पद १८८

मैं तोहिं अब जान्यो संसार ।बाँधि न सकहिं मोहिं हरिके बल, प्रगट कपट-आगार॥ 1 ॥

maiṃ tohiṃ aba jānyo saṃsāra | bā~dhi na sakahiṃ mohiṃ harike bala, pragaṭa kapaṭa-āgāra

देखत ही कमनीय, कछू नाहिंन पुनि किये बिचार ।ज्यों कदलीतरु-मध्य निहारत, कबहुँ न निकसत सार॥ 2 ॥

dekhata hī kamanīya, kachū nāhiṃna puni kiye bicāra | jyoṃ kadalītaru-madhya nihārata, kabahu~ na nikasata sāra

तेरे लिये जनम अनेक मैं फिरत न पायों पार ।महामोह-मृगजल-सरिता महँ बोर्‌यो हौं बारहिं बार॥ 3 ॥

tere liye janama aneka maiṃ phirata na pāyoṃ pāra | mahāmoha-mṛgajala-saritā maha~ bor‌yo hauṃ bārahiṃ bāra

सुनु खल! छल-बल कोटि किये बस होहिं न भगत उदार ।सहित सहाय तहाँ बसि अब, जेहि हृदय न नंदकुमार॥ 4 ॥

sunu khala! chala-bala koṭi kiye basa hohiṃ na bhagata udāra | sahita sahāya tahā~ basi aba, jehi hṛdaya na naṃdakumāra

तासों करहु चातुरी जो नहिं जानै मरम तुम्हार ।सो परि डरै मरै रजु-अहि तें, बूझै नहिं ब्यवहार॥ 5 ॥

tāsoṃ karahu cāturī jo nahiṃ jānai marama tumhāra | so pari ḍarai marai raju-ahi teṃ, būjhai nahiṃ byavahāra

निज हित सुनु सठ! हठ न करहि, जो चहहि कुसल परिवार ।तुलसिदास प्रभुके दासनि तजि भजहि जहाँ मद मार॥ 6 ॥

nija hita sunu saṭha! haṭha na karahi, jo cahahi kusala parivāra | tulasidāsa prabhuke dāsani taji bhajahi jahā~ mada māra