Kishkindha Kanda — The Alliance

कुन्देन्दीवरसुन्दरावतिबलौ विज्ञानधामावुभौ शोभाढ्यौ वरधन्विनौ श्रुतिनुतौ गोविप्रवृन्दप्रियौ।मायामानुषरूपिणौ रघुवरौ सद्धर्मवर्मौ हितौ सीतान्वेषणतत्परौ पथिगतौ भक्तिप्रदौ तौ हि न:॥ 1 ॥

kundendīvarasundarāvatibalau vijñānadhāmāvubhau śobhāḍhyau varadhanvinau śrutinutau govipravṛndapriyau| māyāmānuṣarūpiṇau raghuvarau saddharmavarmau hitau sītānveṣaṇatatparau pathigatau bhaktipradau tau hi na:

ब्रह्माम्भोधिसमुद्भवं कलिमलप्रध्वंसनं चाव्ययं श्रीमच्छम्भुमुखेन्दुसुन्दरवरे संशोभितं सर्वदा।संसारामयभेषजं सुखकरं श्रीजानकीजीवनं धन्यास्ते कृतिन: पिबन्ति सततं श्रीरामनामामृतम्॥ 2 ॥

brahmāmbhodhisamudbhavaṃ kalimalapradhvaṃsanaṃ cāvyayaṃ śrīmacchambhumukhendusundaravare saṃśobhitaṃ sarvadā| saṃsārāmayabheṣajaṃ sukhakaraṃ śrījānakījīvanaṃ dhanyāste kṛtina: pibanti satataṃ śrīrāmanāmāmṛtam

सो०—मुक्ति जन्म महि जानि ग्यान खानि अघ हानि कर।जहँ बस संभु भवानि सो कासी सेइअ कस न॥ 3 ॥

so0—mukti janma mahi jāni gyāna khāni agha hāni kara| jaham̐ basa saṃbhu bhavāni so kāsī seia kasa na

अति सभीत कह सुनु हनुमाना।पुरुष जुगल बल रूप निधाना॥ धरि बटु रूप देखु तैं जाई।कहेसु जानि जियँ सयन बुझाई॥ 4 ॥

ati sabhīta kaha sunu hanumānā| puruṣa jugala bala rūpa nidhānā|| dhari baṭu rūpa dekhu taiṃ jāī| kahesu jāni jiyam̐ sayana bujhāī

पठए बालि होहिं मन मैला।भागौं तुरत तजौं यह सैला॥ बिप्र रूप धरि कपि तहँ गयऊ।माथ नाइ पूछत अस भयऊ॥ 5 ॥

paṭhae bāli hohiṃ mana mailā| bhāgauṃ turata tajauṃ yaha sailā|| bipra rūpa dhari kapi taham̐ gayaū| mātha nāi pūchata asa bhayaū

को तुम्ह स्यामल गौर सरीरा।छत्री रूप फिरहु बन बीरा॥ कठिन भूमि कोमल पद गामी।कवन हेतु बिचरहु बन स्वामी॥ 6 ॥

ko tumha syāmala gaura sarīrā| chatrī rūpa phirahu bana bīrā|| kaṭhina bhūmi komala pada gāmī| kavana hetu bicarahu bana svāmī

मृदुल मनोहर सुंदर गाता।सहत दुसह बन आतप बाता॥ 7 ॥

mṛdula manohara suṃdara gātā| sahata dusaha bana ātapa bātā

दो०—जग कारन तारन भव भंजन धरनी भार।की तुम्ह अखिल भुवन पति लीन्ह मनुज अवतार॥ 8 ॥

do0—jaga kārana tārana bhava bhaṃjana dharanī bhāra| kī tumha akhila bhuvana pati līnha manuja avatāra

कोसलेस दसरथ के जाए।हम पितु बचन मानि बन आए॥ नाम राम लछिमन दोउ भाई।संग नारि सुकुमारि सुहाई॥ 9 ॥

kosalesa dasaratha ke jāe| hama pitu bacana māni bana āe|| nāma rāma lachimana dou bhāī| saṃga nāri sukumāri suhāī

