Skandha 9, Adhyāya 42

नारद उवाच ।हरेरुत्कीर्तनं भद्रं श्रुतं तज्ज्ञानमुत्तमम् ।ईप्सितं लक्ष्म्युपाख्यानं ध्यानं स्तोत्रं वद प्रभो॥ 1 ॥

nārada uvāca | harerutkīrtanaṃ bhadraṃ śrutaṃ tajjñānamuttamam | īpsitaṃ lakṣmyupākhyānaṃ dhyānaṃ stotraṃ vada prabho

श्रीनारायण उवाच ।स्नात्वा तीर्थे पुरा शक्रो धृत्वा धौते च वाससी ।घटं संस्थाप्य क्षीरोदे षड्देवान् पर्यपूजयत्॥ 2 ॥

śrīnārāyaṇa uvāca | snātvā tīrthe purā śakro dhṛtvā dhaute ca vāsasī | ghaṭaṃ saṃsthāpya kṣīrode ṣaḍdevān paryapūjayat

गणेशं च दिनेशं च वह्निं विष्णुं शिवं शिवाम् ।एतान् भक्त्या समभ्यर्च्य पुष्पगन्धादिभिस्तदा॥ 3 ॥

gaṇeśaṃ ca dineśaṃ ca vahniṃ viṣṇuṃ śivaṃ śivām | etān bhaktyā samabhyarcya puṣpagandhādibhistadā

आवाह्य च महालक्ष्मीं परमैश्वर्यरूपिणीम् ।पूजाञ्चकार देवेशो ब्रह्मणा च पुरोधसा॥ 4 ॥

āvāhya ca mahālakṣmīṃ paramaiśvaryarūpiṇīm | pūjāñcakāra deveśo brahmaṇā ca purodhasā

पुरःस्थितेषु मुनिषु ब्राह्मणेषु गुरौ हरौ ।देवादिषु सुदेशे च ज्ञानानन्दं शिवे मुने॥ 5 ॥

puraḥsthiteṣu muniṣu brāhmaṇeṣu gurau harau | devādiṣu sudeśe ca jñānānandaṃ śive mune

पारिजातस्य पुष्पं च गृहीत्वा चन्दनोक्षितम् ।ध्यात्वा देवीं महालक्ष्मीं पूजयामास नारद॥ 6 ॥

pārijātasya puṣpaṃ ca gṛhītvā candanokṣitam | dhyātvā devīṃ mahālakṣmīṃ pūjayāmāsa nārada

ध्यानं च सामवेदोक्तं यद्दत्तं ब्रह्मणे पुरा ।हरिणा तेन ध्यानेन तन्निबोध वदामि ते॥ 7 ॥

dhyānaṃ ca sāmavedoktaṃ yaddattaṃ brahmaṇe purā | hariṇā tena dhyānena tannibodha vadāmi te

सहस्रदलपद्मस्थकर्णिकावासिनीं पराम् ।शरत्पार्वणकोटीन्दुप्रभामुष्टिकरां पराम्॥ 8 ॥

sahasradalapadmasthakarṇikāvāsinīṃ parām | śaratpārvaṇakoṭīnduprabhāmuṣṭikarāṃ parām

स्वतेजसा प्रज्वलन्तीं सुखदृश्यां मनोहराम् ।प्रतप्तकाञ्चननिभशोभां मूर्तिमतीं सतीम्॥ 9 ॥

svatejasā prajvalantīṃ sukhadṛśyāṃ manoharām | prataptakāñcananibhaśobhāṃ mūrtimatīṃ satīm

रत्नभूषणभूषाढ्यां शोभितां पीतवाससा ।ईषद्धास्यप्रसन्नास्यां शश्वत्सुस्थिरयौवनाम्॥ 10 ॥

ratnabhūṣaṇabhūṣāḍhyāṃ śobhitāṃ pītavāsasā | īṣaddhāsyaprasannāsyāṃ śaśvatsusthirayauvanām

