Lanka Kanda — The Great War

रामं कामारिसेव्यं भवभयहरणं कालमत्तेभसिंहं योगीन्द्रं ज्ञानगम्यं गुणनिधिमजितं निर्गुणं निर्विकारम्।मायातीतं सुरेशं खलवधनिरतं ब्रह्मवृन्दैकदेवं वन्दे कन्दावदातं सरसिजनयनं देवमुर्वीशरूपम्॥ 1 ॥

rāmaṃ kāmārisevyaṃ bhavabhayaharaṇaṃ kālamattebhasiṃhaṃ yogīndraṃ jñānagamyaṃ guṇanidhimajitaṃ nirguṇaṃ nirvikāram| māyātītaṃ sureśaṃ khalavadhanirataṃ brahmavṛndaikadevaṃ vande kandāvadātaṃ sarasijanayanaṃ devamurvīśarūpam

शङ्खेन्द्वाभमतीवसुन्दरतनुं शार्दूलचर्माम्बरं कालव्यालकरालभूषणधरं गङ्गाशशाङ्कप्रियम्।काशीशं कलिकल्मषौघशमनं कल्याणकल्पद्रुमं नौमीड्यं गिरिजापतिं गुणनिधिं कन्दर्पहं शङ्करम्॥ 2 ॥

śaṅkhendvābhamatīvasundaratanuṃ śārdūlacarmāmbaraṃ kālavyālakarālabhūṣaṇadharaṃ gaṅgāśaśāṅkapriyam| kāśīśaṃ kalikalmaṣaughaśamanaṃ kalyāṇakalpadrumaṃ naumīḍyaṃ girijāpatiṃ guṇanidhiṃ kandarpahaṃ śaṅkaram

यो ददाति सतां शम्भु: कैवल्यमपि दुर्लभम्।खलानां दण्डकृद्योऽसौ शङ्कर: शं तनोतु मे॥ 3 ॥

yo dadāti satāṃ śambhu: kaivalyamapi durlabham| khalānāṃ daṇḍakṛdyo'sau śaṅkara: śaṃ tanotu me

दो०—लव निमेष परमानु जुग बरष कलप सर चंड।भजसि न मन तेहि राम को कालु जासु कोदंड॥ 4 ॥

do0—lava nimeṣa paramānu juga baraṣa kalapa sara caṃḍa| bhajasi na mana tehi rāma ko kālu jāsu kodaṃḍa

तव रिपु नारि रुदन जल धारा।भरेउ बहोरि भयउ तेहिं खारा॥ सुनि अति उकुति पवनसुत केरी।हरषे कपि रघुपति तन हेरी॥ 5 ॥

tava ripu nāri rudana jala dhārā| bhareu bahori bhayau tehiṃ khārā|| suni ati ukuti pavanasuta kerī| haraṣe kapi raghupati tana herī

जामवंत बोले दोउ भाई।नल नीलहि सब कथा सुनाई॥ राम प्रताप सुमिरि मन माहीं।करहु सेतु प्रयास कछु नाहीं॥ 6 ॥

jāmavaṃta bole dou bhāī| nala nīlahi saba kathā sunāī|| rāma pratāpa sumiri mana māhīṃ| karahu setu prayāsa kachu nāhīṃ

बोलि लिए कपि निकर बहोरी।सकल सुनहु बिनती कछु मोरी॥ राम चरन पंकज उर धरहू।कौतुक एक भालु कपि करहू॥ 7 ॥

boli lie kapi nikara bahorī| sakala sunahu binatī kachu morī|| rāma carana paṃkaja ura dharahū| kautuka eka bhālu kapi karahū

धावहु मर्कट बिकट बरूथा।आनहु बिटप गिरिन्ह के जूथा॥ सुनि कपि भालु चले करि हूहा।जय रघुबीर प्रताप समूहा॥ 8 ॥

dhāvahu markaṭa bikaṭa barūthā| ānahu biṭapa girinha ke jūthā|| suni kapi bhālu cale kari hūhā| jaya raghubīra pratāpa samūhā

दो०—अति उतंग गिरि पादप लीलहिं लेहिं उठाइ।आनि देहिं नल नीलहि रचहिं ते सेतु बनाइ॥ 9 ॥

do0—ati utaṃga giri pādapa līlahiṃ lehiṃ uṭhāi| āni dehiṃ nala nīlahi racahiṃ te setu banāi

