Skandha 9, Adhyāya 22

श्रीनारायण उवाच ।शिवं प्रणम्य शिरसा दानवेन्द्रः प्रतापवान् ।समारुरोह यानं च सहामात्यैः स सत्वरः॥ 1 ॥

śrīnārāyaṇa uvāca | śivaṃ praṇamya śirasā dānavendraḥ pratāpavān | samāruroha yānaṃ ca sahāmātyaiḥ sa satvaraḥ

शिवः स्वसैन्यं देवांश्च प्रेरयामास सत्वरम् ।दानवेन्द्रः ससैन्यश्च युद्धारम्भे बभूव ह॥ 2 ॥

śivaḥ svasainyaṃ devāṃśca prerayāmāsa satvaram | dānavendraḥ sasainyaśca yuddhārambhe babhūva ha

स्वयं महेन्द्रो युयुधे सार्धं च वृषपर्वणा ।भास्करो युयुधे विप्रचित्तिना सह सत्वरः॥ 3 ॥

svayaṃ mahendro yuyudhe sārdhaṃ ca vṛṣaparvaṇā | bhāskaro yuyudhe vipracittinā saha satvaraḥ

दम्भेन सह चन्द्रश्च चकार परमं रणम् ।कालस्वरेण कालश्च गोकर्णेन हुताशनः॥ 4 ॥

dambhena saha candraśca cakāra paramaṃ raṇam | kālasvareṇa kālaśca gokarṇena hutāśanaḥ

कुबेरः कालकेयेन विश्वकर्मा मयेन च ।भयङ्करेण मृत्युश्च संहारेण यमस्तथा॥ 5 ॥

kuberaḥ kālakeyena viśvakarmā mayena ca | bhayaṅkareṇa mṛtyuśca saṃhāreṇa yamastathā

विकङ्कणेन वरुणश्चञ्चलेन समीरणः ।बुधश्च घृतपृष्ठेन रक्ताक्षेण शनैश्चरः॥ 6 ॥

vikaṅkaṇena varuṇaścañcalena samīraṇaḥ | budhaśca ghṛtapṛṣṭhena raktākṣeṇa śanaiścaraḥ

जयन्तो रत्नसारेण वसवो वर्चसां गणैः ।अश्विनौ च दीप्तिमता धूम्रेण नलकूबरः॥ 7 ॥

jayanto ratnasāreṇa vasavo varcasāṃ gaṇaiḥ | aśvinau ca dīptimatā dhūmreṇa nalakūbaraḥ

धुरन्धरेण धर्मश्च उषाक्षेण च मङ्गलः ।शोभाकरेण वै भानुः पिठरेण च मन्मथः॥ 8 ॥

dhurandhareṇa dharmaśca uṣākṣeṇa ca maṅgalaḥ | śobhākareṇa vai bhānuḥ piṭhareṇa ca manmathaḥ

गोधामुखेन चूर्णेन खड्गेन च ध्वजेन च ।काञ्चीमुखेन पिण्डेन धूमेण सह नन्दिना॥ 9 ॥

godhāmukhena cūrṇena khaḍgena ca dhvajena ca | kāñcīmukhena piṇḍena dhūmeṇa saha nandinā

विश्वेन च पलाशेनादित्याद्या युयुधुः परे ।एकादश च रुद्रा वै एकादशभयङ्करैः॥ 10 ॥

viśvena ca palāśenādityādyā yuyudhuḥ pare | ekādaśa ca rudrā vai ekādaśabhayaṅkaraiḥ

महामारी च युयुधे चोग्रचण्डादिभिः सह ।नन्दीश्वरादयः सर्वे दानवानां गणैः सह॥ 11 ॥

mahāmārī ca yuyudhe cogracaṇḍādibhiḥ saha | nandīśvarādayaḥ sarve dānavānāṃ gaṇaiḥ saha

युयुधुश्च महायुद्धे प्रलयेऽपि भयङ्करे ।वटमूले च शम्भुश्च तस्थौ काल्या सुतेन च॥ 12 ॥

yuyudhuśca mahāyuddhe pralaye'pi bhayaṅkare | vaṭamūle ca śambhuśca tasthau kālyā sutena ca

सर्वे च युयुधुः सैन्यसमूहाः सततं मुने ।रत्नसिंहासने रम्ये कोटिभिर्दानवैः सह॥ 13 ॥

sarve ca yuyudhuḥ sainyasamūhāḥ satataṃ mune | ratnasiṃhāsane ramye koṭibhirdānavaiḥ saha

