पद १७१

कीजै मोको जमजातनामई ।राम! तुम-से सुचि सुहृद साहिबहिं, मैं सठ पीठि दई॥ 1 ॥

kījai moko jamajātanāmaī | rāma! tuma-se suci suhṛda sāhibahiṃ, maiṃ saṭha pīṭhi daī

गरभबास दस मास पालि पितु-मातु-रूप हित कीन्हों ।जड़हिं बिबेक, सुसील खलहिं, अपराधिहिं आदर दीन्हों॥ 2 ॥

garabhabāsa dasa māsa pāli pitu-mātu-rūpa hita kīnhoṃ | jaḍa़hiṃ bibeka, susīla khalahiṃ, aparādhihiṃ ādara dīnhoṃ

कपट करौं अंतरजामिहुँ सों, अघ ब्यापकहिं दुरावौं ।ऐसेहु कुमति कुसेवक पर रघुपति न कियो मन बावौं॥ 3 ॥

kapaṭa karauṃ aṃtarajāmihu~ soṃ, agha byāpakahiṃ durāvauṃ | aisehu kumati kusevaka para raghupati na kiyo mana bāvauṃ

उदर भरौं किंकर कहाइ बेंच्यौं बिषयनि हाथ हियो है ।मोसे बंचकको कृपालु छल छाँड़ि कै छोह कियो है॥ 4 ॥

udara bharauṃ kiṃkara kahāi beṃcyauṃ biṣayani hātha hiyo hai | mose baṃcakako kṛpālu chala chā~ḍa़i kai choha kiyo hai

पल-पलके उपकार रावरे जानि बूझि सुनि नीके ।भिद्यो न कुलिसहुँ ते कठोर चित कबहुँ प्रेम सिय-पीके॥ 5 ॥

pala-palake upakāra rāvare jāni būjhi suni nīke | bhidyo na kulisahu~ te kaṭhora cita kabahu~ prema siya-pīke

स्वामीकी सेवक-हितता सब, कछु निज साँइँ-द्रोहाई ।मैं मति-तुला तौलि देखी भइ मेरेहि दिसि गरुआई॥ 6 ॥

svāmīkī sevaka-hitatā saba, kachu nija sā~i~-drohāī | maiṃ mati-tulā tauli dekhī bhai merehi disi garuāī

एतेहु पर हित करत नाथ मेरो, करि आये, अरु करिहैं ।तुलसी अपनी ओर जानियत प्रभुहि कनौड़ो भरिहैं॥ 7 ॥

etehu para hita karata nātha mero, kari āye, aru karihaiṃ | tulasī apanī ora jāniyata prabhuhi kanauḍa़o bharihaiṃ