इहाँ हरी निसिचर बैदेही।बिप्र फिरहिं हम खोजत तेही॥ आपन चरित कहा हम गाई।कहहु बिप्र निज कथा बुझाई॥ 10 ॥

ihām̐ harī nisicara baidehī| bipra phirahiṃ hama khojata tehī|| āpana carita kahā hama gāī| kahahu bipra nija kathā bujhāī

प्रभु पहिचानि परेउ गहि चरना।सो सुख उमा जाइ नहिं बरना॥ पुलकित तन मुख आव न बचना।देखत रुचिर बेष कै रचना॥ 11 ॥

prabhu pahicāni pareu gahi caranā| so sukha umā jāi nahiṃ baranā|| pulakita tana mukha āva na bacanā| dekhata rucira beṣa kai racanā

पुनि धीरजु धरि अस्तुति कीन्ही।हरष हृदयँ निज नाथहि चीन्ही॥ मोर न्याउ मैं पूछा साईं।तुम्ह पूछहु कस नर की नाईं॥ 12 ॥

puni dhīraju dhari astuti kīnhī| haraṣa hṛdayam̐ nija nāthahi cīnhī|| mora nyāu maiṃ pūchā sāīṃ| tumha pūchahu kasa nara kī nāīṃ

तव माया बस फिरउँ भुलाना।ता ते मैं नहिं प्रभु पहिचाना॥ 13 ॥

tava māyā basa phiraum̐ bhulānā| tā te maiṃ nahiṃ prabhu pahicānā

दो०—एकु मैं मंद मोहबस कुटिल हृदय अग्यान।पुनि प्रभु मोहि बिसारेउ दीनबंधु भगवान॥ 14 ॥

do0—eku maiṃ maṃda mohabasa kuṭila hṛdaya agyāna| puni prabhu mohi bisāreu dīnabaṃdhu bhagavāna

जदपि नाथ बहु अवगुन मोरें।सेवक प्रभुहि परै जनि भोरें॥ नाथ जीव तव मायाँ मोहा।सो निस्तरइ तुम्हारेहिं छोहा॥ 15 ॥

jadapi nātha bahu avaguna moreṃ| sevaka prabhuhi parai jani bhoreṃ|| nātha jīva tava māyām̐ mohā| so nistarai tumhārehiṃ chohā

ता पर मैं रघुबीर दोहाई।जानउँ नहिं कछु भजन उपाई॥ सेवक सुत पति मातु भरोसें।रहइ असोच बनइ प्रभु पोसें॥ 16 ॥

tā para maiṃ raghubīra dohāī| jānaum̐ nahiṃ kachu bhajana upāī|| sevaka suta pati mātu bharoseṃ| rahai asoca banai prabhu poseṃ

अस कहि परेउ चरन अकुलाई।निज तनु प्रगटि प्रीति उर छाई॥ तब रघुपति उठाइ उर लावा।निज लोचन जल सींचि जुड़ावा॥ 17 ॥

asa kahi pareu carana akulāī| nija tanu pragaṭi prīti ura chāī|| taba raghupati uṭhāi ura lāvā| nija locana jala sīṃci juḍa़āvā

सुनु कपि जियँ मानसि जनि ऊना।तैं मम प्रिय लछिमन ते दूना॥ समदरसी मोहि कह सब कोऊ।सेवक प्रिय अनन्यगति सोऊ॥ 18 ॥

sunu kapi jiyam̐ mānasi jani ūnā| taiṃ mama priya lachimana te dūnā|| samadarasī mohi kaha saba koū| sevaka priya ananyagati soū

दो०—सो अनन्य जाकें असि मति न टरइ हनुमंत।मैं सेवक सचराचर रूप स्वामि भगवंत॥ 19 ॥

do0—so ananya jākeṃ asi mati na ṭarai hanumaṃta| maiṃ sevaka sacarācara rūpa svāmi bhagavaṃta