उवास शङ्खचूडश्च रत्नभूषणभूषितः ।शङ्करस्य च ये योधा दानवैश्च पराजिताः॥ 14 ॥

uvāsa śaṅkhacūḍaśca ratnabhūṣaṇabhūṣitaḥ | śaṅkarasya ca ye yodhā dānavaiśca parājitāḥ

देवाश्च दुद्रुवुः सर्वे भीताश्च क्षतविग्रहाः ।चकार कोपं स्कन्दश्च देवेभ्यश्चाभयं ददौ॥ 15 ॥

devāśca dudruvuḥ sarve bhītāśca kṣatavigrahāḥ | cakāra kopaṃ skandaśca devebhyaścābhayaṃ dadau

बलं च स्वर्गणानां च वर्धयामास तेजसा ।सोऽयमेकश्च युयुधे दानवानां गणैः सह॥ 16 ॥

balaṃ ca svargaṇānāṃ ca vardhayāmāsa tejasā | so'yamekaśca yuyudhe dānavānāṃ gaṇaiḥ saha

अक्षौहिणीनां शतकं समरे च जघान सः ।असुरान्पातयामास काली कमललोचना॥ 17 ॥

akṣauhiṇīnāṃ śatakaṃ samare ca jaghāna saḥ | asurānpātayāmāsa kālī kamalalocanā

पपौ रक्तं दानवानामतिकुद्धा ततः परम् ।दशलक्षगजेन्द्राणां शतलक्षं च कोटिशः॥ 18 ॥

papau raktaṃ dānavānāmatikuddhā tataḥ param | daśalakṣagajendrāṇāṃ śatalakṣaṃ ca koṭiśaḥ

समादायैकहस्तेन मुखे चिक्षेप लीलया ।कबन्धानां सहस्रं च ननर्त समरे मुने॥ 19 ॥

samādāyaikahastena mukhe cikṣepa līlayā | kabandhānāṃ sahasraṃ ca nanarta samare mune

स्कन्दस्य शरजालेन दानवाः क्षतविग्रहाः ।भीताश्च दुद्रुवुः सर्वे महारणपराक्रमाः॥ 20 ॥

skandasya śarajālena dānavāḥ kṣatavigrahāḥ | bhītāśca dudruvuḥ sarve mahāraṇaparākramāḥ

वृषपर्वा विप्रचित्तिर्दम्भश्चापि विकङ्कणः ।स्कन्देन सार्धं युयुधुस्ते सर्वे विक्रमेण च॥ 21 ॥

vṛṣaparvā vipracittirdambhaścāpi vikaṅkaṇaḥ | skandena sārdhaṃ yuyudhuste sarve vikrameṇa ca

महामारी च युयुधे न बभूव पराङ्मुखी ।बभूवुस्ते च सङ्क्षुब्धाः स्कन्दस्य शक्तिपीडिताः॥ 22 ॥

mahāmārī ca yuyudhe na babhūva parāṅmukhī | babhūvuste ca saṅkṣubdhāḥ skandasya śaktipīḍitāḥ

न दुद्रुवुर्भयात्स्वर्गे पुष्पवृष्टिर्बभूव ह ।स्कन्दस्य समरं दृष्ट्वा महारौद्रं समुल्बणम्॥ 23 ॥

na dudruvurbhayātsvarge puṣpavṛṣṭirbabhūva ha | skandasya samaraṃ dṛṣṭvā mahāraudraṃ samulbaṇam

दानवानां क्षयकरं यथा प्राकृतिको लयः ।राजा विमानमारुह्य चकार बाणवर्षणम्॥ 24 ॥

dānavānāṃ kṣayakaraṃ yathā prākṛtiko layaḥ | rājā vimānamāruhya cakāra bāṇavarṣaṇam

नृपस्य शरवृष्टिश्च घनस्य वर्षणं यथा ।महाघोरान्धकारश्च वह्न्युत्थानं बभूव च॥ 25 ॥

nṛpasya śaravṛṣṭiśca ghanasya varṣaṇaṃ yathā | mahāghorāndhakāraśca vahnyutthānaṃ babhūva ca

देवाः प्रदुद्रुवुः सर्वेऽप्यन्ये नन्दीश्वरादयः ।एक एव कार्तिकेयस्तस्थौ समरमूर्धनि॥ 26 ॥

devāḥ pradudruvuḥ sarve'pyanye nandīśvarādayaḥ | eka eva kārtikeyastasthau samaramūrdhani