सर्वसम्पत्प्रदात्रीं च महालक्ष्मीं भजे शुभाम् ।ध्यानेनानेन तां ध्यात्वा नानागुणसमन्विताम्॥ 11 ॥

sarvasampatpradātrīṃ ca mahālakṣmīṃ bhaje śubhām | dhyānenānena tāṃ dhyātvā nānāguṇasamanvitām

सम्पूज्य ब्रह्मवाक्येन चोपचाराणि षोडश ।ददौ भक्त्या विधानेन प्रत्येकं मन्त्रपूर्वकम्॥ 12 ॥

sampūjya brahmavākyena copacārāṇi ṣoḍaśa | dadau bhaktyā vidhānena pratyekaṃ mantrapūrvakam

प्रशस्तानि प्रकृष्टानि वराणि विविधानि च ।अमूल्यरत्नसारं च निर्मितं विश्वकर्मणा॥ 13 ॥

praśastāni prakṛṣṭāni varāṇi vividhāni ca | amūlyaratnasāraṃ ca nirmitaṃ viśvakarmaṇā

आसनं च विचित्रं च महालक्ष्मि प्रगृह्यताम् ।शुद्धं गङ्गोदकमिदं सर्ववन्दितमीप्सितम्॥ 14 ॥

āsanaṃ ca vicitraṃ ca mahālakṣmi pragṛhyatām | śuddhaṃ gaṅgodakamidaṃ sarvavanditamīpsitam

पापेध्मवह्निरूपं च गृह्यतां कमलालये ।पुष्पचन्दनदूर्वादिसंयुतं जाह्नवीजलम्॥ 15 ॥

pāpedhmavahnirūpaṃ ca gṛhyatāṃ kamalālaye | puṣpacandanadūrvādisaṃyutaṃ jāhnavījalam

शङ्खगर्भस्थितं स्वर्घ्यं गृह्यतां पद्मवासिनि ।सुगन्धिपुष्पतैलं च सुगन्धामलकीफलम्॥ 16 ॥

śaṅkhagarbhasthitaṃ svarghyaṃ gṛhyatāṃ padmavāsini | sugandhipuṣpatailaṃ ca sugandhāmalakīphalam

देहसौन्दर्यबीजं च गृह्यतां श्रीहरेः प्रिये ।कार्पासजं च कृमिजं वसनं देवि गृह्यताम्॥ 17 ॥

dehasaundaryabījaṃ ca gṛhyatāṃ śrīhareḥ priye | kārpāsajaṃ ca kṛmijaṃ vasanaṃ devi gṛhyatām

रत्नस्वर्णविकारं च देहभूषाविवर्धनम् ।शोभायै श्रीकरं रत्नं भूषणं देवि गृह्यताम्॥ 18 ॥

ratnasvarṇavikāraṃ ca dehabhūṣāvivardhanam | śobhāyai śrīkaraṃ ratnaṃ bhūṣaṇaṃ devi gṛhyatām

सर्वसौन्दर्यबीजं च सद्यः शोभाकरं परम् ।वृक्षनिर्यासरूपं च गन्धद्रव्यादिसंयुतम्॥ 19 ॥

sarvasaundaryabījaṃ ca sadyaḥ śobhākaraṃ param | vṛkṣaniryāsarūpaṃ ca gandhadravyādisaṃyutam

श्रीकृष्णकान्ते धूपं च पवित्रं प्रतिगृह्यताम् ।सुगन्धियुक्तं सुखदं चन्दनं देवि गृह्यताम्॥ 20 ॥

śrīkṛṣṇakānte dhūpaṃ ca pavitraṃ pratigṛhyatām | sugandhiyuktaṃ sukhadaṃ candanaṃ devi gṛhyatām

जगच्चक्षुःस्वरूपं च पवित्रं तिमिरापहम् ।प्रदीपं सुखरूपं च गृह्यतां च सुरेश्वरि॥ 21 ॥

jagaccakṣuḥsvarūpaṃ ca pavitraṃ timirāpaham | pradīpaṃ sukharūpaṃ ca gṛhyatāṃ ca sureśvari

