम लिये छूटत भव-जनम-मरन दुख-भार ।अंबरीष-हित लागि कृपानिधि सोइ जनमे दस बार॥ 5 ॥

jāko nāma liye chūṭata bhava-janama-marana dukha-bhāra | aṃbarīṣa-hita lāgi kṛpānidhi soi janame dasa bāra

जोग-बिराग, ध्यान-जप-तप करि, जेहि खोजत मुनि ग्यानी ।बानर-भालु चपल पसु पामर, नाथ तहाँ रति मानी॥ 6 ॥

joga-birāga, dhyāna-japa-tapa kari, jehi khojata muni gyānī | bānara-bhālu capala pasu pāmara, nātha tahā~ rati mānī

लोकपाल, जम, काल, पवन, रबि, ससि सब आग्याकारी ।तुलसिदास प्रभु उग्रसेनके द्वार बेंत कर धारी॥ 7 ॥

lokapāla, jama, kāla, pavana, rabi, sasi saba āgyākārī | tulasidāsa prabhu ugrasenake dvāra beṃta kara dhārī