पर्वतानां च सर्पाणां शिलानां शाखिनां तथा ।नृपश्चकार वृष्टिं च दुर्वारां च भयङ्करीम्॥ 27 ॥

parvatānāṃ ca sarpāṇāṃ śilānāṃ śākhināṃ tathā | nṛpaścakāra vṛṣṭiṃ ca durvārāṃ ca bhayaṅkarīm

नृपस्य शरवृष्ट्या च प्रहितः शिवनन्दनः ।नीहारेण च सान्द्रेण प्रहितो भास्करो यथा॥ 28 ॥

nṛpasya śaravṛṣṭyā ca prahitaḥ śivanandanaḥ | nīhāreṇa ca sāndreṇa prahito bhāskaro yathā

धनुश्चिच्छेद स्कन्दस्य दुर्वहं च भयङ्करः ।बभञ्ज च रथं दिव्यं चिच्छेद रथपीठकान्॥ 29 ॥

dhanuściccheda skandasya durvahaṃ ca bhayaṅkaraḥ | babhañja ca rathaṃ divyaṃ ciccheda rathapīṭhakān

मयूरं जर्जरीभूतं दिव्यास्त्रेण चकार सः ।शक्तिं चिक्षेप सूर्याभां तस्य वक्षस्य घातिनीम्॥ 30 ॥

mayūraṃ jarjarībhūtaṃ divyāstreṇa cakāra saḥ | śaktiṃ cikṣepa sūryābhāṃ tasya vakṣasya ghātinīm

क्षणं मूर्च्छां च सम्प्राप बभूव चेतनः पुनः ।गृहीत्वा तद्धनुर्दिव्यं यद्दत्तं विष्णुना पुरा॥ 31 ॥

kṣaṇaṃ mūrcchāṃ ca samprāpa babhūva cetanaḥ punaḥ | gṛhītvā taddhanurdivyaṃ yaddattaṃ viṣṇunā purā

रत्नेन्द्रसारनिर्माणयानमारुह्य कार्तिकः ।शस्त्रास्त्रं च गृहीत्वा च चकार रणमुल्बणम्॥ 32 ॥

ratnendrasāranirmāṇayānamāruhya kārtikaḥ | śastrāstraṃ ca gṛhītvā ca cakāra raṇamulbaṇam

सर्पांश्च पर्वतांश्चैव वृक्षांश्च प्रस्तरांस्तथा ।सर्वांश्चिच्छेद कोपेन दिव्यास्त्रेण शिवात्मजः॥ 33 ॥

sarpāṃśca parvatāṃścaiva vṛkṣāṃśca prastarāṃstathā | sarvāṃściccheda kopena divyāstreṇa śivātmajaḥ

वह्निं निर्वापयामास पार्जन्येन प्रतापवान् ।रथं धनुश्च चिच्छेद शङ्खचूडस्य लीलया॥ 34 ॥

vahniṃ nirvāpayāmāsa pārjanyena pratāpavān | rathaṃ dhanuśca ciccheda śaṅkhacūḍasya līlayā

सन्नाहं सारथिं चैव किरीटं मुकुटोज्ज्वलम् ।चिक्षेप शक्तिं शुक्लाभां दानवेन्द्रस्य वक्षसि॥ 35 ॥

sannāhaṃ sārathiṃ caiva kirīṭaṃ mukuṭojjvalam | cikṣepa śaktiṃ śuklābhāṃ dānavendrasya vakṣasi

मूर्च्छां सम्प्राप्य राजा च चेतनश्च बभूव ह ।आरुरोह यानमन्यद्धनुर्जग्राह सत्वरः॥ 36 ॥

mūrcchāṃ samprāpya rājā ca cetanaśca babhūva ha | āruroha yānamanyaddhanurjagrāha satvaraḥ

चकार शरजालं च मायया मायिनां वरः ।गुहं चच्छाद समरे शरजालेन नारद॥ 37 ॥

cakāra śarajālaṃ ca māyayā māyināṃ varaḥ | guhaṃ cacchāda samare śarajālena nārada

जग्राह शक्तिमव्यग्रां शतसूर्यसमप्रभाम् ।प्रलयाग्निशिखारूपां विष्णोश्च तेजसाऽऽवृताम्॥ 38 ॥

jagrāha śaktimavyagrāṃ śatasūryasamaprabhām | pralayāgniśikhārūpāṃ viṣṇośca tejasā''vṛtām

