Shatarudra Samhita

॥ श्रीगणेशाय नमः॥ 8.0 ॥

|| śrīgaṇeśāya namaḥ

श्रीगौरीशङ्कराभ्यां नमः॥ 8.0-2 ॥

śrīgaurīśaṅkarābhyāṃ namaḥ

श्रीशिवमहापुराणम् ॥ तृतीयायां शतरुद्रसंहितायां ३.८. अष्टमोऽध्यायः ।भैरवावतारवर्णनम् ।अथ भैरवावतारमाह ।नन्दीश्वर उवाच ।सनत्कुमार सर्वज्ञ शृणु त्वं भैरवीं कथाम् ।यस्याः श्रवणमात्रेण शैवी भक्तिर्दृढा भवेत्॥ 8.1 ॥

śrīśivamahāpurāṇam || tṛtīyāyāṃ śatarudrasaṃhitāyāṃ 3.8. aṣṭamo'dhyāyaḥ | bhairavāvatāravarṇanam | atha bhairavāvatāramāha | nandīśvara uvāca | sanatkumāra sarvajña śṛṇu tvaṃ bhairavīṃ kathām | yasyāḥ śravaṇamātreṇa śaivī bhaktirdṛḍhā bhavet

भैरवः पूर्णरूपो हि शङ्करस्य परात्मनः ।मूढास्तं वै न जानन्ति मोहिताः शिवमायया॥ 8.2 ॥

bhairavaḥ pūrṇarūpo hi śaṅkarasya parātmanaḥ | mūḍhāstaṃ vai na jānanti mohitāḥ śivamāyayā

सनत्कुमार नो वेत्ति महिमानं महेशितुः ।चतुर्भुजोऽपि विष्णुर्वै चतुर्वक्त्रोऽपि वै विधिः॥ 8.3 ॥

sanatkumāra no vetti mahimānaṃ maheśituḥ | caturbhujo'pi viṣṇurvai caturvaktro'pi vai vidhiḥ

चित्रमत्र न किञ्चिद्वै दुर्ज्ञेया खलु शाम्भवी ।तया सम्मोहिताः सर्वे नार्चयन्त्यपि तं परम्॥ 8.4 ॥

citramatra na kiñcidvai durjñeyā khalu śāmbhavī | tayā sammohitāḥ sarve nārcayantyapi taṃ param

वेदयेद्यदि वात्मानं स एव परमेश्वरः ।तदा विदन्ति ते सर्वे स्वेच्छया न हि केऽपि तम्॥ 8.5 ॥

vedayedyadi vātmānaṃ sa eva parameśvaraḥ | tadā vidanti te sarve svecchayā na hi ke'pi tam

सर्वगोऽपि महेशानो नेक्ष्यते मूढबुद्धिभिः ।देववद् बुध्यते लोके योऽतीतो मनसां गिराम्॥ 8.6 ॥

sarvago'pi maheśāno nekṣyate mūḍhabuddhibhiḥ | devavad budhyate loke yo'tīto manasāṃ girām

अत्रेतिहासं वक्ष्येऽहं परमर्षे पुरातनम् ।शृणु तं श्रद्धया तात परमं ज्ञानकारणम्॥ 8.7 ॥

atretihāsaṃ vakṣye'haṃ paramarṣe purātanam | śṛṇu taṃ śraddhayā tāta paramaṃ jñānakāraṇam

मेरुशृङ्गेऽद्भुते रम्ये स्थितं ब्रह्माणमीश्वरम् ।जग्मुर्देवर्षयः सर्वे सुतत्त्वं ज्ञातुमिच्छया॥ 8.8 ॥

meruśṛṅge'dbhute ramye sthitaṃ brahmāṇamīśvaram | jagmurdevarṣayaḥ sarve sutattvaṃ jñātumicchayā

तत्रागत्य विधिं नत्वा पप्रच्छुस्ते महादरात् ।कृताञ्जलिपुटाः सर्वे नतस्कन्धा मुनीश्वराः॥ 8.9 ॥

tatrāgatya vidhiṃ natvā papracchuste mahādarāt | kṛtāñjalipuṭāḥ sarve nataskandhā munīśvarāḥ

देवर्षय ऊचुः ।देवदेव प्रजानाथ सृष्टिकृल्लोकनायक ।तत्त्वतो वद चास्मभ्यं किमेकं तत्त्वमव्ययम्॥ 8.10 ॥

devarṣaya ūcuḥ | devadeva prajānātha sṛṣṭikṛllokanāyaka | tattvato vada cāsmabhyaṃ kimekaṃ tattvamavyayam

