पद १५१

जौ पै चेराई रामकी करतो न लजातो ।तौ तू दाम कुदाम ज्यों कर-कर न बिकातो॥ 1 ॥

jau pai cerāī rāmakī karato na lajāto | tau tū dāma kudāma jyoṃ kara-kara na bikāto

जपत जीह रघुनाथको नाम नहिं अलसातो ।बाजीगरके सूम ज्यों खल खेह न खातो॥ 2 ॥

japata jīha raghunāthako nāma nahiṃ alasāto | bājīgarake sūma jyoṃ khala kheha na khāto

जौ तू मन! मेरे कहे राम-नाम कमातो ।सीतापति सनमुख सुखी सब ठाँव समातो॥ 3 ॥

jau tū mana! mere kahe rāma-nāma kamāto | sītāpati sanamukha sukhī saba ṭhā~va samāto

राम सोहाते तोहिं जौ तू सर्बहिं सोहातो ।काल करम कुल कारनी कोऊ न कोहातो॥ 4 ॥

rāma sohāte tohiṃ jau tū sarbahiṃ sohāto | kāla karama kula kāranī koū na kohāto

राम-नाम अनुरागही जिय जो रतिआतो ।स्वारथ-परमारथ-पथी तोहिं सब पतिआतो॥ 5 ॥

rāma-nāma anurāgahī jiya jo ratiāto | svāratha-paramāratha-pathī tohiṃ saba patiāto

सेइ साधु सुनि समुझि कै पर-पीर पिरातो ।जनम कोटिको काँदलो हृद-हृदय थिरातो॥ 6 ॥

sei sādhu suni samujhi kai para-pīra pirāto | janama koṭiko kā~dalo hṛda-hṛdaya thirāto

भव-मग अगम अनंत है, बिनु श्रमहि सिरातो ।महिमा उलटे नामकी मुनि कियो किरातो॥ 7 ॥

bhava-maga agama anaṃta hai, binu śramahi sirāto | mahimā ulaṭe nāmakī muni kiyo kirāto

अमर-अगम तनु पाइ सो जड़ जाय न जातो ।होतो मंगल-मूल तू, अनुकूल बिधातो॥ 8 ॥

amara-agama tanu pāi so jaḍa़ jāya na jāto | hoto maṃgala-mūla tū, anukūla bidhāto

जो मन, प्रीति-प्रतीतिसों राम-नामहिं रातो ।तुलसी रामप्रसादसों तिहुँताप न तातो॥ 9 ॥

jo mana, prīti-pratītisoṃ rāma-nāmahiṃ rāto | tulasī rāmaprasādasoṃ tihu~tāpa na tāto