नानोपहाररूपं च नानारससमन्वितम् ।अतिस्वादुकरं चैव नैवेद्यं प्रतिगृह्यताम्॥ 22 ॥

nānopahārarūpaṃ ca nānārasasamanvitam | atisvādukaraṃ caiva naivedyaṃ pratigṛhyatām

अन्नं ब्रह्मस्वरूपं च प्राणरक्षणकारणम् ।तुष्टिदं पुष्टिदं चैव देव्यन्नं प्रतिगृह्यताम्॥ 23 ॥

annaṃ brahmasvarūpaṃ ca prāṇarakṣaṇakāraṇam | tuṣṭidaṃ puṣṭidaṃ caiva devyannaṃ pratigṛhyatām

शाल्यन्नजं सुपक्वं च शर्करागव्यसंयुतम् ।स्वादुयुक्तं महालक्ष्मि परमान्नं प्रगृह्यताम्॥ 24 ॥

śālyannajaṃ supakvaṃ ca śarkarāgavyasaṃyutam | svāduyuktaṃ mahālakṣmi paramānnaṃ pragṛhyatām

शर्करागव्यपक्वं च सुस्वादु सुमनोहरम् ।स्वस्तिकं नाम नैवेद्यं गृहाण परमेश्वरि॥ 25 ॥

śarkarāgavyapakvaṃ ca susvādu sumanoharam | svastikaṃ nāma naivedyaṃ gṛhāṇa parameśvari

नानाविधानि रम्याणि पक्वान्नानि फलानि च ।सुरभिस्तनसन्त्यक्तं सुस्वादु सुमनोहरम्॥ 26 ॥

nānāvidhāni ramyāṇi pakvānnāni phalāni ca | surabhistanasantyaktaṃ susvādu sumanoharam

मर्त्यामृतं सुगव्यं च गृह्यतामच्युतप्रिये ।सुस्वादु रससंयुक्तमिक्षुवृक्षसमुद्भवम्॥ 27 ॥

martyāmṛtaṃ sugavyaṃ ca gṛhyatāmacyutapriye | susvādu rasasaṃyuktamikṣuvṛkṣasamudbhavam

अग्निपक्वमतिस्वादु गुडं च प्रतिगृह्यताम् ।यवगोधूमसस्यानां चूर्णरेणुसमुद्भवम्॥ 28 ॥

agnipakvamatisvādu guḍaṃ ca pratigṛhyatām | yavagodhūmasasyānāṃ cūrṇareṇusamudbhavam

सुपक्वं गुडगव्याक्तं मिष्टान्नं देवि गृह्यताम् ।सस्यचूर्णोद्भवं पक्वं स्वस्तिकादिसमन्वितम्॥ 29 ॥

supakvaṃ guḍagavyāktaṃ miṣṭānnaṃ devi gṛhyatām | sasyacūrṇodbhavaṃ pakvaṃ svastikādisamanvitam

मया निवेदितं भक्त्या नैवेद्यं प्रतिगृह्यताम् ।शीतवायुप्रदं चैव दाहे च सुखदं परम्॥ 30 ॥

mayā niveditaṃ bhaktyā naivedyaṃ pratigṛhyatām | śītavāyupradaṃ caiva dāhe ca sukhadaṃ param

कमले गृह्यतां चेदं व्यजनं श्वेतचामरम् ।ताम्बूलं च वरं रम्यं कर्पूरादिसुवासितम्॥ 31 ॥

kamale gṛhyatāṃ cedaṃ vyajanaṃ śvetacāmaram | tāmbūlaṃ ca varaṃ ramyaṃ karpūrādisuvāsitam

जिह्वाजाड्यच्छेदकरं ताम्बूलं प्रतिगृह्यताम् ।सुवासितं सुशीतं च पिपासानाशकारणम्॥ 32 ॥

jihvājāḍyacchedakaraṃ tāmbūlaṃ pratigṛhyatām | suvāsitaṃ suśītaṃ ca pipāsānāśakāraṇam