नन्दीश्वर उवाच ।स मायया महेशस्य मोहितः पद्मसम्भवः ।अविज्ञाय परं भावं सम्भावं प्रत्युवाच ह॥ 8.11 ॥

nandīśvara uvāca | sa māyayā maheśasya mohitaḥ padmasambhavaḥ | avijñāya paraṃ bhāvaṃ sambhāvaṃ pratyuvāca ha

ब्रह्मोवाच ।हे सुरा ऋषयः सर्वे सुमत्या शृणुतादरात् ।वच्म्यहं परमं तत्त्वमव्ययं वै यथार्थतः॥ 8.12 ॥

brahmovāca | he surā ṛṣayaḥ sarve sumatyā śṛṇutādarāt | vacmyahaṃ paramaṃ tattvamavyayaṃ vai yathārthataḥ

जगद्योनिरहं धाता स्वयम्भूरज ईश्वरः ।अनादिभागहं ब्रह्म ह्येक आत्मा निरञ्जनः॥ 8.13 ॥

jagadyonirahaṃ dhātā svayambhūraja īśvaraḥ | anādibhāgahaṃ brahma hyeka ātmā nirañjanaḥ

प्रवर्तको हि जगतामहमेव निवर्त्तकः ।संवर्तको मदधिको नान्यः कश्चित्सुरोत्तमाः॥ 8.14 ॥

pravartako hi jagatāmahameva nivarttakaḥ | saṃvartako madadhiko nānyaḥ kaścitsurottamāḥ

नन्दीश्वर उवाच ।तस्यैवं वदतो धातुर्विष्णुस्तत्र स्थितो मुने ।प्रोवाच प्रहसन्वाक्यं सङ्क्रुद्धो मोहितोऽजया॥ 8.15 ॥

nandīśvara uvāca | tasyaivaṃ vadato dhāturviṣṇustatra sthito mune | provāca prahasanvākyaṃ saṅkruddho mohito'jayā

न चैतदुचिता ब्रह्मन्योगयुक्तस्य मूर्खता ।अविज्ञाय परं तत्त्वं वृथैतत्ते निगद्यते॥ 8.16 ॥

na caitaducitā brahmanyogayuktasya mūrkhatā | avijñāya paraṃ tattvaṃ vṛthaitatte nigadyate

कर्ताऽहं सर्वलोकानां परमात्मा परः पुमान् ।यज्ञो नारायणो देवो मायाधीशः परागतिः॥ 8.17 ॥

kartā'haṃ sarvalokānāṃ paramātmā paraḥ pumān | yajño nārāyaṇo devo māyādhīśaḥ parāgatiḥ

ममाज्ञया त्वया ब्रह्मन् सृष्टिरेषा विधीयते ।जगतां जीवनं नैव मामनादृत्य चेश्वरम्॥ 8.18 ॥

mamājñayā tvayā brahman sṛṣṭireṣā vidhīyate | jagatāṃ jīvanaṃ naiva māmanādṛtya ceśvaram

एवं विप्रकृतौ मोहात्परस्परजयैषिणौ ।प्रोचतुर्निगमांश्चात्र प्रमाणे सर्वथा तनौ॥ 8.19 ॥

evaṃ viprakṛtau mohātparasparajayaiṣiṇau | procaturnigamāṃścātra pramāṇe sarvathā tanau

प्रष्टव्यास्ते विशेषेण स्थिता मूर्तिधराश्च ते ।पप्रच्छतुः प्रमाणज्ञानित्युक्त्वा चतुरोऽपि तान्॥ 8.20 ॥

praṣṭavyāste viśeṣeṇa sthitā mūrtidharāśca te | papracchatuḥ pramāṇajñānityuktvā caturo'pi tān

विधिविष्णू ऊचतुः ।वेदाः प्रमाणं सर्वत्र प्रतिष्ठां परमामिताः ।यूयं वदत विश्रब्धं किमेकं तत्त्वमव्ययम्॥ 8.21 ॥

vidhiviṣṇū ūcatuḥ | vedāḥ pramāṇaṃ sarvatra pratiṣṭhāṃ paramāmitāḥ | yūyaṃ vadata viśrabdhaṃ kimekaṃ tattvamavyayam

