पद २६१

मेरी न बनै बनाये मेरे कोटि कलप लौं, राम! रावरे बनाये बनै पल पाउ मैं ।निपट सयाने हौ कृपानिधान! कहा कहौं? लिये बेर बदलि अमोल मनि आउ मैं॥ 1 ॥

merī na banai banāye mere koṭi kalapa lauṃ, rāma! rāvare banāye banai pala pāu maiṃ | nipaṭa sayāne hau kṛpānidhāna! kahā kahauṃ? liye bera badali amola mani āu maiṃ

मानस मलीन, करतब कलिमल पीन, जीह हू न जप्यो नाम, बक्यो आउ-वाउ मैं ।कुपथ कुचाल चल्यो, भयो न भूलिहू भलो, बाल-दसा हू न खेल्यो खेलत सुदाउ मैं॥ 2 ॥

mānasa malīna, karataba kalimala pīna, jīha hū na japyo nāma, bakyo āu-vāu maiṃ | kupatha kucāla calyo, bhayo na bhūlihū bhalo, bāla-dasā hū na khelyo khelata sudāu maiṃ

देखा-देखी दंभ तें कि संग तें भई भलाई, प्रकटि जनाई, कियो दुरित-दुराउ मैं ।राग रोष-द्वेष पोषे, गोगन समेत मन इनकी भगति कीन्ही इनही को भाउ मैं॥ 3 ॥

dekhā-dekhī daṃbha teṃ ki saṃga teṃ bhaī bhalāī, prakaṭi janāī, kiyo durita-durāu maiṃ | rāga roṣa-dveṣa poṣe, gogana sameta mana inakī bhagati kīnhī inahī ko bhāu maiṃ

आगिली-पाछिली, अवहूँकी अनुमान ही तें बूझियत गति, कछु कीन्हों तो न काउ मैं ।जग कहै रामकी प्रतीति-प्रीति तुलसी हू, झूठेंसाँचे आसरो साहब रघुराउ मैं॥ 4 ॥

āgilī-pāchilī, avahū~kī anumāna hī teṃ būjhiyata gati, kachu kīnhoṃ to na kāu maiṃ | jaga kahai rāmakī pratīti-prīti tulasī hū, jhūṭheṃsā~ce āsaro sāhaba raghurāu maiṃ