जगज्जीवनरूपं च जीवनं देवि गृह्यताम् ।देहसौन्दर्यबीजं च सदा शोभाविवर्धनम्॥ 33 ॥

jagajjīvanarūpaṃ ca jīvanaṃ devi gṛhyatām | dehasaundaryabījaṃ ca sadā śobhāvivardhanam

कार्पासजं च कृमिजं वसनं देवि गृह्यताम् ।रक्तस्वर्णविकारं च देहभूषादिवर्धनम्॥ 34 ॥

kārpāsajaṃ ca kṛmijaṃ vasanaṃ devi gṛhyatām | raktasvarṇavikāraṃ ca dehabhūṣādivardhanam

शोभाधारं श्रीकरं च भूषणं देवि गृह्यताम् ।नानाऋतुषु निर्माणं बहुशोभाश्रयं परम्॥ 35 ॥

śobhādhāraṃ śrīkaraṃ ca bhūṣaṇaṃ devi gṛhyatām | nānāṛtuṣu nirmāṇaṃ bahuśobhāśrayaṃ param

सुरभूपप्रियं शुद्धं माल्यं देवि प्रगृह्यताम् ।शुद्धिदं शुद्धरूपं च सर्वमङ्गलमङ्गलम्॥ 36 ॥

surabhūpapriyaṃ śuddhaṃ mālyaṃ devi pragṛhyatām | śuddhidaṃ śuddharūpaṃ ca sarvamaṅgalamaṅgalam

गन्धवस्तूद्भवं रम्यं गन्धं देवि प्रगृह्यताम् ।पुण्यतीर्थोदकं चैव विशुद्धं शुद्धिदं सदा॥ 37 ॥

gandhavastūdbhavaṃ ramyaṃ gandhaṃ devi pragṛhyatām | puṇyatīrthodakaṃ caiva viśuddhaṃ śuddhidaṃ sadā

गृह्यतां कृष्णकान्ते त्वं रम्यमाचमनीयकम् ।रत्नसारादिनिर्माणं पुष्पचन्दनचर्चितम्॥ 38 ॥

gṛhyatāṃ kṛṣṇakānte tvaṃ ramyamācamanīyakam | ratnasārādinirmāṇaṃ puṣpacandanacarcitam

रत्नभूषणभूषाढ्यं सुतल्पं देवि गृह्यताम् ।यद्यद् द्रव्यमपूर्वं च पृथिव्यामपि दुर्लभम्॥ 39 ॥

ratnabhūṣaṇabhūṣāḍhyaṃ sutalpaṃ devi gṛhyatām | yadyad dravyamapūrvaṃ ca pṛthivyāmapi durlabham

देवभूषार्हभोग्यं च तद् द्रव्यं देवि गृह्यताम् ।द्रव्याण्येतानि दत्त्वा च मूलेन देवपुङ्गवः॥ 40 ॥

devabhūṣārhabhogyaṃ ca tad dravyaṃ devi gṛhyatām | dravyāṇyetāni dattvā ca mūlena devapuṅgavaḥ

मूलं जजाप भक्त्या च दशलक्षं विधानतः ।जपेन दशलक्षेण मन्त्रसिद्धिर्बभूव ह॥ 41 ॥

mūlaṃ jajāpa bhaktyā ca daśalakṣaṃ vidhānataḥ | japena daśalakṣeṇa mantrasiddhirbabhūva ha

मन्त्रश्च ब्रह्मणा दत्तः कल्पवृक्षश्च सर्वतः ।लक्ष्मीर्माया कामवाणी ङेऽन्ता कमलवासिनी॥ 42 ॥

mantraśca brahmaṇā dattaḥ kalpavṛkṣaśca sarvataḥ | lakṣmīrmāyā kāmavāṇī ṅe'ntā kamalavāsinī