देखि पवनसुत पति अनुकूला।हृदयँ हरष बीती सब सूला॥ नाथ सैल पर कपिपति रहई।सो सुग्रीव दास तव अहई॥ 20 ॥

dekhi pavanasuta pati anukūlā| hṛdayam̐ haraṣa bītī saba sūlā|| nātha saila para kapipati rahaī| so sugrīva dāsa tava ahaī

तेहि सन नाथ मयत्री कीजे।दीन जानि तेहि अभय करीजे॥ सो सीता कर खोज कराइहि।जहँ तहँ मरकट कोटि पठाइहि॥ 21 ॥

tehi sana nātha mayatrī kīje| dīna jāni tehi abhaya karīje|| so sītā kara khoja karāihi| jaham̐ taham̐ marakaṭa koṭi paṭhāihi

एहि बिधि सकल कथा समुझाई।लिए दुऔ जन पीठि चढ़ाई॥ जब सुग्रीवँ राम कहुँ देखा।अतिसय जन्म धन्य करि लेखा॥ 22 ॥

ehi bidhi sakala kathā samujhāī| lie duau jana pīṭhi caḍha़āī|| jaba sugrīvam̐ rāma kahum̐ dekhā| atisaya janma dhanya kari lekhā

सादर मिलेउ नाइ पद माथा।भेंटेउ अनुज सहित रघुनाथा॥ कपि कर मन बिचार एहि रीती।करिहहिं बिधि मो सन ए प्रीती॥ 23 ॥

sādara mileu nāi pada māthā| bheṃṭeu anuja sahita raghunāthā|| kapi kara mana bicāra ehi rītī| karihahiṃ bidhi mo sana e prītī

दो०—तब हनुमंत उभय दिसि की सब कथा सुनाइ।पावक साखी देइ करि जोरी प्रीति दृढ़ाइ॥ 24 ॥

do0—taba hanumaṃta ubhaya disi kī saba kathā sunāi| pāvaka sākhī dei kari jorī prīti dṛḍha़āi

कीन्हि प्रीति कछु बीच न राखा।लछिमन राम चरित सब भाषा॥ कह सुग्रीव नयन भरि बारी।मिलिहि नाथ मिथिलेसकुमारी॥ 25 ॥

kīnhi prīti kachu bīca na rākhā| lachimana rāma carita saba bhāṣā|| kaha sugrīva nayana bhari bārī| milihi nātha mithilesakumārī

मंत्रिन्ह सहित इहाँ एक बारा।बैठ रहेउँ मैं करत बिचारा॥ 26 ॥

maṃtrinha sahita ihām̐ eka bārā| baiṭha raheum̐ maiṃ karata bicārā

राम राम हा राम पुकारी।हमहि देखि दीन्हेउ पट डारी॥ मागा राम तुरत तेहिं दीन्हा।पट उर लाइ सोच अति कीन्हा॥ 27 ॥

rāma rāma hā rāma pukārī| hamahi dekhi dīnheu paṭa ḍārī|| māgā rāma turata tehiṃ dīnhā| paṭa ura lāi soca ati kīnhā

कह सुग्रीव सुनहु रघुबीरा।तजहु सोच मन आनहु धीरा॥ सब प्रकार करिहउँ सेवकाई।जेहि बिधि मिलिहि जानकी आई॥ 28 ॥

kaha sugrīva sunahu raghubīrā| tajahu soca mana ānahu dhīrā|| saba prakāra karihaum̐ sevakāī| jehi bidhi milihi jānakī āī

दो०—सखा बचन सुनि हरषे कृपासिंधु बलसींव।कारन कवन बसहु बन मोहि कहहु सुग्रीव॥ 29 ॥

do0—sakhā bacana suni haraṣe kṛpāsiṃdhu balasīṃva| kārana kavana basahu bana mohi kahahu sugrīva

नाथ बालि अरु मैं द्वौ भाई।प्रीति रही कछु बरनि न जाई॥ मयसुत मायावी तेहि नाऊँ।आवा सो प्रभु हमरें गाऊँ॥ 30 ॥

nātha bāli aru maiṃ dvau bhāī| prīti rahī kachu barani na jāī|| mayasuta māyāvī tehi nāūm̐| āvā so prabhu hamareṃ gāūm̐