नन्दीश्वर उवाच ।इत्याकर्ण्य तयोर्वाचं पुनस्ते हि ऋगादयः ।अवदंस्तत्त्वतः सर्वे परेशं संस्मरतो प्रभुम्॥ 8.22 ॥

nandīśvara uvāca | ityākarṇya tayorvācaṃ punaste hi ṛgādayaḥ | avadaṃstattvataḥ sarve pareśaṃ saṃsmarato prabhum

यदि मान्या वयं देवौ सृष्टिस्थितिकरौ विभू ।तदा प्रमाणं वक्ष्यामो भवत्सन्देहभेदकम्॥ 8.23 ॥

yadi mānyā vayaṃ devau sṛṣṭisthitikarau vibhū | tadā pramāṇaṃ vakṣyāmo bhavatsandehabhedakam

नन्दीश्वर उवाच ।श्रुत्युक्तविधिमाकर्ण्य प्रोचतुस्तौ सुरौ श्रुतीः ।युष्मदुक्तं प्रमाणं नौ किं तत्त्वं सम्यगुच्यताम्॥ 8.24 ॥

nandīśvara uvāca | śrutyuktavidhimākarṇya procatustau surau śrutīḥ | yuṣmaduktaṃ pramāṇaṃ nau kiṃ tattvaṃ samyagucyatām

ऋग्वेद उवाच ।यदन्तः स्थानि भूतानि यतः सर्वं प्रवर्त्तते ।यदाहुः परमं तत्त्वं स रुद्रस्त्वेक एव हि॥ 8.25 ॥

ṛgveda uvāca | yadantaḥ sthāni bhūtāni yataḥ sarvaṃ pravarttate | yadāhuḥ paramaṃ tattvaṃ sa rudrastveka eva hi

यजुर्वेद उवाच ।यो यज्ञैरखिलैरीशो योगेन च समिज्यते ।येन प्रमाणं खलु नः स एकः सर्वदृक् शिवः॥ 8.26 ॥

yajurveda uvāca | yo yajñairakhilairīśo yogena ca samijyate | yena pramāṇaṃ khalu naḥ sa ekaḥ sarvadṛk śivaḥ

सामवेद उवाच ।येनेदं भ्रम्यते विश्वं योगिभिर्यो विचिन्त्यते ।यद्भासा भासते विश्वं स एकस्त्र्यम्बकः परः॥ 8.27 ॥

sāmaveda uvāca | yenedaṃ bhramyate viśvaṃ yogibhiryo vicintyate | yadbhāsā bhāsate viśvaṃ sa ekastryambakaḥ paraḥ

अथर्वणवेद उवाच ।यं प्रपश्यन्ति देवेशं भक्त्यनुग्रहिणो जनाः ।तमाहुरेकं कैवल्यं शङ्करं दुःखतः परम्॥ 8.28 ॥

atharvaṇaveda uvāca | yaṃ prapaśyanti deveśaṃ bhaktyanugrahiṇo janāḥ | tamāhurekaṃ kaivalyaṃ śaṅkaraṃ duḥkhataḥ param

नन्दीश्वर उवाच ।श्रुत्युक्तमिदमाकर्ण्यातीव मायाविमोहितौ ।स्मित्वाहतुर्विधिहरी निगमांस्तान्विचेतनौ॥ 8.29 ॥

nandīśvara uvāca | śrutyuktamidamākarṇyātīva māyāvimohitau | smitvāhaturvidhiharī nigamāṃstānvicetanau

विधिहरी ऊचतुः ।हे वेदाः किमिदं यूयं भाषन्ते गतचेतनाः ।किं जातं वोऽद्य सर्वं हि नष्टं सुवयुनं परम्॥ 8.30 ॥

vidhiharī ūcatuḥ | he vedāḥ kimidaṃ yūyaṃ bhāṣante gatacetanāḥ | kiṃ jātaṃ vo'dya sarvaṃ hi naṣṭaṃ suvayunaṃ param

कथं प्रमथनाथोऽसौ रममाणो निरन्तरम् ।दिगम्बरः पीतवर्णो शिवया धूलिधूसरः॥ 8.31 ॥

kathaṃ pramathanātho'sau ramamāṇo nirantaram | digambaraḥ pītavarṇo śivayā dhūlidhūsaraḥ