चिक्षेप तां च कोपेन महावेगेन कार्तिके ।पपात शक्तिस्तद्गात्रे वह्निराशिरिवोज्ज्वला॥ 39 ॥

cikṣepa tāṃ ca kopena mahāvegena kārtike | papāta śaktistadgātre vahnirāśirivojjvalā

मूर्च्छां सम्प्राप शक्त्या च कार्तिकेयो महाबलः ।काली गृहीत्वा तं क्रोडे निनाय शिवसनिधौ॥ 40 ॥

mūrcchāṃ samprāpa śaktyā ca kārtikeyo mahābalaḥ | kālī gṛhītvā taṃ kroḍe nināya śivasanidhau

शिवस्तं चापि ज्ञानेन जीवयामास लीलया ।ददौ बलमनन्तं च समुत्तस्थौ प्रतापवान्॥ 41 ॥

śivastaṃ cāpi jñānena jīvayāmāsa līlayā | dadau balamanantaṃ ca samuttasthau pratāpavān

काली जगाम समरं रक्षितुं कार्तिकस्य या ।वीरास्तामनुजग्मुश्च ते च नन्दीश्वरादयः॥ 42 ॥

kālī jagāma samaraṃ rakṣituṃ kārtikasya yā | vīrāstāmanujagmuśca te ca nandīśvarādayaḥ

सर्वे देवाश्च गन्धर्वा यक्षराक्षसकिन्नराः ।वाद्यभाण्डाश्च बहुशः शतशो मधुवाहकाः॥ 43 ॥

sarve devāśca gandharvā yakṣarākṣasakinnarāḥ | vādyabhāṇḍāśca bahuśaḥ śataśo madhuvāhakāḥ

सा च गत्वाथ सङ्ग्रामं सिंहनादं चकार च ।देव्याश्च सिंहनादेन प्रापुर्मूर्च्छां च दानवाः॥ 44 ॥

sā ca gatvātha saṅgrāmaṃ siṃhanādaṃ cakāra ca | devyāśca siṃhanādena prāpurmūrcchāṃ ca dānavāḥ

अट्टाट्टहासमशिवं चकार च पुनः पुनः ।दृष्ट्वा पपौ च माध्वीकं ननर्त रणमूर्धनि॥ 45 ॥

aṭṭāṭṭahāsamaśivaṃ cakāra ca punaḥ punaḥ | dṛṣṭvā papau ca mādhvīkaṃ nanarta raṇamūrdhani

उग्रदंष्ट्रा चोग्रदण्डा कोटवी च पपौ मधु ।योगिनीडाकिनीनां च गणाः सुरगणादयः॥ 46 ॥

ugradaṃṣṭrā cogradaṇḍā koṭavī ca papau madhu | yoginīḍākinīnāṃ ca gaṇāḥ suragaṇādayaḥ

दृष्ट्वा कालीं शङ्खचूडः शीघ्रमाजौ समाययौ ।दानवाश्च भयं प्रापू राजा तेभ्योऽभयं ददौ॥ 47 ॥

dṛṣṭvā kālīṃ śaṅkhacūḍaḥ śīghramājau samāyayau | dānavāśca bhayaṃ prāpū rājā tebhyo'bhayaṃ dadau

काली चिक्षेप वह्निं च प्रलयाग्निशिखोपमम् ।राजा निर्वापयामास पार्जन्येन च लीलया॥ 48 ॥

kālī cikṣepa vahniṃ ca pralayāgniśikhopamam | rājā nirvāpayāmāsa pārjanyena ca līlayā

चिक्षेप वारुणं सा च तीव्रं च महदद्भुतम् ।गान्धर्वेण च चिच्छेद दानवेन्द्रश्च लीलया॥ 49 ॥

cikṣepa vāruṇaṃ sā ca tīvraṃ ca mahadadbhutam | gāndharveṇa ca ciccheda dānavendraśca līlayā

माहेश्वरं प्रचिक्षेप काली वह्निशिखोपमम् ।राजा जघान तं शीघ्रं वैष्णवेन च लीलया॥ 50 ॥

māheśvaraṃ pracikṣepa kālī vahniśikhopamam | rājā jaghāna taṃ śīghraṃ vaiṣṇavena ca līlayā

