Ayodhya Kanda — The Forest Exile

यस्याङ्के च विभाति भूधरसुता देवापगा मस्तके भाले बालविधुर्गले च गरलं यस्योरसि व्यालराट्।सोऽयं भूतिविभूषण: सुरवर: सर्वाधिप: सर्वदा शर्व: सर्वगत: शिव: शशिनिभ: श्रीशङ्कर: पातु माम्॥ 1 ॥

yasyāṅke ca vibhāti bhūdharasutā devāpagā mastake bhāle bālavidhurgale ca garalaṃ yasyorasi vyālarāṭ| so'yaṃ bhūtivibhūṣaṇa: suravara: sarvādhipa: sarvadā śarva: sarvagata: śiva: śaśinibha: śrīśaṅkara: pātu mām

प्रसन्नतां या न गताभिषेकतस्तथा न मम्ले वनवासदु:खत:।मुखाम्बुजश्री रघुनन्दनस्य मे सदास्तु सा मञ्जुलमङ्गलप्रदा॥ 2 ॥

prasannatāṃ yā na gatābhiṣekatastathā na mamle vanavāsadu:khata:| mukhāmbujaśrī raghunandanasya me sadāstu sā mañjulamaṅgalapradā

नीलाम्बुजश्यामलकोमलाङ्गं सीतासमारोपितवामभागम्।पाणौ महासायकचारुचापं नमामि रामं रघुवंशनाथम्॥ 3 ॥

nīlāmbujaśyāmalakomalāṅgaṃ sītāsamāropitavāmabhāgam| pāṇau mahāsāyakacārucāpaṃ namāmi rāmaṃ raghuvaṃśanātham

दो०—श्रीगुरु चरन सरोज रज निज मनु मुकुरु सुधारि।बरनउँ रघुबर बिमल जसु जो दायकु फल चारि॥ 4 ॥

do0—śrīguru carana saroja raja nija manu mukuru sudhāri| baranaum̐ raghubara bimala jasu jo dāyaku phala cāri

रिधि सिधि संपति नदीं सुहाई।उमगि अवध अंबुधि कहुँ आई॥ मनिगन पुर नर नारि सुजाती।सुचि अमोल सुंदर सब भाँती॥ 5 ॥

ridhi sidhi saṃpati nadīṃ suhāī| umagi avadha aṃbudhi kahum̐ āī|| manigana pura nara nāri sujātī| suci amola suṃdara saba bhām̐tī

कहि न जाइ कछु नगर बिभूती।जनु एतनिअ बिरंचि करतूती॥ सब बिधि सब पुर लोग सुखारी।रामचंद मुख चंदु निहारी॥ 6 ॥

kahi na jāi kachu nagara bibhūtī| janu etania biraṃci karatūtī|| saba bidhi saba pura loga sukhārī| rāmacaṃda mukha caṃdu nihārī

मुदित मातु सब सखीं सहेली।फलित बिलोकि मनोरथ बेली॥ राम रूपु गुन सीलु सुभाऊ।प्रमुदित होइ देखि सुनि राऊ॥ 7 ॥

mudita mātu saba sakhīṃ sahelī| phalita biloki manoratha belī|| rāma rūpu guna sīlu subhāū| pramudita hoi dekhi suni rāū

दो०—सब कें उर अभिलाषु अस कहहिं मनाइ महेसु।आप अछत जुबराज पद रामहि देउ नरेसु॥ 8 ॥

do0—saba keṃ ura abhilāṣu asa kahahiṃ manāi mahesu| āpa achata jubarāja pada rāmahi deu naresu

एक समय सब सहित समाजा।राजसभाँ रघुराजु बिराजा॥ सकल सुकृत मूरति नरनाहू।राम सुजसु सुनि अतिहि उछाहू॥ 9 ॥

eka samaya saba sahita samājā| rājasabhām̐ raghurāju birājā|| sakala sukṛta mūrati naranāhū| rāma sujasu suni atihi uchāhū