विरूपवेषो जटिलो वृषगो व्यालभूषणः ।परं ब्रह्मत्वमापन्नः क्व च तत्सङ्गवर्जितम्॥ 8.32 ॥

virūpaveṣo jaṭilo vṛṣago vyālabhūṣaṇaḥ | paraṃ brahmatvamāpannaḥ kva ca tatsaṅgavarjitam

इत्युदीरितमाकर्ण्य प्रणवः सर्वगस्तयोः ।अमूर्तो मूर्तिमान्प्रीत्या जृम्भमाण उवाच तौ॥ 8.33 ॥

ityudīritamākarṇya praṇavaḥ sarvagastayoḥ | amūrto mūrtimānprītyā jṛmbhamāṇa uvāca tau

प्रणव उवाच ।न हीशो भगवान् शक्त्या ह्यात्मनो व्यतिरिक्तया ।कदाचिद्रमते रुद्रो लीलारूपधरो हरः॥ 8.34 ॥

praṇava uvāca | na hīśo bhagavān śaktyā hyātmano vyatiriktayā | kadācidramate rudro līlārūpadharo haraḥ

असौ हि परमेशानः स्वयञ्ज्योतिः सनातनः ।आनन्दरूपा तस्यैषा शक्तिर्नागन्तुकी शिवा॥ 8.35 ॥

asau hi parameśānaḥ svayañjyotiḥ sanātanaḥ | ānandarūpā tasyaiṣā śaktirnāgantukī śivā

नन्दीश्वर उवाच ।इत्येवमुक्तोऽपि तदा विधेर्विष्णोश्च वै तदा ।नाज्ञानमगमन्नाशं श्रीकण्ठस्यैव मायया॥ 8.36 ॥

nandīśvara uvāca | ityevamukto'pi tadā vidherviṣṇośca vai tadā | nājñānamagamannāśaṃ śrīkaṇṭhasyaiva māyayā

प्रादुरासीत्ततो ज्योतिरुभयोरन्तरे महत् ।पूरयन्निजया भासा द्यावाभूम्योर्यदन्तरम्॥ 8.37 ॥

prādurāsīttato jyotirubhayorantare mahat | pūrayannijayā bhāsā dyāvābhūmyoryadantaram

ज्योतिर्मण्डलमध्यस्थो ददृशे पुरुषाकृतिः ।विधिक्रतुभ्यां तत्रैव महाद्भुततनुर्मुने॥ 8.38 ॥

jyotirmaṇḍalamadhyastho dadṛśe puruṣākṛtiḥ | vidhikratubhyāṃ tatraiva mahādbhutatanurmune

प्रजज्वालाथ कोपेन ब्रह्मणः पञ्चमं शिरः ।आवयोरन्तरे कोऽसौ बिभृयात्पुरुषाकृतिम्॥ 8.39 ॥

prajajvālātha kopena brahmaṇaḥ pañcamaṃ śiraḥ | āvayorantare ko'sau bibhṛyātpuruṣākṛtim

विधिः सम्भावयेद्यावत्तावत्स त्रिविलोचनः ।दृष्टः क्षणेन च महापुरुषो नीललोहितः॥ 8.40 ॥

vidhiḥ sambhāvayedyāvattāvatsa trivilocanaḥ | dṛṣṭaḥ kṣaṇena ca mahāpuruṣo nīlalohitaḥ

ब्रह्मोवाच ।नीललोहित जाने त्वां मा भैषीश्चन्द्रशेखर ।भालस्थलान्मम पुरा रुद्रः प्रादुरभूद्भवान्॥ 8.42 ॥

brahmovāca | nīlalohita jāne tvāṃ mā bhaiṣīścandraśekhara | bhālasthalānmama purā rudraḥ prādurabhūdbhavān

रोदनाद् रुद्रनामापि योजितोऽसि मया पुरा ।मामेव शरणं याहि पुत्र रक्षां करोमि ते॥ 8.43 ॥

rodanād rudranāmāpi yojito'si mayā purā | māmeva śaraṇaṃ yāhi putra rakṣāṃ karomi te

॥ नन्दीश्वर उवाच ।अथेश्वरः पद्मयोनेः श्रुत्वा गर्ववतीं गिरम् ।चुकोपातीव च तदा कुर्वन्निव लयम्मुने॥ 8.44 ॥

|| nandīśvara uvāca | atheśvaraḥ padmayoneḥ śrutvā garvavatīṃ giram | cukopātīva ca tadā kurvanniva layammune