वैदिको मन्त्रराजोऽयं प्रसिद्धः स्वाहयान्वितः ।कुबेरोऽनेन मन्त्रेण परमैश्वर्यमाप्तवान्॥ 43 ॥

vaidiko mantrarājo'yaṃ prasiddhaḥ svāhayānvitaḥ | kubero'nena mantreṇa paramaiśvaryamāptavān

राजराजेश्वरो दक्षः सावर्णिर्मनुरेव च ।मङ्गलोऽनेन मन्त्रेण सप्तद्वीपेऽवनीपतिः॥ 44 ॥

rājarājeśvaro dakṣaḥ sāvarṇirmanureva ca | maṅgalo'nena mantreṇa saptadvīpe'vanīpatiḥ

प्रियव्रतोत्तानपादौ केदारो नृप एव च ।एते सिद्धाश्च राजेन्द्रा मन्त्रेणानेन नारद॥ 45 ॥

priyavratottānapādau kedāro nṛpa eva ca | ete siddhāśca rājendrā mantreṇānena nārada

सिद्धे मन्त्रे महालक्ष्मीः शक्राय दर्शनं ददौ ।रत्नेन्द्रसारनिर्माणविमानस्था वरप्रदा॥ 46 ॥

siddhe mantre mahālakṣmīḥ śakrāya darśanaṃ dadau | ratnendrasāranirmāṇavimānasthā varapradā

सप्तद्वीपवतीं पृथ्वीं छादयन्ती त्विषा च सा ।श्वेतचम्पकवर्णाभा रत्नभूषणभूषिता॥ 47 ॥

saptadvīpavatīṃ pṛthvīṃ chādayantī tviṣā ca sā | śvetacampakavarṇābhā ratnabhūṣaṇabhūṣitā

ईषद्धास्यप्रसन्नास्या भक्तानुग्रहकातरा ।बिभ्रती रत्नमालां च कोटिचन्द्रसमप्रभाम्॥ 48 ॥

īṣaddhāsyaprasannāsyā bhaktānugrahakātarā | bibhratī ratnamālāṃ ca koṭicandrasamaprabhām

दृष्ट्वा जगत्प्रसूं शान्तां तुष्टावैतां पुरन्दरः ।पुलकाञ्चितसर्वाङ्गः साश्रुनेत्रः कृताञ्जलिः॥ 49 ॥

dṛṣṭvā jagatprasūṃ śāntāṃ tuṣṭāvaitāṃ purandaraḥ | pulakāñcitasarvāṅgaḥ sāśrunetraḥ kṛtāñjaliḥ

ब्रह्मणा च प्रदत्तेन स्तोत्रराजेन संयुतः ।सर्वाभीष्टप्रदेनैव वैदिकेनैव तत्र च॥ 50 ॥

brahmaṇā ca pradattena stotrarājena saṃyutaḥ | sarvābhīṣṭapradenaiva vaidikenaiva tatra ca

पुरन्दर उवाच ।नमः कमलवासिन्यै नारायण्यै नमो नमः ।कृष्णप्रियायै सततं महालक्ष्यै नमो नमः॥ 51 ॥

purandara uvāca | namaḥ kamalavāsinyai nārāyaṇyai namo namaḥ | kṛṣṇapriyāyai satataṃ mahālakṣyai namo namaḥ

पद्मपत्रेक्षणायै च पद्मास्यायै नमो नमः ।पद्मासनायै पद्मिन्यै वैष्णव्यै च नमो नमः॥ 52 ॥

padmapatrekṣaṇāyai ca padmāsyāyai namo namaḥ | padmāsanāyai padminyai vaiṣṇavyai ca namo namaḥ

सर्वसम्पत्स्वरूपिण्यै सर्वाराध्यै नमो नमः ।हरिभक्तिप्रदात्र्यै च हर्षदात्र्यै नमो नमः॥ 53 ॥

sarvasampatsvarūpiṇyai sarvārādhyai namo namaḥ | haribhaktipradātryai ca harṣadātryai namo namaḥ