नारायणास्त्रं सा देवी चिक्षेप मन्त्रपूर्वकम् ।राजा ननाम तद् दृष्ट्वा चावरुह्य रथादसौ॥ 51 ॥

nārāyaṇāstraṃ sā devī cikṣepa mantrapūrvakam | rājā nanāma tad dṛṣṭvā cāvaruhya rathādasau

ऊर्ध्वं जगाम तच्चास्त्रं प्रलयाग्निशिखोपमम् ।पपात शङ्खचूडश्च भक्त्या तं दण्डवद्भुवि॥ 52 ॥

ūrdhvaṃ jagāma taccāstraṃ pralayāgniśikhopamam | papāta śaṅkhacūḍaśca bhaktyā taṃ daṇḍavadbhuvi

ब्रह्मास्त्रं सा च चिक्षेप यत्नतो मन्त्रपूर्वकम् ।ब्रह्मास्त्रेण महाराजो निर्वापं च चकार सः॥ 53 ॥

brahmāstraṃ sā ca cikṣepa yatnato mantrapūrvakam | brahmāstreṇa mahārājo nirvāpaṃ ca cakāra saḥ

तदा चिक्षेप दिव्यास्त्रं सा देवी मन्त्रपूर्वकम् ।राजा दिव्यास्त्रजालेन तन्निर्वाणं चकार च॥ 54 ॥

tadā cikṣepa divyāstraṃ sā devī mantrapūrvakam | rājā divyāstrajālena tannirvāṇaṃ cakāra ca

तदा चिक्षेप शक्तिं च यत्नतो योजनायताम् ।राजा दिव्यास्त्रजालेन शतखण्डां चकार ह॥ 55 ॥

tadā cikṣepa śaktiṃ ca yatnato yojanāyatām | rājā divyāstrajālena śatakhaṇḍāṃ cakāra ha

जग्राह मन्त्रपूतं च देवी पाशुपतं रुषा ।निक्षेपणं निरोद्धुं च वाग्बभूवाशरीरिणी॥ 56 ॥

jagrāha mantrapūtaṃ ca devī pāśupataṃ ruṣā | nikṣepaṇaṃ niroddhuṃ ca vāgbabhūvāśarīriṇī

मृत्युः पाशुपते नास्ति नृपस्य च महात्मनः ।यावदस्ति च मन्त्रस्य कवचं च हरेरिति॥ 57 ॥

mṛtyuḥ pāśupate nāsti nṛpasya ca mahātmanaḥ | yāvadasti ca mantrasya kavacaṃ ca hareriti

यावत्सतीत्वमस्त्येव सत्याश्च नृपयोषितः ।तावदस्य जरामृत्युर्नास्तीति ब्रह्मणो वचः॥ 58 ॥

yāvatsatītvamastyeva satyāśca nṛpayoṣitaḥ | tāvadasya jarāmṛtyurnāstīti brahmaṇo vacaḥ

इत्याकर्ण्य भद्रकाली न तच्चिक्षेप शस्त्रकम् ।शतलक्षं दानवानां जग्रास लीलया क्षुधा॥ 59 ॥

ityākarṇya bhadrakālī na taccikṣepa śastrakam | śatalakṣaṃ dānavānāṃ jagrāsa līlayā kṣudhā

ग्रस्तुं जगाम वेगेन शङ्खचूडं भयङ्करी ।दिव्यास्त्रेण सुतीक्ष्णेन वारयामास दानवः॥ 60 ॥

grastuṃ jagāma vegena śaṅkhacūḍaṃ bhayaṅkarī | divyāstreṇa sutīkṣṇena vārayāmāsa dānavaḥ

खड्गं चिक्षेप सा देवी ग्रीष्मसूर्योपमं यथा ।दिव्यास्त्रेण दानवेन्द्रः शतखण्डं चकार सः॥ 61 ॥

khaḍgaṃ cikṣepa sā devī grīṣmasūryopamaṃ yathā | divyāstreṇa dānavendraḥ śatakhaṇḍaṃ cakāra saḥ

पुनर्ग्रस्तुं महादेवी वेगेन च जगाम तम् ।सर्वसिद्धेश्वरः श्रीमान्ववृधे दानवेश्वरः॥ 62 ॥

punargrastuṃ mahādevī vegena ca jagāma tam | sarvasiddheśvaraḥ śrīmānvavṛdhe dānaveśvaraḥ

वेगेन मुष्टिना काली कोपयुक्ता भयङ्करी ।बभञ्ज च रथं तस्य जघान सारथिं सती॥ 63 ॥

vegena muṣṭinā kālī kopayuktā bhayaṅkarī | babhañja ca rathaṃ tasya jaghāna sārathiṃ satī