स कोपतः समुत्पाद्य पुरुषं भैरवं क्वचित् ।प्रज्वलन्तं सुमहसा प्रीत्या च परमेश्वरः॥ 8.45 ॥

sa kopataḥ samutpādya puruṣaṃ bhairavaṃ kvacit | prajvalantaṃ sumahasā prītyā ca parameśvaraḥ

ईश्वर उवाच ।प्राक् च पङ्कजजन्मासौ शास्यस्ते कालभैरव ।कालवद्राजसे साक्षात्कालराजस्ततो भवान्॥ 8.46 ॥

īśvara uvāca | prāk ca paṅkajajanmāsau śāsyaste kālabhairava | kālavadrājase sākṣātkālarājastato bhavān

विश्वं भर्त्तुं समर्थोऽसि भीषणाद्भैरवः स्मृतः ।त्वत्तो भेष्यति कालोऽपि ततस्त्वं कालभैरवः॥ 8.47 ॥

viśvaṃ bharttuṃ samartho'si bhīṣaṇādbhairavaḥ smṛtaḥ | tvatto bheṣyati kālo'pi tatastvaṃ kālabhairavaḥ

आमर्दयिष्यति भवान्रुष्टो दुष्टात्मनो यतः ।आमर्दक इति ख्यातिं ततः सर्वत्र यास्यसि॥ 8.48 ॥

āmardayiṣyati bhavānruṣṭo duṣṭātmano yataḥ | āmardaka iti khyātiṃ tataḥ sarvatra yāsyasi

यतः पापानि भक्तानां भक्षयिष्यसि तत्क्षणात् ।पापभक्षण इत्येव तव नाम भविष्यति॥ 8.49 ॥

yataḥ pāpāni bhaktānāṃ bhakṣayiṣyasi tatkṣaṇāt | pāpabhakṣaṇa ityeva tava nāma bhaviṣyati

या मे मुक्तिपुरी काशी सर्वाभ्योऽपि गरीयसी ।आधिपत्यं च तस्यास्ते कालराज सदैव हि॥ 8.50 ॥

yā me muktipurī kāśī sarvābhyo'pi garīyasī | ādhipatyaṃ ca tasyāste kālarāja sadaiva hi

तत्र ये पातकिनरास्तेषां शास्ता त्वमेव हि ।शुभाशुभं च तत्कर्म चित्रगुप्तो लिखिष्यति॥ 8.51 ॥

tatra ye pātakinarāsteṣāṃ śāstā tvameva hi | śubhāśubhaṃ ca tatkarma citragupto likhiṣyati

नन्दीश्वर उवाच ।एतान्वरान्प्रगृह्याथ तत्क्षणात्कालभैरवः ।वामाङ्गुलिनखाग्रेण चकर्त च विधेश्शिरः॥ 8.52 ॥

nandīśvara uvāca | etānvarānpragṛhyātha tatkṣaṇātkālabhairavaḥ | vāmāṅgulinakhāgreṇa cakarta ca vidheśśiraḥ

यदङ्गमपराध्नोति कार्यं तस्यैव शासनम् ।अतो येन कृता निन्दा तच्छिन्नं पञ्चमं शिरः॥ 8.53 ॥

yadaṅgamaparādhnoti kāryaṃ tasyaiva śāsanam | ato yena kṛtā nindā tacchinnaṃ pañcamaṃ śiraḥ

अथ छिन्नं विधिशिरो दृष्ट्वा भीततरो हरिः ।शातरुद्रियमन्त्रैश्च भक्त्या तुष्टाव शङ्करम्॥ 8.54 ॥

atha chinnaṃ vidhiśiro dṛṣṭvā bhītataro hariḥ | śātarudriyamantraiśca bhaktyā tuṣṭāva śaṅkaram

भीतो हिरण्यगर्भोऽपि जजाप शतरुद्रियम् ।इत्थं तौ गतगर्वौ हि सञ्जातौ तत्क्षणान्मुने॥ 8.55 ॥

bhīto hiraṇyagarbho'pi jajāpa śatarudriyam | itthaṃ tau gatagarvau hi sañjātau tatkṣaṇānmune

परब्रह्म शिवः साक्षात्सच्चिदानन्दलक्षणः ।परमात्मा गुणातीत इति ज्ञानमवापतुः॥ 8.56 ॥

parabrahma śivaḥ sākṣātsaccidānandalakṣaṇaḥ | paramātmā guṇātīta iti jñānamavāpatuḥ