कृष्णवक्षःस्थितायै च कृष्णेशायै नमो नमः ।चन्द्रशोभास्वरूपायै रत्नपद्मे च शोभने॥ 54 ॥

kṛṣṇavakṣaḥsthitāyai ca kṛṣṇeśāyai namo namaḥ | candraśobhāsvarūpāyai ratnapadme ca śobhane

सम्पत्त्यधिष्ठातृदेव्यै महादेव्यै नमो नमः ।नमो वृद्धिस्वरूपायै वृद्धिदायै नमो नमः॥ 55 ॥

sampattyadhiṣṭhātṛdevyai mahādevyai namo namaḥ | namo vṛddhisvarūpāyai vṛddhidāyai namo namaḥ

वैकुण्ठे या महालक्ष्मीर्या लक्ष्मीः क्षीरसागरे ।स्वर्गलक्ष्मीरिन्द्रगेहे राजलक्ष्मीर्नृपालये॥ 56 ॥

vaikuṇṭhe yā mahālakṣmīryā lakṣmīḥ kṣīrasāgare | svargalakṣmīrindragehe rājalakṣmīrnṛpālaye

गृहलक्ष्मीश्च गृहिणां गेहे च गृहदेवता ।सुरभिः सागरे जाता दक्षिणा यज्ञकामिनी॥ 57 ॥

gṛhalakṣmīśca gṛhiṇāṃ gehe ca gṛhadevatā | surabhiḥ sāgare jātā dakṣiṇā yajñakāminī

अदितिर्देवमाता त्वं कमला कमलालया ।स्वाहा त्वं च हविर्दाने कव्यदाने स्वधा स्मृता॥ 58 ॥

aditirdevamātā tvaṃ kamalā kamalālayā | svāhā tvaṃ ca havirdāne kavyadāne svadhā smṛtā

त्वं हि विष्णुस्वरूपा च सर्वाधारा वसुन्धरा ।शुद्धसत्त्वस्वरूपा त्वं नारायणपरायणा॥ 59 ॥

tvaṃ hi viṣṇusvarūpā ca sarvādhārā vasundharā | śuddhasattvasvarūpā tvaṃ nārāyaṇaparāyaṇā

क्रोधहिंसावर्जिता च वरदा शारदा शुभा ।परमार्थप्रदा त्वं च हरिदास्यप्रदा परा॥ 60 ॥

krodhahiṃsāvarjitā ca varadā śāradā śubhā | paramārthapradā tvaṃ ca haridāsyapradā parā

यया विना जगत्सर्वं भस्मीभूतमसारकम् ।जीवन्मृतं च विश्वं च शश्वत्सर्वं यया विना॥ 61 ॥

yayā vinā jagatsarvaṃ bhasmībhūtamasārakam | jīvanmṛtaṃ ca viśvaṃ ca śaśvatsarvaṃ yayā vinā

सर्वेषां च परा माता सर्वबान्धवरूपिणी ।धर्मार्थकाममोक्षाणां त्वं च कारणरूपिणी॥ 62 ॥

sarveṣāṃ ca parā mātā sarvabāndhavarūpiṇī | dharmārthakāmamokṣāṇāṃ tvaṃ ca kāraṇarūpiṇī

यथा माता स्तनान्धानां शिशूनां शैशवे सदा ।तथा त्वं सर्वदा माता सर्वेषां सर्वरूपतः॥ 63 ॥

yathā mātā stanāndhānāṃ śiśūnāṃ śaiśave sadā | tathā tvaṃ sarvadā mātā sarveṣāṃ sarvarūpataḥ

मातृहीनः स्तनान्धस्तु स च जीवति दैवतः ।त्वया हीनो जनः कोऽपि न जीवत्येव निश्चितम्॥ 64 ॥

mātṛhīnaḥ stanāndhastu sa ca jīvati daivataḥ | tvayā hīno janaḥ ko'pi na jīvatyeva niścitam