नृप सब रहहिं कृपा अभिलाषें।लोकप करहिं प्रीति रुख राखें॥ तिभुवन तीनि काल जग माहीं।भूरिभाग दसरथ सम नाहीं॥ 10 ॥

nṛpa saba rahahiṃ kṛpā abhilāṣeṃ| lokapa karahiṃ prīti rukha rākheṃ|| tibhuvana tīni kāla jaga māhīṃ| bhūribhāga dasaratha sama nāhīṃ

मंगलमूल रामु सुत जासू।जो कछु कहिअ थोर सबु तासू॥ रायँ सुभायँ मुकुरु कर लीन्हा।बदनु बिलोकि मुकुटु सम कीन्हा॥ 11 ॥

maṃgalamūla rāmu suta jāsū| jo kachu kahia thora sabu tāsū|| rāyam̐ subhāyam̐ mukuru kara līnhā| badanu biloki mukuṭu sama kīnhā

श्रवन समीप भए सित केसा।मनहुँ जरठपनु अस उपदेसा॥ नृप जुबराजु राम कहुँ देहू।जीवन जनम लाहु किन लेहू॥ 12 ॥

śravana samīpa bhae sita kesā| manahum̐ jaraṭhapanu asa upadesā|| nṛpa jubarāju rāma kahum̐ dehū| jīvana janama lāhu kina lehū

दो०—यह बिचारु उर आनि नृप सुदिनु सुअवसरु पाइ।प्रेम पुलकि तन मुदित मन गुरहि सुनायउ जाइ॥ 13 ॥

do0—yaha bicāru ura āni nṛpa sudinu suavasaru pāi| prema pulaki tana mudita mana gurahi sunāyau jāi

कहइ भुआलु सुनिअ मुनिनायक।भए राम सब बिधि सब लायक॥ सेवक सचिव सकल पुरबासी।जे हमारे अरि मित्र उदासी॥ 14 ॥

kahai bhuālu sunia munināyaka| bhae rāma saba bidhi saba lāyaka|| sevaka saciva sakala purabāsī| je hamāre ari mitra udāsī

सबहि रामु प्रिय जेहि बिधि मोही।प्रभु असीस जनु तनु धरि सोही॥ बिप्र सहित परिवार गोसाईं।करहिं छोहु सब रौरिहि नाईं॥ 15 ॥

sabahi rāmu priya jehi bidhi mohī| prabhu asīsa janu tanu dhari sohī|| bipra sahita parivāra gosāīṃ| karahiṃ chohu saba raurihi nāīṃ

जे गुर चरन रेनु सिर धरहीं।ते जनु सकल बिभव बस करहीं॥ मोहि सम यहु अनुभयउ न दूजें।सबु पायउँ रज पावनि पूजें॥ 16 ॥

je gura carana renu sira dharahīṃ| te janu sakala bibhava basa karahīṃ|| mohi sama yahu anubhayau na dūjeṃ| sabu pāyaum̐ raja pāvani pūjeṃ

अब अभिलाषु एकु मन मोरें।पूजिहि नाथ अनुग्रह तोरें॥ मुनि प्रसन्न लखि सहज सनेहू।कहेउ नरेस रजायसु देहू॥ 17 ॥

aba abhilāṣu eku mana moreṃ| pūjihi nātha anugraha toreṃ|| muni prasanna lakhi sahaja sanehū| kaheu naresa rajāyasu dehū

दो०—राजन राउर नामु जसु सब अभिमत दातार।फल अनुगामी महिप मनि मन अभिलाषु तुम्हार॥ 18 ॥

do0—rājana rāura nāmu jasu saba abhimata dātāra| phala anugāmī mahipa mani mana abhilāṣu tumhāra

सब बिधि गुरु प्रसन्न जियँ जानी।बोलेउ राउ रहँसि मृदु बानी॥ नाथ रामु करिअहिं जुबराजू।कहिअ कृपा करि करिअ समाजू॥ 19 ॥

saba bidhi guru prasanna jiyam̐ jānī| boleu rāu raham̐si mṛdu bānī|| nātha rāmu kariahiṃ jubarājū| kahia kṛpā kari karia samājū