सनत्कुमार सर्वज्ञ शृणु मे परमं शुभम् ।यावद्गर्वो भवेत्तावज्ज्ञानगुप्तिर्विशेषतः॥ 8.57 ॥

sanatkumāra sarvajña śṛṇu me paramaṃ śubham | yāvadgarvo bhavettāvajjñānaguptirviśeṣataḥ

त्यक्त्वाभिमानं पुरुषो जानाति परमेश्वरम् ।गर्विणं हन्ति विश्वेशो जातो गर्वापहारकः॥ 8.58 ॥

tyaktvābhimānaṃ puruṣo jānāti parameśvaram | garviṇaṃ hanti viśveśo jāto garvāpahārakaḥ

अथ विष्णुविधी ज्ञात्वा विगर्वौ परमेश्वरः ।प्रसन्नोऽभून्महादेवोऽकरोत्तावभयौ प्रभुः॥ 8.59 ॥

atha viṣṇuvidhī jñātvā vigarvau parameśvaraḥ | prasanno'bhūnmahādevo'karottāvabhayau prabhuḥ

आश्वास्य तौ महादेवः प्रीतः प्रणतवत्सलः ।प्राह स्वां मूर्तिमपरां भैरवन्तं कपर्द्दिनम्॥ 8.60 ॥

āśvāsya tau mahādevaḥ prītaḥ praṇatavatsalaḥ | prāha svāṃ mūrtimaparāṃ bhairavantaṃ kaparddinam

महादेव उवाच ।त्वया मान्यो विष्णुरसौ तथा शतधृतिः स्वयम् ।कपालं वैधसं वापि नीललोहित धारय॥ 8.61 ॥

mahādeva uvāca | tvayā mānyo viṣṇurasau tathā śatadhṛtiḥ svayam | kapālaṃ vaidhasaṃ vāpi nīlalohita dhāraya

ब्रह्महत्यापनोदाय व्रतं लोकाय दर्शय ।चर त्वं सततं भिक्षां कपालव्रतमाश्रितः॥ 8.62 ॥

brahmahatyāpanodāya vrataṃ lokāya darśaya | cara tvaṃ satataṃ bhikṣāṃ kapālavratamāśritaḥ

इत्युक्त्वा पश्यतस्तस्य तेजोरूपः शिवोऽब्रवीत् ।उत्पाद्य चैकां कन्यां तु ब्रह्महत्याभिविश्रुताम्॥ 8.63 ॥

ityuktvā paśyatastasya tejorūpaḥ śivo'bravīt | utpādya caikāṃ kanyāṃ tu brahmahatyābhiviśrutām

यावद्वाराणसीं दिव्यां पुरीमेषां गमिष्यति ।तावत्त्वं भीषणं कालमनुगच्छोग्ररूपिणम्॥ 8.64 ॥

yāvadvārāṇasīṃ divyāṃ purīmeṣāṃ gamiṣyati | tāvattvaṃ bhīṣaṇaṃ kālamanugacchograrūpiṇam

सर्वत्र ते प्रवेशोऽस्ति त्यक्त्वा वाराणसीं पुरीम् ।वाराणसीं यदा गच्छेत्तन्मुक्तो भव तत्क्षणात्॥ 8.65 ॥

sarvatra te praveśo'sti tyaktvā vārāṇasīṃ purīm | vārāṇasīṃ yadā gacchettanmukto bhava tatkṣaṇāt

नन्दीश्वर उवाच ।नियोज्य तामिति तदा ब्रह्महत्यां च तां प्रभुः ।महाद्भुतश्च स शिवोऽप्यन्तर्धानमगात्ततः॥ 8.66 ॥

nandīśvara uvāca | niyojya tāmiti tadā brahmahatyāṃ ca tāṃ prabhuḥ | mahādbhutaśca sa śivo'pyantardhānamagāttataḥ

त्रिशूलपाणिर्भालाक्षो नागोडुपविभूषणः ।हिरण्यगर्भस्तं दृष्ट्वा विहसन्प्राह मोहितः॥ 8.416 ॥

triśūlapāṇirbhālākṣo nāgoḍupavibhūṣaṇaḥ | hiraṇyagarbhastaṃ dṛṣṭvā vihasanprāha mohitaḥ