सैल बिसाल आनि कपि देहीं।कंदुक इव नल नील ते लेहीं॥ देखि सेतु अति सुंदर रचना।बिहसि कृपानिधि बोले बचना॥ 10 ॥

saila bisāla āni kapi dehīṃ| kaṃduka iva nala nīla te lehīṃ|| dekhi setu ati suṃdara racanā| bihasi kṛpānidhi bole bacanā

परम रम्य उत्तम यह धरनी।महिमा अमित जाइ नहिं बरनी॥ करिहउँ इहाँ संभु थापना।मोरे हृदयँ परम कलपना॥ 11 ॥

parama ramya uttama yaha dharanī| mahimā amita jāi nahiṃ baranī|| karihaum̐ ihām̐ saṃbhu thāpanā| more hṛdayam̐ parama kalapanā

सुनि कपीस बहु दूत पठाए।मुनिबर सकल बोलि लै आए॥ लिंग थापि बिधिवत करि पूजा।सिव समान प्रिय मोहि न दूजा॥ 12 ॥

suni kapīsa bahu dūta paṭhāe| munibara sakala boli lai āe|| liṃga thāpi bidhivata kari pūjā| siva samāna priya mohi na dūjā

सिव द्रोही मम भगत कहावा।सो नर सपनेहुँ मोहि न पावा॥ संकर बिमुख भगति चह मोरी।सो नारकी मूढ़ मति थोरी॥ 13 ॥

siva drohī mama bhagata kahāvā| so nara sapanehum̐ mohi na pāvā|| saṃkara bimukha bhagati caha morī| so nārakī mūḍha़ mati thorī

दो०—संकरप्रिय मम द्रोही सिव द्रोही मम दास।ते नर करहिं कलप भरि घोर नरक महुँ बास॥ 14 ॥

do0—saṃkarapriya mama drohī siva drohī mama dāsa| te nara karahiṃ kalapa bhari ghora naraka mahum̐ bāsa

जे रामेस्वर दरसनु करिहहिं।ते तनु तजि मम लोक सिधरिहहिं॥ जो गंगाजलु आनि चढ़ाइहि।सो साजुज्य मुक्ति नर पाइहि॥ 15 ॥

je rāmesvara darasanu karihahiṃ| te tanu taji mama loka sidharihahiṃ|| jo gaṃgājalu āni caḍha़āihi| so sājujya mukti nara pāihi

होइ अकाम जो छल तजि सेइहि।भगति मोरि तेहि संकर देइहि॥ मम कृत सेतु जो दरसनु करिही।सो बिनु श्रम भवसागर तरिही॥ 16 ॥

hoi akāma jo chala taji seihi| bhagati mori tehi saṃkara deihi|| mama kṛta setu jo darasanu karihī| so binu śrama bhavasāgara tarihī

राम बचन सब के जिय भाए।मुनिबर निज निज आश्रम आए॥ गिरिजा रघुपति कै यह रीती।संतत करहिं प्रनत पर प्रीती॥ 17 ॥

rāma bacana saba ke jiya bhāe| munibara nija nija āśrama āe|| girijā raghupati kai yaha rītī| saṃtata karahiṃ pranata para prītī

बाँधा सेतु नील नल नागर।राम कृपाँ जसु भयउ उजागर॥ बूड़हिं आनहि बोरहिं जेई।भए उपल बोहित सम तेई॥ 18 ॥

bām̐dhā setu nīla nala nāgara| rāma kṛpām̐ jasu bhayau ujāgara|| būḍa़hiṃ ānahi borahiṃ jeī| bhae upala bohita sama teī

महिमा यह न जलधि कइ बरनी।पाहन गुन न कपिन्ह कइ करनी॥ 19 ॥

mahimā yaha na jaladhi kai baranī| pāhana guna na kapinha kai karanī

दो०—श्री रघुबीर प्रताप ते सिंधु तरे पाषान।ते मतिमंद जे राम तजि भजहिं जाइ प्रभु आन॥ 20 ॥

do0—śrī raghubīra pratāpa te siṃdhu tare pāṣāna| te matimaṃda je rāma taji bhajahiṃ jāi prabhu āna