सुप्रसन्नस्वरूपा त्वं मां प्रसन्ना भवाम्बिके ।वैरिग्रस्तं च विषयं देहि मह्यं सनातनि॥ 65 ॥

suprasannasvarūpā tvaṃ māṃ prasannā bhavāmbike | vairigrastaṃ ca viṣayaṃ dehi mahyaṃ sanātani

अहं यावत्त्वया हीनो बन्धुहीनश्च भिक्षुकः ।सर्वसम्पद्विहीनश्च तावदेव हरिप्रिये॥ 66 ॥

ahaṃ yāvattvayā hīno bandhuhīnaśca bhikṣukaḥ | sarvasampadvihīnaśca tāvadeva haripriye

ज्ञानं देहि च धर्मं च सर्वसौभाग्यमीप्सितम् ।प्रभावञ्च प्रतापं च सर्वाधिकारमेव च॥ 67 ॥

jñānaṃ dehi ca dharmaṃ ca sarvasaubhāgyamīpsitam | prabhāvañca pratāpaṃ ca sarvādhikārameva ca

जयं पराक्रमं युद्धे परमैश्वर्यमेव च ।इत्युक्त्वा च महेन्द्रश्च सर्वैः सुरगणैः सह॥ 68 ॥

jayaṃ parākramaṃ yuddhe paramaiśvaryameva ca | ityuktvā ca mahendraśca sarvaiḥ suragaṇaiḥ saha

प्रणनाम साश्रुनेत्रो मूर्ध्ना चैव पुनः पुनः ।ब्रह्मा च शङ्करश्चैव शेषो धर्मश्च केशवः॥ 69 ॥

praṇanāma sāśrunetro mūrdhnā caiva punaḥ punaḥ | brahmā ca śaṅkaraścaiva śeṣo dharmaśca keśavaḥ

सर्वे चक्रुः परीहारं सुरार्थे च पुनः पुनः ।देवेभ्यश्च वरं दत्त्वा पुष्पमालां मनोहराम्॥ 70 ॥

sarve cakruḥ parīhāraṃ surārthe ca punaḥ punaḥ | devebhyaśca varaṃ dattvā puṣpamālāṃ manoharām

केशवाय ददौ लक्ष्मीः सन्तुष्टा सुरसंसदि ।ययुर्देवाश्च सन्तुष्टाः स्वं स्वं स्थानं च नारद॥ 71 ॥

keśavāya dadau lakṣmīḥ santuṣṭā surasaṃsadi | yayurdevāśca santuṣṭāḥ svaṃ svaṃ sthānaṃ ca nārada

देवी ययौ हरेः स्थानं हृष्टा क्षीरोदशायिनः ।ययतुश्चैव स्वगृहं ब्रह्मेशानौ च नारद॥ 72 ॥

devī yayau hareḥ sthānaṃ hṛṣṭā kṣīrodaśāyinaḥ | yayatuścaiva svagṛhaṃ brahmeśānau ca nārada

दत्त्वा शुभाशिषं तौ च देवेभ्यः प्रीतिपूर्वकम् ।इदं स्तोत्रं महापुण्यं त्रिसन्ध्यं यः पठेन्नरः॥ 73 ॥

dattvā śubhāśiṣaṃ tau ca devebhyaḥ prītipūrvakam | idaṃ stotraṃ mahāpuṇyaṃ trisandhyaṃ yaḥ paṭhennaraḥ

कुबेरतुल्यः स भवेद्राजराजेश्वरो महान् ।पञ्चलक्षजपेनैव स्तोत्रसिद्धिर्भवेन्नृणाम्॥ 74 ॥

kuberatulyaḥ sa bhavedrājarājeśvaro mahān | pañcalakṣajapenaiva stotrasiddhirbhavennṛṇām

सिद्धस्तोत्रं यदि पठेन्मासमेकं तु सन्ततम् ।महासुखी च राजेन्द्रो भविष्यति न संशयः॥ 75 ॥

siddhastotraṃ yadi paṭhenmāsamekaṃ tu santatam | mahāsukhī ca rājendro bhaviṣyati na saṃśayaḥ