सा च शूलं प्रचिक्षेप प्रलयाग्निशिखोपमम् ।वामहस्तेन जग्राह शङ्खचूडः स्वलीलया॥ 64 ॥

sā ca śūlaṃ pracikṣepa pralayāgniśikhopamam | vāmahastena jagrāha śaṅkhacūḍaḥ svalīlayā

मुष्ट्या जघान तं देवी महाकोपेन वेगतः ।बभ्राम च तया दैत्यः क्षणं मूर्च्छामवाप च॥ 65 ॥

muṣṭyā jaghāna taṃ devī mahākopena vegataḥ | babhrāma ca tayā daityaḥ kṣaṇaṃ mūrcchāmavāpa ca

क्षणेन चेतनां प्राप्य समुत्तस्थौ प्रतापवान् ।न चकार बाहुयुद्धं देव्या सह ननाम ताम्॥ 66 ॥

kṣaṇena cetanāṃ prāpya samuttasthau pratāpavān | na cakāra bāhuyuddhaṃ devyā saha nanāma tām

देव्याश्चास्त्रं स चिच्छेद जग्राह च स्वतेजसा ।नास्त्रं चिक्षेप तां भक्तो मातृभक्त्या तु वैष्णवः॥ 67 ॥

devyāścāstraṃ sa ciccheda jagrāha ca svatejasā | nāstraṃ cikṣepa tāṃ bhakto mātṛbhaktyā tu vaiṣṇavaḥ

गृहीत्वा दानवं देवी भ्रामयित्वा पुनः पुनः ।ऊर्ध्वं च प्रापयामास महावेगेन कोपिता॥ 68 ॥

gṛhītvā dānavaṃ devī bhrāmayitvā punaḥ punaḥ | ūrdhvaṃ ca prāpayāmāsa mahāvegena kopitā

ऊर्ध्वात्पपात वेगेन शङ्खचूडः प्रतापवान् ।निपत्य च समुत्तस्थौ प्रणम्य भद्रकालिकाम्॥ 69 ॥

ūrdhvātpapāta vegena śaṅkhacūḍaḥ pratāpavān | nipatya ca samuttasthau praṇamya bhadrakālikām

रत्नेन्द्रसारनिर्माणं विमानं सुमनोहरम् ।आरुरोह हर्षयुक्तो न विश्रान्तो महारणे॥ 70 ॥

ratnendrasāranirmāṇaṃ vimānaṃ sumanoharam | āruroha harṣayukto na viśrānto mahāraṇe

दानवानां च क्षतजं सा देवी च पपौ क्षुधा ।पीत्वा भुक्त्वा भद्रकाली जगाम शङ्करान्तिकम्॥ 71 ॥

dānavānāṃ ca kṣatajaṃ sā devī ca papau kṣudhā | pītvā bhuktvā bhadrakālī jagāma śaṅkarāntikam

उवाच रणवृत्तान्तं पौर्वापर्यं यथाक्रमम् ।श्रुत्वा जहास शम्भुश्च दानवानां विनाशनम्॥ 72 ॥

uvāca raṇavṛttāntaṃ paurvāparyaṃ yathākramam | śrutvā jahāsa śambhuśca dānavānāṃ vināśanam

लक्षं च दानवेन्द्राणामवशिष्टं रणेऽधुना ।भुञ्जन्त्या निर्गतं वक्त्रात्तदन्यं भुक्तमीश्वर॥ 73 ॥

lakṣaṃ ca dānavendrāṇāmavaśiṣṭaṃ raṇe'dhunā | bhuñjantyā nirgataṃ vaktrāttadanyaṃ bhuktamīśvara

सङ्ग्रामे दानवेन्द्रं च हन्तुं पाशुपतेन वै ।अवध्यस्तव राजेति वाग्बभूवाशरीरिणी॥ 74 ॥

saṅgrāme dānavendraṃ ca hantuṃ pāśupatena vai | avadhyastava rājeti vāgbabhūvāśarīriṇī

राजेन्द्रश्च महाज्ञानी महाबलपराक्रमः ।न च चिक्षेप मय्यस्त्रं चिच्छेद मम सायकम्॥ 75 ॥

rājendraśca mahājñānī mahābalaparākramaḥ | na ca cikṣepa mayyastraṃ ciccheda mama sāyakam