बाँधि सेतु अति सुदृढ़ बनावा।देखि कृपानिधि के मन भावा॥ चली सेन कछु बरनि न जाई।गर्जहिं मर्कट भट समुदाई॥ 21 ॥

bām̐dhi setu ati sudṛḍha़ banāvā| dekhi kṛpānidhi ke mana bhāvā|| calī sena kachu barani na jāī| garjahiṃ markaṭa bhaṭa samudāī

सेतुबंध ढिग चढि़ रघुराई।चितव कृपाल सिंधु बहुताई॥ देखन कहुँ प्रभु करुना कंदा।प्रगट भए सब जलचर बृंदा॥ 22 ॥

setubaṃdha ḍhiga caḍhi़ raghurāī| citava kṛpāla siṃdhu bahutāī|| dekhana kahum̐ prabhu karunā kaṃdā| pragaṭa bhae saba jalacara bṛṃdā

मकर नक्र नाना झष ब्याला।सत जोजन तन परम बिसाला॥ अइसेउ एक तिन्हहि जे खाहीं।एकन्ह कें डर तेपि डेराहीं॥ 23 ॥

makara nakra nānā jhaṣa byālā| sata jojana tana parama bisālā|| aiseu eka tinhahi je khāhīṃ| ekanha keṃ ḍara tepi ḍerāhīṃ

प्रभुहि बिलोकहिं टरहिं न टारे।मन हरषित सब भए सुखारे॥ तिन्ह कीं ओट न देखिअ बारी।मगन भए हरि रूप निहारी॥ 24 ॥

prabhuhi bilokahiṃ ṭarahiṃ na ṭāre| mana haraṣita saba bhae sukhāre|| tinha kīṃ oṭa na dekhia bārī| magana bhae hari rūpa nihārī

चला कटकु प्रभु आयसु पाई।को कहि सक कपि दल बिपुलाई॥ 25 ॥

calā kaṭaku prabhu āyasu pāī| ko kahi saka kapi dala bipulāī

दो०—सेतुबंध भइ भीर अति कपि नभ पंथ उड़ाहिं।अपर जलचरन्हि ऊपर चढि़ चढि़ पारहि जाहिं॥ 26 ॥

do0—setubaṃdha bhai bhīra ati kapi nabha paṃtha uḍa़āhiṃ| apara jalacaranhi ūpara caḍhi़ caḍhi़ pārahi jāhiṃ

अस कौतुक बिलोकि द्वौ भाई।बिहँसि चले कृपाल रघुराई॥ सेन सहित उतरे रघुबीरा।कहि न जाइ कपि जूथप भीरा॥ 27 ॥

asa kautuka biloki dvau bhāī| biham̐si cale kṛpāla raghurāī|| sena sahita utare raghubīrā| kahi na jāi kapi jūthapa bhīrā

सिंधु पार प्रभु डेरा कीन्हा।सकल कपिन्ह कहुँ आयसु दीन्हा॥ खाहु जाइ फल मूल सुहाए।सुनत भालु कपि जहँ तहँ धाए॥ 28 ॥

siṃdhu pāra prabhu ḍerā kīnhā| sakala kapinha kahum̐ āyasu dīnhā|| khāhu jāi phala mūla suhāe| sunata bhālu kapi jaham̐ taham̐ dhāe

सब तरु फरे राम हित लागी।रितु अरु कुरितु काल गति त्यागी॥ खाहिं मधुर फल बिटप हलावहिं।लंका सन्मुख सिखर चलावहिं॥ 29 ॥

saba taru phare rāma hita lāgī| ritu aru kuritu kāla gati tyāgī|| khāhiṃ madhura phala biṭapa halāvahiṃ| laṃkā sanmukha sikhara calāvahiṃ

जहँ कहुँ फिरत निसाचर पावहिं।घेरि सकल बहु नाच नचावहिं॥ दसनन्हि काटि नासिका काना।कहि प्रभु सुजसु देहिं तब जाना॥ 30 ॥

jaham̐ kahum̐ phirata nisācara pāvahiṃ| gheri sakala bahu nāca nacāvahiṃ|| dasananhi kāṭi nāsikā kānā| kahi prabhu sujasu dehiṃ taba jānā