Skandha 10, Adhyāya 28

एकादश्यां निराहारः समभ्यर्च्य जनार्दनम् ।स्नातुं नन्दस्तु कालिन्द्या द्वादश्यां जलमाविशत्॥ 1 ॥

ekādaśyāṃ nirāhāraḥ samabhyarcya janārdanam | snātuṃ nandastu kālindyā dvādaśyāṃ jalamāviśat

तं गृहीत्वानयद्भृत्यो वरुणस्यासुरोऽन्तिकम् ।अविज्ञायासुरीं वेलां प्रविष्टमुदकं निशि॥ 2 ॥

taṃ gṛhītvānayadbhṛtyo varuṇasyāsuro'ntikam | avijñāyāsurīṃ velāṃ praviṣṭamudakaṃ niśi

चुक्रुशुस्तमपश्यन्तः कृष्ण रामेति गोपकाः ।भगवांस्तदुपश्रुत्य पितरं वरुणाहृतम् ।तदन्तिकं गतो राजन् स्वानामभयदो विभुः॥ 3 ॥

cukruśustamapaśyantaḥ kṛṣṇa rāmeti gopakāḥ | bhagavāṃstadupaśrutya pitaraṃ varuṇāhṛtam | tadantikaṃ gato rājan svānāmabhayado vibhuḥ

प्राप्तं वीक्ष्य हृषीकेशं लोकपालः सपर्यया ।महत्या पूजयित्वाऽऽह तद्दर्शनमहोत्सवः॥ 4 ॥

prāptaṃ vīkṣya hṛṣīkeśaṃ lokapālaḥ saparyayā | mahatyā pūjayitvā''ha taddarśanamahotsavaḥ

अद्य मे निभृतो देहोऽद्यैवार्थोऽधिगतः प्रभो ।त्वत्पादभाजो भगवन्नवापुः पारमध्वनः॥ 5 ॥

adya me nibhṛto deho'dyaivārtho'dhigataḥ prabho | tvatpādabhājo bhagavannavāpuḥ pāramadhvanaḥ

नमस्तुभ्यं भगवते ब्रह्मणे परमात्मने ।न यत्र श्रूयते माया लोकसृष्टिविकल्पना॥ 6 ॥

namastubhyaṃ bhagavate brahmaṇe paramātmane | na yatra śrūyate māyā lokasṛṣṭivikalpanā

अजानता मामकेन मूढेनाकार्यवेदिना ।आनीतोऽयं तव पिता तद्भवान् क्षन्तुमर्हति॥ 7 ॥

ajānatā māmakena mūḍhenākāryavedinā | ānīto'yaṃ tava pitā tadbhavān kṣantumarhati

ममाप्यनुग्रहं कृष्ण कर्तुमर्हस्यशेषदृक् ।गोविन्द नीयतामेष पिता ते पितृवत्सल॥ 8 ॥

mamāpyanugrahaṃ kṛṣṇa kartumarhasyaśeṣadṛk | govinda nīyatāmeṣa pitā te pitṛvatsala

एवं प्रसादितः कृष्णो भगवानीश्वरेश्वरः ।आदायागात्स्वपितरं बन्धूनां चावहन् मुदम्॥ 9 ॥

evaṃ prasāditaḥ kṛṣṇo bhagavānīśvareśvaraḥ | ādāyāgātsvapitaraṃ bandhūnāṃ cāvahan mudam

नन्दस्त्वतीन्द्रियं दृष्ट्वा लोकपालमहोदयम् ।कृष्णे च सन्नतिं तेषां ज्ञातिभ्यो विस्मितोऽब्रवीत्॥ 10 ॥

nandastvatīndriyaṃ dṛṣṭvā lokapālamahodayam | kṛṣṇe ca sannatiṃ teṣāṃ jñātibhyo vismito'bravīt

ते त्वौत्सुक्यधियो राजन् मत्वा गोपास्तमीश्वरम् ।अपि नः स्वगतिं सूक्ष्मामुपाधास्यदधीश्वरः॥ 11 ॥

te tvautsukyadhiyo rājan matvā gopāstamīśvaram | api naḥ svagatiṃ sūkṣmāmupādhāsyadadhīśvaraḥ

सङ्कल्पसिद्धये तेषां कृपयैतदचिन्तयत्॥ 12 ॥

saṅkalpasiddhaye teṣāṃ kṛpayaitadacintayat

जनो वै लोक एतस्मिन्नविद्याकामकर्मभिः ।उच्चावचासु गतिषु न वेद स्वां गतिं भ्रमन्॥ 13 ॥

jano vai loka etasminnavidyākāmakarmabhiḥ | uccāvacāsu gatiṣu na veda svāṃ gatiṃ bhraman

दर्शयामास लोकं स्वं गोपानां तमसः परम्॥ 14 ॥

darśayāmāsa lokaṃ svaṃ gopānāṃ tamasaḥ param

सत्यं ज्ञानमनन्तं यद्ब्रह्म ज्योतिः सनातनम् ।यद्धि पश्यन्ति मुनयो गुणापाये समाहिताः॥ 15 ॥

satyaṃ jñānamanantaṃ yadbrahma jyotiḥ sanātanam | yaddhi paśyanti munayo guṇāpāye samāhitāḥ

ते तु ब्रह्मह्रदं नीता मग्नाः कृष्णेन चोद्धृताः ।ददृशुर्ब्रह्मणो लोकं यत्राक्रूरोऽध्यगात्पुरा॥ 16 ॥

te tu brahmahradaṃ nītā magnāḥ kṛṣṇena coddhṛtāḥ | dadṛśurbrahmaṇo lokaṃ yatrākrūro'dhyagātpurā

नन्दादयस्तु तं दृष्ट्वा परमानन्दनिर्वृताः ।कृष्णं च तत्र छन्दोभिः स्तूयमानं सुविस्मिताः॥ 17 ॥

nandādayastu taṃ dṛṣṭvā paramānandanirvṛtāḥ | kṛṣṇaṃ ca tatra chandobhiḥ stūyamānaṃ suvismitāḥ

दशमस्कन्धे पूर्वार्धे अष्टादशोऽध्यायः॥ 28 ॥

daśamaskandhe pūrvārdhe aṣṭādaśo'dhyāyaḥ