मोहि अछत यहु होइ उछाहू।लहहिं लोग सब लोचन लाहू॥ प्रभु प्रसाद सिव सबइ निबाहीं।यह लालसा एक मन माहीं॥ 20 ॥

mohi achata yahu hoi uchāhū| lahahiṃ loga saba locana lāhū|| prabhu prasāda siva sabai nibāhīṃ| yaha lālasā eka mana māhīṃ

पुनि न सोच तनु रहउ कि जाऊ।जेहिं न होइ पाछें पछिताऊ॥ सुनि मुनि दसरथ बचन सुहाए।मंगल मोद मूल मन भाए॥ 21 ॥

puni na soca tanu rahau ki jāū| jehiṃ na hoi pācheṃ pachitāū|| suni muni dasaratha bacana suhāe| maṃgala moda mūla mana bhāe

सुनु नृप जासु बिमुख पछिताहीं।जासु भजन बिनु जरनि न जाहीं॥ भयउ तुम्हार तनय सोइ स्वामी।रामु पुनीत प्रेम अनुगामी॥ 22 ॥

sunu nṛpa jāsu bimukha pachitāhīṃ| jāsu bhajana binu jarani na jāhīṃ|| bhayau tumhāra tanaya soi svāmī| rāmu punīta prema anugāmī

दो०—बेगि बिलंबु न करिअ नृप साजिअ सबुइ समाजु।सुदिन सुमंगलु तबहिं जब रामु होहिं जुबराजु॥ 23 ॥

do0—begi bilaṃbu na karia nṛpa sājia sabui samāju| sudina sumaṃgalu tabahiṃ jaba rāmu hohiṃ jubarāju

मुदित महीपति मंदिर आए।सेवक सचिव सुमंत्रु बोलाए॥ कहि जयजीव सीस तिन्ह नाए।भूप सुमंगल बचन सुनाए॥ 24 ॥

mudita mahīpati maṃdira āe| sevaka saciva sumaṃtru bolāe|| kahi jayajīva sīsa tinha nāe| bhūpa sumaṃgala bacana sunāe

जौं पाँचहि मत लागै नीका।करहु हरषि हियँ रामहि टीका॥ 25 ॥

jauṃ pām̐cahi mata lāgai nīkā| karahu haraṣi hiyam̐ rāmahi ṭīkā

मंत्री मुदित सुनत प्रिय बानी।अभिमत बिरवँ परेउ जनु पानी॥ बिनती सचिव करहिं कर जोरी।जिअहु जगतपति बरिस करोरी॥ 26 ॥

maṃtrī mudita sunata priya bānī| abhimata biravam̐ pareu janu pānī|| binatī saciva karahiṃ kara jorī| jiahu jagatapati barisa karorī

जग मंगल भल काजु बिचारा।बेगिअ नाथ न लाइअ बारा॥ नृपहि मोदु सुनि सचिव सुभाषा।बढ़त बौंड़ जनु लही सुसाखा॥ 27 ॥

jaga maṃgala bhala kāju bicārā| begia nātha na lāia bārā|| nṛpahi modu suni saciva subhāṣā| baḍha़ta bauṃḍa़ janu lahī susākhā

दो०—कहेउ भूप मुनिराज कर जोइ जोइ आयसु होइ।राम राज अभिषेक हित बेगि करहु सोइ सोइ॥ 28 ॥

do0—kaheu bhūpa munirāja kara joi joi āyasu hoi| rāma rāja abhiṣeka hita begi karahu soi soi

हरषि मुनीस कहेउ मृदु बानी।आनहु सकल सुतीरथ पानी॥ औषध मूल फूल फल पाना।कहे नाम गनि मंगल नाना॥ 29 ॥

haraṣi munīsa kaheu mṛdu bānī| ānahu sakala sutīratha pānī|| auṣadha mūla phūla phala pānā| kahe nāma gani maṃgala nānā

चामर चरम बसन बहु भाँती।रोम पाट पट अगनित जाती॥ मनिगन मंगल बस्तु अनेका।जो जग जोगु भूप अभिषेका॥ 30 ॥

cāmara carama basana bahu bhām̐tī| roma pāṭa paṭa aganita jātī|| manigana maṃgala bastu anekā| jo jaga jogu bhūpa abhiṣekā